“Neftçi” üçün daxili çempionatda yeni mövsüm “Kəpəz”lə oyunda başlamışdı.

Rumıniyalı Adrian Mutu və onunla birlikdə gələn köməkçiləri Azərbaycan çempionatının dadını-duzunu, bizim premyer-liqanın ab-havasını hiss etmişdilər. Zaman o zaman idi ki, “Neftçi” hər gün yeni bir futbolçunun transferini həyata keçirirdi, klubun rəsmi hesablarından gözoxşayan, insanı riqqətə gətirən videoçarxlar paylaşılırdı. İzləyənlər də düşünürdü ki, “ağ-qaralar” adlı-sanlı, faydalı futbolçuları heyətinə qatır, komanda gündən-günə güclənir. Bir də gözümüzü açıb görəcəyik ki, turnir cədvəlinin zirvəsində “Neftçi” dayanıb, hamıya yuxarıdan aşağı baxır.

Amma düşündüklərimizin, təxmin etdiklərimizin heç biri olmadı. Qısa və konkret onu demək mümkündü ki, Mutu ona bəslənən ümidləri doğrultmadı. Bəlkə heç rumın çalışdırıcı özü də Azərbaycanda başına gələcəkləri təxmin etmirdi. İnana bilmirdi ki, onu burda belə çətinliklər gözləyir. “Uşaqlığın son gecəsi” filmində məşhur səhnələrin birində olduğu kimi. Gənc mühəndislər ət kombinatının tikintisində işləməyə gəlirlər. Yaşlı “prorab” da onları süzür və sual edir: “ət iyinə gəlmisiz?” Filmdəki Muradın həmin “prorab”a nə cavab verdiyini, yəqin ki, unutmamısız. İndiki halda Mutu və onun özüylə gətirdiyi köməkçiləri o vəziyyəti yaşadılar. Onlar Bakıya rahat həyat sürməyə, neft pulları hesabına yaxşı qazanc əldə etməyə gəlmişdilər. Düşünmüşdülər ki, orda nəticə qazanmağa nə var? Buraxarıq meydana 5-6 legioneri, yanlarına da 3-4 orta səviyyəli yerli futbolçu qoyarıq. Bununla da başlayarıq qələbələri sıralamağa. Rumınların bu təxminləri özünü doğrultmadı.

Azərbaycan çempionatının mürəkkəb olduğunu, burda nəticə verməyin çətinliyini indiyə qədər çoxlu əcnəbi mütəxəssis görmüşdü. Həmin “qatar”ın növbəti sərnişini də Mutu oldu. Ümid edirəm ki, burda qazandığı təcrübə rumıniyalı mütəxəssisə gələcək fəaliyyətində fayda verəcək. Mutu da başa düşəcək ki, getdiyin ölkənin futboluna da, futbolçusuna da sayğı göstərməlisən. Rumıniyalı çalışdırıcı əcnəbilərə və “milliləşdirilənlərə” o qədər ürək qızdırmışdı ki, onun üçün azərbaycanlı futbolçuların heç bir dəyəri-qiyməti qalmamışdı. Eləcə də rəqib komandalara da eyni dərəcədə yuxarıdan aşağı baxırdı. Düşünürdü ki, əşi, “Araz Naxçıvan”dı, “Kəpəz”di, yaxud da “Sumqayıt”dı da, bunlara qalib gəlməyə nə var?! “Kəpəz” elə ilk turdaca Mutuya və komandasına şok yaşatdı, onları göydən yerə endirdi. “Araz Naxçıvan” iki qarşılaşmada “Neftçi”dən 4 xal almağı bacardı. “Sumqayıt” isə ikinci dövrədə “Neftçi Arena”nı sözün əsl mənasında qaranlığa bürüdü.

Mutunun bəzi havadarları “Neftçi”nin qış fasiləsinə 3-cü pillədə yollanmasını önə çəkir, rumınların qovulmasını haqsızlıq sayırlar. Amma hadisələri doğru təhlil edəndə görürsən ki, qış ərəfəsindəki son turdakı uğurlu təqvim “Neftçi”nin bu yerdəyişməsində əhəmiyyətli rol oynadı. “Araz Naxçıvan” Tovuz səfərində büdrədi, “Sumqayıt”la “Səbail” bir-biriylə qarşılaşdı. “Neftçi”nin rəqibi isə doğma meydanda “Kəpəz” oldu. Bundan yaxşı fürsət ələ düşməzdi. Mutunun gedişi də futbolçuları yersiz gərginlikdən xilas etmişdi. Onun köməkçiləri düzgün seçim etmiş, heyəti maksumum dərəcədə faydalı qurmuşdular. Bu mövzuda danışarkən bir məqama toxunmaq istəyirəm. Sol cinah müdafiəçisi Azər Salahlı Mutunun əsas heyətə həsrət qoyduğu futbolçulardandı. Azər uzun müddət meydana çıxmamışdı.

Hər şey də ondan başlamışdı ki, “Kəpəz”lə oyunda Salahlı Ehtiram Şahverdiyevin penalti qazandığı epizodda günahkar göstərilmişdi. Azarkeşlərə də belə təqdim olundu ki, Azər penaltiyə səbəbkar olub, bu penaltiylə də “Neftçi” uduzub.
Eyni ssenari Emin Mahmudova münasibətdə də tətbiq olundu. Mutu “Qarabağ”la oyunda kapitanı nümayişkaranə şəkildə əvəzlədi. Guya uğursuzluğun səbəbkarı Emin imiş. Bir oyunda Azər, digərində Emin günahkar elan olundu. Bəs qalan uğursuzluqları kimin vicdanına yazaq?

Taleyin ironiyasıdı. “Kəpəz”lə oyundan sonra Azər Salahlı əsas heyətdəki yerini itirmiş, məğlubiyyətin səbəbkarı kimi göstərilmişdi. Elə “Kəpəz”lə oyunda Azər əsas heyətdə meydana çıxdı, oyundakı ilk qolun müəllifi kimi adını tabloya yazdırdı. Az sonra Mutunun istefaya göndərilməsiylə bağlı rəsmi xəbər açıqlandı. Mutu getdi, “Neftçi”yə qalan isə elə Azər oldu. Ümid edək ki, bundan sonra ölkənin ən qocaman klubu azərbaycanlı futbolçulara daha çox sahib çıxacaq, onlara layiqincə qiymət verəcək.

AMAL