Böyük bir qalmaqala imza ataraq adını Türkiyə futboluna qara hərflərlə yazdıran “Ankaragücü”nün sabiq prezidenti Faru Kocadan xəbər var.

Xatırladaq ki, bu şəxs 15-ci tur çərçivəsində dekabrın 11-də keçirilən “Ankaragücü” – “Çaykur Rizəspor” matçının (1:1) ardından bir andaca bütün Türkiyənin gündəmini zəbt etmişdi. Belə ki, Koca final fitinin ardından tanınmış FİFA referisi Xəlil Umut Melerə yaxınlaşaraq sifətinə yumruq zərbəsi endirmişdi.

Bu olay Avropa mətbuatında da böyük söz-söhbətə səbəb olmuşdu. Almacıq sümüyü çatlayan Meler xəstəxanaya yerləşdirilmiş və 2 gündən sonra evə buraxılmışdı. Hətta ölkə prezidenti Rəcəp Tayyib Ərdoğan da ona zəng vuraraq durumu ilə yaxından maraqlanmışdı. Bu hadisə, gözlənildiyi kimi, Kocaya və “Ankaragücü”nə baha başa gəldi. Paytaxt təmsilçisi evdəki növbəti 5 oyunu azarkeşsiz keçirməli olacaq. İstefa vermək və üzr istəmək məcburiyyətində qalan Faruk Koca isə Türkiyə Futbol Federasiyasının nəzdində fəaliyyət göstərən Nizam-İntizam Komitəsinin qərarı ilə ömürlük futbol fəaliyyətindən kənarlaşdırıldı!

Amma belə görünür, Koca tək bununla canını qurtarmayacaq. Onu daha ciddi cəzalar gözləyir. Çünki Türkiyədə hakimlər “dövlət qulluqçusu” statusundadı. 59 yaşlı Koca hadisədən sonra təzyiqi qalxdığı üçün həmin gecəni xəstəxanada keçirdi. Amma ertəsi gün dərhal həbs olunaraq müvəqqəti təcridxanaya yerləşdirildi. Koca “vətəndaşa dövlət vəzifəsini yerinə yetirərkən idman meydanında ciddi xəsarət alacaq dərəcədə qəsdən zərər vurma”, “təhidid” və “idmanda şiddət və düzənsizliyin qarşısının alınmasına dair qanuna zidd hərəkət etmək” maddələri ilə günahlandırılır. Sabiq prezident həmin tarixdən bəri həbsdə idi. Dekabrın 15-də Ankara Cümhuriyyət Prokukorluğunun hazırladığı iddianamə Ankara 3-cü Cəza Məhkəməsi tərəfindən qəbul olundu. Amma dünən Kocanın vəkili onun məhkəməyə qədər həbsdə qalmasına etiraz etdi.

Maraqlıdı ki, onun etirazı təmin olundu. Faruk Koca ölkəni tərk etməmək şərti ilə dünən axşam saatlarında azadlığa buraxıldı. Onun ilk məhkəməsi yanvarın 9-da keçiriləcək.