Region Liqasının iştirakçıları arasında ölkənin köklü klublarından “Göyəzən” də var.

Qazax klubunu mərasimdə təsisçi və idman direktoru Mehdi Salmanov təmsil edirdi. Onunla qısaca söhbətləşməyə macal tapdıq.

- Mehdi müəllim, bir ara səhhətinizdə problemlər var idi. İndi necəsiz? 
- Bəli, bir az nasazlamışdım, əsas da ayağımda ağrılar var idi. Amma şükürlər olsun, indi bir qədər yaxşılaşmışam. 
- Bu mövsüm də Region Liqasında iştirak edəcəksiz. Qarşıya qoyduğunuz məqsədr nədi? 
- İlk iki pillədən birini tutmaqla qrupdan çıxmaq və finala qədər irəliləmək. 
- Heyətinizdə yenilik varmı? 
- Ötən mövsüm heyətdə yer alan futbolçuların böyük əksəriyyəti bizlədi, onlarla mübarizə aparacağıq. Həmişəki kimi yerli uşaqların gücündən istifadə etməklə irəliləmək istəyirik. 
- Təcrübəli oyunçunuz Arzuman Vəliyev də "Göyəzən" də yer alacaqmı? 
- Bəli. 
- Məşqçi heyəti də yerində qalır, yoxsa yeni mütəxəssislər dəvət edəcəksiz? 
- Xeyr, bu mövsümdə də Elxan Muradov və köməkçiləri komandanı çalışdıracaq.
- İnfrastrukturla bağlı nə kimi yeniliklər var? 
- Bildiyiniz kimi, stadionumuzun ot örtüyü təbiidi. Qazonla bağlı bizdə heç vaxt problem olmayıb. Hazırda da sulanır. Ot örtüyü ilə bağlı vəziyyət yaxşıdı. Əlavə paltardəyişmə otaqları düzəldilir. Artıq biri hazırdı. Digər zəruri işlər də aparılır. 
- Bəs sponsor sarıdan vəziyyət necədi? 
- Əvvəllər olduğu kimi, hazırda da "Turanbank"dan maliyyələşirik. Təbii ki, məbləğ yüksək deyil. Amma vəziyyətimizin yaxşılaşdırılması üçün artım gözlənilir. Həmçinin Qazax İcra Hakimiyyətindən də kömək sözü verilib, vəziyyətimizlə bağlı rayonun icra başçısına deyilib. Gözləyirik.
 - İcra başçısı şəxsən sizi qəbul edibmi, "Göyəzən"in vəziyyətiylə bağlı maraqlanıbmı? 
- Xeyr, görüşümüz olmayıb. 
- İlk turda səfərdə "Şəki"ylə qarşılaşacaqsız. Matçla bağlı nə düşünürsüz? 
- Biz bütün oyunlara qələbə üçün çıxacağıq. O cümlədən ilk turdakı Şəki səfərindən də 3 xalla ayrılmağı düşünürük. 

ABDULLA İSMAYILOĞLU