“Sabah" ötən mövsüm çox maraqlı oyun göstərməklə 2-ci yeri tutdu, həm də Konfrans Liqasında uğurla debüt etdi. Amma cari mövsümdə həmin komandadan əsər-əlamət qalmayıb.

Qış fasiləsinə 7-ci pillədə yollanan “tələbələr”in durumu ilə bağlı klubun Müşahidə Şurasının üzvü və idman direktoru İqor Ponomaryovla söhbətləşdik.

- Yeni mösümün startı ərəfəsində demişdiz ki, ilk "3-lük" uğrunda mübarizə aparmaq, avrokuboklara vəsiqə qazanmaq hədəfimiz var. Çempionatın ilk yarısı başa çatdı və 7-ci pillədə qərarlaşmısız. Hədəflərinizdən uzaq düşməmisiz?
- Bəli, qarşıya avrokuboklara vəsiqə qazanmaq vəzifəsi qoymuşuq və bu dəyişməyib. Təbii ki, çempionata istədiyimiz kimi başlaya bilmədik. Mikelslə Kaşuk kimi əsas oyunçularımızın getməsi oyun ansamblına təsirsiz ötüşmədi. Heyətə yeni oyunçular cəlb etdik, rotasiyalar apardıq, amma hələ ki gedənlərin yerini doldura bilməyiblər. Buna rəğmən, futbolçularımız meydanda döyüşür, savaşırlar. Sadəcə, bir neçə oyunda bəxtimiz də gətirmədi. Elə "Qəbələ" ilə sonuncu görüşdə də şanssızlıq yaşadıq. Düşünürəm ki, ardıcıl üç-dörd oyunda qələbələr qazansaydıq, bu gün yuxarı pillələrdə qərarlaşacaqdıq. Premyer-liqada hələ ikinci yarı var. 3-4-cü dövrələrdə sona qədər döyüşəcəyik. Hələ əsas mübarizə irəlidədi.

- “Sabah”da ilk ayrılıq və sözləşmənin yenilənməsi gerçəkləşdi. Ceyhun Nuriyev getdi, Nicat Mehbalıyev isə müqavilə müddətini 2026-cı ilə qədər uzatdı.
- Biz şadıq ki, heyətimizdə Nicat Mehbalıyev, Yusif İmanov, Rüstəm Samiqullin və əvəzedicilərdən cəlb etdiyimiz Emil Həbibov kimi gənc qolkiperlər var. Onların hər birinin xidmətindən yararlanmağa çalışırıq. Ötən mövsüm Yusif daha çox şans qazansa da, bu il bir qədər sabit çıxış etmir. Nicat uzun müddət ehtiyatda qaldığı üçün əvvəlcə komandadan getmək istədi, bir qədər əvəzedicilərdə məşq etdikdən sonra ona şans verdik. Sevindici hal odu ki, Nicat qapıda pis dayanmadı. Bütün çətinliklərə rəğmən, qolkiperin əzmlə üzərində çalışması və şansını gözləməsi bizi sevindirir. Digər qapıçıların da öz üzərində işlədiyini müşahidə edirik. Bu xoş haldı. Bu qapıçıların hər birinin yaxşı gələcəyinə inanırıq. Ceyhunə gəlincə, onda vəziyyət fərqlidi. Onun potensialına, fiziki hazırlığına inanırdıq. Amma komandamızda rəqabətə görə ona şans verə bilmədik. Bu o demək deyik ki, onun xidmətində maraqlı deyildik. Sadəcə, futbolçu getmək istədi. Nə qədər çalışsaq da, onu inadından döndərə bilmədik. Belədə ilk yarı bitən kimi futbolçunu getməsinə razılıq verdik və o, "Zirə"yə keçdik. Ceyhuna yeni komandasında və gələcək karyerasında uğurlar arzulayıram.

- Murad Musayev sonuncu mətbuat konfransında "Sabah" artıq əvvəlki "Sabah" deyil” deyib. Rusiyalı mütəxəssis nə demək istəyir? Onun yola salınması gözlənilirmi?
- Murad Musayevin niyə o ifadəni dediyini və bunun hansı anlama gəldiyini onun özündən soruşsaz, yaxşı olar. Mən onun yerinə nəsə deyə bilmərəm. Amma bir məqamı xüsusi vurğulayım ki, Murad Oleqoviçlə müqaviləmiz var, baş məşqçini yola salmaq kimi planımız yoxdu.

- Hədəfinizin yenidən ilk “4-lük" olduğunu vurğuladız. Sizcə, bu çətin olmayacaq?
- Bəli, hədəfimiz dəyişməyib. Hədəfmizi dəyişmək kimi niyyətimiz də yoxdu. Həm maddi imkanlarımız, həm heyətimiz, həm də turnir cədvəlindəki mənzərə nikbin olmağa əsas verir.

- Qış fasiləsində "Sabah"da yeni nəfəs görəcəyikmi?
- İndidən nəsə deyə bilmərəm. Bu məsələdə əsas söz sahibi baş məşqçidi, ehtiyac duysa, bu yöndə işlər aparacağıq.

ABDULLA İSMAYILOĞLU