Dünya hokkeyinin əfsanələrindən biri Yaromir Yaqr qətiyyən çubuğu yerə qoymaq fikrində deyil. 51 yaşlı çexiyalı «Kladno”nun heyətində yeni mövsümdə ilk oyununu keçirib və hətta məhsuldar ötürmə də verib…

“Football-plus.az” xəbər verir ki, narahat Yaromir Yaqr oyunçu karyerasını bitirəndən sonra nə ilə məşğul olacağını heç cür tam müəyyənləşdirə bilmir. Uşaq şirniyyat qaçan kimi o da daim hokkey meydançası axtarır. Yaqrın 51 yaçı var, ancaq yenə də sakitləşmir. İllərin çiyninə qoyduğu yük onu qocalıq haqda düşünməyə məcbur edəndə sanki gəncləşir və buzun üzərinə tələsir.

Yaqr bir neçə gün əvvəl doğma «Kladno”nun heyətində mövsümdə ilk oyununu səfərdə Çexiya çempionatının lideri «Pardubitse”yə qarşı keçirib. Dahi çexiyalı üçün bu, karyerasındakı 36-cı mövsümün başlaması demək idi! Qeyri-adi rəqəmdi! Komandaların səviyyəsi arasındakı kosmik fərqə (çempionatın təxminin yarısı arxada qalıb, «Pardubitse» «Kladno”dan 40 xal irəlidədi) baxmayaraq, Yaqr bu oyunda «artıq ət» olmadı. Heyətində Lukaş Sedlak, Tomaş Qika, Lukaş Radil kimi oyunçuların olduğu meydan sahibləri 2-ci periodun əvvəlində hesabı 3:0 etdi. Ardından işə Yaqr qarışdı. O, baxımlı əks-hücumun gedişində özündən 20 yaş kiçik olan Yakub Strndaya qol ötürməsi verdi. Əfsanəsinin parlaq hərəkətlərindən ruhlanan «Kladno» 0:3-ü 3:3-ə çevirsə də, 2-ci periodun sonunda buraxdığı qolun əvəzini çıxa bilmədi və 3:4 uduzdu. Güclü «Pardubitse» qələbə hesabını qorudu. Ancaq həmin gün bu 3 xal haqda düşünən az idi. Dahi forvardı yenidən iş başında görməyin dəyəri yoxdu. Meydanda 13 dəqiqə 52 saniyə keçirən Yaqr hər kəsin könlüşü oxşadı. 51 yaşında!