Tanqi Ndombele iki aya yaxındı “Qalatasaray”dadı. Amma onun klubdakı varlığı ilə yoxluğu çox da bilinmir.

İstedadlı fransalı futbolçu indiyəqədərki performansı ilə ümidləri qətiyyən doğrulda bilməyib. Bu arada 26 yaşlı futbolçu ilə bağlı ortaya bir-birindən maraqlı və qalmaqallı iddialar atılıb. İlk iddia ondan ibarətdi ki, sən demə, baş məşqçi Okan Buruk, ümumiyyətlə, bu futbolçunun transferini istəmirmiş!

“Cim-Bom”un skautlarının onun həm fiziki, həm də psixoloji durumu ilə bağlı hazırladığı raportları incələyən mütəxəssis iki dəfə dalbadal bu oyunçunun transferinə qarşı çıxıbmış. Əslində “Qalatasaray”ın ilk hədəfi “Latsio”lu Matias Vesino imiş. Amma uruqvaylının keçidi baş tutmadığından İstanbul nəhəngi transfer dönəminin son günündə tələm-tələsik Ndombeleni “Napoli”dən birilliyə icarəyə götürdü. Digər iddia isə İspaniya mətbuatından gəlib.

Şayiələrə inansaq, Ndombele Çempionlar Liqasında “Bavariya”ya qarşı oyundan sonra komandanın qaldığı otelə hamburger sifariş verib. Okan Buruk da bundan xəbər tutaraq çox əsəbləşib. Hələ ki bu futbolçunun komandaya heç bir faydası dəyməyib. O, indiyə qədər 4-ü superliqada, 3-ü ÇL-də olmaqla 7 rəsmi qarşılaşmada ümumilikdə 123 dəqiqə meydanda olub. Bu müddətdə hesabına nə qol yazıb, nə də məhsuldar ötürmə. Ndombelenin əsas problemlərindən biri artıq çəkidi. Onun çəkisi hazırda 81 kq-dı. İdeal çəkisi isə 75 kq olmalıdı. Yəni 6 kq artıq çəkisi var.

Qəribəsi odu ki, fransalı həm də “Qalatasaray”da ən çox qazanan futbolçulardan biridi! Onun illik məvacibi 3,136 milyon avrodu. Amma belə baha futbolçudan, təbii ki, hər kəs yüksək performans gözləyir. Ndombelenin qış transfer dönəminə qədər zamanı var. Bu müddətdə o, özünü göstərə və Okan Burukun gözünə girə bilməsə, böyük ehtimalla qışda komandadan ayrılacaq. “Qalatasaray” həm də bu oyunçunu daimi əsasda transfer etmək hüququna malikdi. Amma bu, məcburi deyil. “Sarı-qırmızılar” Ndombeleni transfer etmək istəsələr, “Napoli”yə 15 milyon avro ödəməli olacaqlar. Anlaşmaya əsasən bu məbləğ qarşı tərəfə 5 il ərzində ödəniləcək.

Daha öncə eynilə Ndombele kimi özünü göstərə bilməyən “Qalatasaray”ın digər yeni transfer Sedrik Bakmbunun da qışda komandadan ayrılacağı ilə bağlı şayiələr yayılmışdı.