Salmanov “Göyəzən”in Region Liqasında yeni mövsümə qələbəylə başlamasından da söhnət açdı: "Çempionat gec start götürsə də, bəlli plan üzrə hərəkət etdik. Mövsümə səfərdə "Şəki"ni məğlub etməklə başladıq. Təəssüf ki, həmin oyunda səhhətimə görə iştirak edə bilmədim. Amma uşaqlar qələbə xəbərini çatdırdılar. Buna çox sevindim. İndi bu uğuru davam etdirməliyik. 2-ci turda debütant "Goranboy Qala"nı qəbul edəcəyik. O vaxta kimi ayağa qalxa bilsəm, Qazax şəhər stadionunda olacam. Martda 70 yaşım tamamlanacaq. Ömrümün 50 ildən çoxunu futbola bağlamışam. İndi kənardan oturub oyuna baxmaq, özü də xəstəxanada olmaq heç xoş deyil. Mənim günüm stadionlarda keçib. Əvvəllər demişdim ki, sağlamlığım əl versə, veteranları bir araya gətirib 70 illik yubileyimlə bağlı meydana çıxmaq, yenidən cavanlığımı yaşamaq istəyirəm. İndi isə yubileydən də çox "Göyəzən"in yanında olmaq istəyirəm. Əsas arzum sağlamlığıma qovuşmaqla yanaşı, Qazax təmsilçisini peşəkar liqalarda görməkdi. Bundan sonra nə qədər ömrüm qalıbsa, yenə Qazax futboluna həsr edəcəm".