“Fotospor” bu xəbəri tirajlayandan sonra ölkə mediyasının da gündəminə düşdü. Mən də “CBC Sport”da yayınlanan “Türkiyədən futbol” verilişinin aparıcı-eksperti kimi bu barədə kiçik bir araşdırma etdim. Türkiyəli həmkarlarımla yox, “Fənərbaxça” və “Qalatasaray” rəsmiləri ilə əlaqə saxladım. “Qalatasaray”ın idarə heyətinin azərvaycanlı üzvü Emil İmanovla danışdım. O, mənə cavabında “klubun bu barədə məlumatı yoxdu, lakin ola bilər ki, Azəbaycan tərəfindən Türkiyə Futbol Federasiyasına məktub göndərilib. Hər halda, “Qalatasaray” rəhbərliyi olaraq, Azəbaycan tərəfinin belə təklifindən xəbərsizik” dedi. Səudiyyə Ərəbistanındakı hadisələrdən sonra Superkubok matçının ölkədən kənarda keçirilməsi ehtimalının çətin olacağını da əlavə etdi. Eyni zamanda belə müraciət olarsa, müsbət yanaşacaqlarını qeyd etdi. Sadəcə, Türkiyə Cümhuriyyətinin yüzilliyi münasibətiylə bu qarşılaşmanın Türkiyədə keçiriləcəyini düşündüyünü söylədi. Yekunda hər şey ola biləcəyini, belə müraciət daxil olarsa, son qərarı TFF-nin verəcəyini də gizlətmədi. Şəxsi düşüncəsi kimi belə bir oyunun Bakımıza çox yaraşacağını, həm “Qarabağ”la “Qalatasaray” arasındakı xeyriyyə matçında, həm də qarşılanma mərasimində kifayət qədər “cim-bom” azərkeşini gördüyünü dilə gətirdi. “Fənərbaxça”dan isə Əli Koçun köməkçilərindən biriylə danışdım. Sadəcə, adının çəkilməsini istəmədi. O, mətbuatda Əli Koçun bu qarşılaşmanın Bakıda keçirilməsinə etiraz etməsi ilə bağlı yayılan xəbərləri təkzib etdi. Ölkəmizdə də çoxlu “Fənərbaxça” azarkeşinin olduğundan xəbərdardılar. Bakıda oynayacaqları təqdirdə çox böyük futbol bayramı yaşanacağını da qeyd etdi. Bəlkə də Azərbaycan tərəfindən TFF-yə müraciətin olub və TFF bu müraciəti cavablayandan, bəzi detalları danışandan sonra “Fənərbaxça” rəhbərliyinə xəbər verəcək. Amma TFF-dən rəsmi şəkildə klub rəhbərliyinə belə bir müraciət daxil olmadığını dedi”.