“Qalatasaray”ın yeni transferlərindən olan Anxelinyonun Türkiyə macərası başa çatmaq üzrədi.

"Football-plus.az" xəbər verir ki, böyük ehtimalla ispaniyalı sol cinah müdafiəçisini bir daha sarı-qırmızı formada görməyəcəyik. Baxmayaraq ki, İstanbul nəhəngi yayda bu futbolçunu “Leyptsiq”dən birilliyə icarəyə götürmüşdü. Məsələ burasındadı ki, müqavilədə xüsusi maddə mövcuddu. Anxelinyo 20 rəsmi oyuna çıxacağı təqdirdə “Cim-Bom” almanlara 6 milyon avro ödəyərək onu məcburi şəkildə transfer etməli idi. Amma 26 yaşlı futbolçu fanatların və Okan Burukun ümidlərini doğrulda bilmədi. “Kopenhagen”lə qarşılaşmada İstanbul nəhənginin heyətində 19-cu rəsmi oyununa çıxan Anxelinyo növbəti dəfə zəif performans sərgilədi. Bu üzdən “Qalatasaray” onu daimi əsasda transfer etmək istəmir. Anxelinyonun müqaviləsi qarşıdakı günlərdə ləğv ediləcək və o, Almaniyaya geri göndəriləcək. Təsadüfi deyil ki, Okan Buruk qışda rəhbərlikdən ilk növbədə müdafiənin sol cinahının gücləndirilməsini tələb edib. Almaniya mətbuatının yazdığına görə Anxelinyoya “Sevilya” və “Union” maraq göstərir. Bu futbolçu “sarı-qırmızılar”ın heyətində 8-i superliqa, 11-i ÇL-də olmaqla 19 rəsmi matçda ümumilikdə 1475 dəqiqə meydanda oldu və aktivinə yalnız 1 qol, 1 məhsuldar ötürmə yaza bildi.

Bu arada srağagün “Qalatasaray”ın digər üzvü Serxio Oliveyra böyük bir şanssızlıq yaşadı. Oyunçular səhər məşqindən öncə trenajor zalına yollandılar. Portuqaliyalı yarımmüdafiəçi burda ağırlıq qaldırarkən bir andaca sinəsində ciddi ağrılar hiss etdi. Tibbi müayinədən sonra onun sinə əzələsində yırtıq aşkar olundu. Böyük ehtimalla təcrübəli futbolçu əməliyyat olunacaq. Bu halda isə o, bir neçə ay topa toxuna bilməyəcək. Bu hadisə “Qalatasaray”ın planlarını dəyişib. Oliveyranın meneceri İstanbula dəvət olunub. İkinci dövrə üçün onun müqaviləsinin dondurulması ehtimalı var. Legioner limiti üzündən rəhbərlik son dərəcə diqqətli davranmağa məcburdu. Limitdə yer açmaq üçün Oliveyraya müqaviləsinin dondurulması təklif olunacaq. Ötən mövsümdəki çempionluqda önəmli rol oynayan 31 yaşlı futbolçu bu mövsüm sabit təsir bağışlamır. O, cari mövsüm iştirak etdiyi 20 rəsmi matçın cəmi 9-da start heyətində meydana çıxıb və 2 qol, 2 məhsuldar ötürməlik fayda verib. Digər mərkəz yarımmüdafiəçisi Ndombelenin də ümidləri doğrultmadığını və Kaan Ayhanın məcburiyyətdən bu mövqedə oynadıldığını nəzərə alsaq, rəhbərlik qışda müdafiənin sol cinahı ilə yanaşı yarımmüdafiənin mərkəzini də gücləndirməli olacaq.

Sondə bir xəbəri də diqqətinizə çatdıraq. “Qalatasaray” prezidenti Dursun Özbək dünən xəstəxanaya yerləşdirilib. Ona pankreatit, yəni mədəaltı vəzin iltihabı diaqnozu qoyulduğu bildirilir. Ancaq dəqiq diaqnoz çəkilən tomoqrafiyanın nəticəsindən sonra bəlli olacaq. Bu hadisə üzündən “Cim-Bom”un dünən keçirilməsi nəzərdə tutlan idarə heyətinin toplantısı təxirə salındı.