“Qəbələ” səfərdə “Şamaxı”nı minimal hesabla məğlub edərək avrokuboklara vəsiqə qazandı.
Bu isə futbolçuların hədsiz sevincinə səbəb oldu. “Qəbələ”nin qolkiperi Nicat Mehbalıyev başqalarına nisbətən daha xoşbəxt görünürdü. O, sevinc hisslərini baş məşqçi Elmar Baxşıyevlə birgə yaşayırdı. Həmin anda nələrin yaşadığını öyrənmək üçün gənc qolkiperlə əlaqə saxladıq:
“Əvvəlcədən belə bir planım yox idi ki, qələbə qazansaq, Elmar Baxşıyevlə birgə sevinim. Əsas hədəfimiz qələbə qazanmaq idi. Çünki 3 komanda arasında mübarizə gedirdi. “Zirə” ilə “Sabah” da bizim kimi avrokuboklara vəsiqə qazanmaq istəyirdi. Sadəcə, oyun bitən kimi sevinməyə başladıq. Sonra dedilər ki, “Sabah” - “Sumqayıt” görüşü 2:2 hesabı ilə bitib. Avrokuboklara vəsiqəni təmin etdiyimizi bildik. Bundan sonra daha çox sevindik. Bu il premyer-liqa matçlarında daim oynadım. Çətin olsa da, komandamız bu mübarizədən qalib ayrıldı. İnşallah, “Qəbələ” ilə avrokuboklarda debüt edərəm. Bilmirəm, olacaq, ya yox. Yenə də qismət olar, oynayırıq. “Qəbələ” həmişə mənim ürəyimdədi. Onların sevinci mənim də sevincimdi”.
İLKİN SULTANLI