“Epizoda sonradan baxsaq da, topun xətti keçib-keçmədiyi bilinmir” – Qəzənfər Abbasov “Qarabağ”ın qolu haqda
Dekabrın 21-də ölkə kubokunun 1/8 final mərhələsi çərçivəsində Xankəndi şəhər stadionunda keçirilən oyunda “Qarabağ” son dəqiqə qolu ilə MOİK-i mübarizədən kənarlaşdırdı.
Bəzi azərkeşləri narahat edən bir məqam var. Son saniyələrdə Rahil Məmmədov Nəriman Axundzadəyə məhsuldar ötürmə verərkən topun meydanı tərk edib-etmədiyi maraq doğururdu. “CBC Sport”un çəkilişində həmin epizod aydın görünmür. Bəs MOİK bu barədə nə düşünür? “Football-plus.az” olaraq, bu məsələni aydınlatmaq üçün komandanın baş məşqçisi Qəzənfər Abbasovla əlaqə saxladıq:
“Doğrusu, mən də maraqlanmadım. Top xətti keçsəydi, yəqin ki, VAR-a baxıb dəyərləndirərdilər. Epizoda sonradan baxsaq da, topun xətti keçib-keçmədiyi bilinmir. VAR hakimləri epizoda baxıb, qol qeydə alınıb. Onlara inanmaq lazımdı”.
Mütəxəssis eyni zamanda Xankəndini təmsil etmək üçün yeni klubun yaradılıb-yaradılmaması və ya indiki klublardan birinin oranı təmsil etməsi perspektivinə də aydınlıq gətirdi:
“Hansı klubun oranı təmsil etməsinin fərqi yoxdu. İstər yeni yaradılan klub olsun, istər MOİK olsun, istərsə də başqa birisi. Əsas odu ki, Azərbaycan klubu olsun, yerli futbolçular olsun, yerli məşqçilər olsun və ölkə çempionatında iştirak eləsin. Xankəndi tarixi torpağımızdı. Qəbələdə, Gəncədə, Tovuzda futbol klublarımız olduğu kimi, orda da olmalıdı. Ora MOİK-də gedə bilər, başqa klub da və ya yeni klub da yaradıla bilər. Əsas odu ki, öz komandamız olsun, çempionatımızda iştirak eləsin. Bu bizim üçün böyük sevinc doğurar”.
MİRKAMAL KAZIMZADƏ
