Avropa Liqasının 6-cı turunda “Qarabağ” “Həkken”i məğlub edib - 2:1.

“Football-plus.az” xəbər verir ki, matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Doqquz il əvvəl Bakıdakı "İnter"lə oyunu xatırlayırıq. Onda demişdiz ki, yolumuza davam edəcəyik. İllər boyu buna çatmaq nə qədər çətin idi?
- Belə hal yaşanmışdı. Bəzən bizim kimi komandalar üçün belə şanslar çox nadir hallarda olur. O şansı itirəndə, komandaya, rəhbərliyə, kollektivə təsir edir. Bir də gözləyirsən ki, nə vaxt belə şans olacaq. Dəfələrlə oldu. Məncə, hakimin saymadığı qola, geriyə qayıtmaq lazım deyil. Niyə? Çünki yenidən o günləri yada salmaq heç də yaxşı hal olmaz. Amma inanın ki, bəlkə də o oyunun, o qolun sayılmamasının bizim üçün faydası daha çox oldu, nəinki ziyanı. Əminliklə deyirəm. Bəli, 9 il əvvəl o siyahıda olacaqdıq. Hətta cənab prezident bizə dəyər vermişdi. Sanki klub daha çox möhkəmləndi, məsuliyyətimiz çoxaldı. Birbaşa ölkə başçısı tərəfindən diqqət ayrılmışdı. Həmin oyunun daha yaxşı formalaşmağımız üçün faydası oldu. Elə matçlar oldu ki, son saniyələrdə şansımızı əldən verdik. Bəzən elə oyunlar oldu ki... PAOK-u evdə, səfərdə udduq. Amma onlar səfərdə "Fiorentina"nı uddular. Elə hallar olmuşdu ki, bu, daha çox təsir etmişdi. Amma bu gün hər şey çox yaxşı bitdi. Bəlkə də bunun ləzzəti daha yaxşı olacaq. İllər boyu nəticəni gözləyəndə, əziyyətin yerdə qalmayanda, uğuru əldə edəndə, ola bilər uğur daha davamiyətli olsun. Kluba, futbolçularımıza daha çox fayda versin. Bu hallar qaçılmazdı. Böyümək üçün soyuqqanlı olmalıyıq, normal qəbul etməliyik ki, bizə təsir etməsin. Əlimizdə bəhanə tutmalı deyilik ki, o vaxtı belə oldu, ona görə uduzmuşuq. Düşünürəm ki, faydası daha çox oldu, nəinki ziyanı.

- Potensial rəqiblər bəllidi. Kiminlə qarşılaşmaq istəyərdiniz?
- Hər biri Çempionlar Liqasında oynayası komandalardı. Hətta o klubların içərisində ÇL-in qalibi olmağı qarşısına məqsəd qoyanlar da var idi. Hamısı ciddi rəqibdi. Hansı haqda düşünmüşəm desəm, doğru olmaz. Rəqib kim olsa, həmin matçlara çox ciddi hazırlaşacağıq ki, layiqli oynayaq.

- Telefonla danışırdız matçdan sonra. İlk təbriki kimdən aldız?
- Zaqatalanın icra başçısı idi. Çox böyük azarkeşdi. Hər oyundan sonra ən birinci zəng edənlərdəndi. Hətta birincisidi.

- "Rakuv"la oyundan sonra çoxlu tənqidlər var idi. Komandanı tərk edən oyunçular oldu. Bu mövsüm çəkdiyiniz çətinlikləri bilmək istəyərdik...
- Çətinliklər mənə bir o qədər çətin olmur. Çünki olayların içində oluram. Bəzən görürəm ki, kollektivdə hansı çatışmazlıqlar var. Onları necə aradan qaldıra biləcəyimizi düşünürük. Hər il tənqid olub. Tənqid olmayan ilimiz olmayıb. Normaldı. Futbolun ümumi gedişatı belədi. Azarkeş tənqid edər, media tənqid edər, bəlkə rəhbərlik edər, bəlkə bilmədiyimiz-düşünmədiyimiz insanlar. Amma bəzən hər ana real baxmaq lazımdı. Çətinlik və çatışmazlıqlardan narahat idik. Birdən-birə əsas oyunçuların komandadan getməsi, bəzi oyunçuların idman formasının aşağı olması... Bu, onlardan asılı deyildi. Çatışmazlıq var idi. "Rakuv"a uduzsaq belə, oyun baxımından ciddi problemlərimiz olmadı. Sadəcə keyfiyyət çatışmırdı. Bu da sağlam futbolçuların çox olmaması ilə bağlı idi. Gedişatlara hazır olmalıyıq. Komandama güvənirdim. Çünki elə oyunçular var idi ki, kimisi 3, kimisi 10 oyundan sonra daha yaxşı səviyyəyə yüksələcəkdilər. Kimsə tənqid edəndə əsəbiləşirik, narazılıq edirik. İnsanıq. Amma inanın ki, heç kimdən incəmərəm. Azərbaycanlılarımdan incimərəm. Hamınızı çox istəyirəm. Tənqidin o an təsiri ola bilər, amma sizi başa düşə-düşə daha da məsuliyyətli çalışmağa, keyfiyyətli işləməyə başlayırıq. Bəlkə də əziyyət, sizlərə, azarkeşlərə qarşı olan fikirlərimizdi ki, Allah bizə belə zəfər qismət etdi. Qruplarda oynayırıq, pley-off mərhələsinə çıxırıq. Bir klubun ayaqda durması, stabil qalması üçün çox yaxşı nəticədi. Klub, futbolçular, biz hamımız belə böyüməliyik. Çətinliklər olmasa, işləməyə, yaşamağa nə var ki?

- Marko Veşoviç qırmızı vərəqə ilə cəzalandırıldı. Onun yoxluğunu necə kompensasya edəcəksiz?
- Vaxtımız var hələ. O müddətdə kimi bilmirik heyətdə durum necə olacaq, rəqib kim düşəcək, futbolçularımın ümumi hazırlığı hansı səviyyədə olacaq. Marko Veşoviç əvvəlki matçlarda zədəli olanda Mateusu, Toralı oynatmışıq. Ciddi problem görmürəm. Amma istəyirəm ki, həmişə belə futbolçular meydanda olsun. Veşoviç təcrübəlidi, əziyyət çəkənlərdəndi, məşqlərdə intizamı qoruyub-saxlayır. Onların belə böyük oyunlarda olmasını istəyirəm. Olmasa, digər variantlardan istifadə edəcəyik.

- Konfrans Liqasında pley-off mərhələsinə çıxdıqdan sonra aparıcı oyunçuları itirdiz. Bu mövsüm isə Avropa Liqasından pley-off mərhələsinə çıxdız. Bu, sizi narahat etmir ki, heyəti qoruyub-saxlaya bilməzsiz?
- Maraqlı sualdı. Bəli, belə uğurlar olanda, oyunçulara təkliflər olur. Böyük oyunlarda futbolçunun potensialını daha düzgün izləyə bilirlər. Bəzi oyunçularımızla maraqlananlar var. Biz daim istəmişik ki, oyunçularımızı qoruyub-saxlayaq. Amma bəzən bizdən asılı olmayan səbəblər olur, "yox" deyə bilmirik. Gedənlərdən sonra kollektivdə oyunçu azaldı. Amma klub olaraq biz başqa sahədə udduq. Avropa bazarına çıxdıq. "Qarabağ"la daha fərqli maraqlanmağa başladılar. Tək nəticələrə görə yox, klub olaraq, oyunçuların burada potensialının yaxşılaşması yönündə. Bəzən oyunçular gəlir, burda potensialını açırlar. Bu bazara çıxdıq. Amma bu gün də maraqlı, böyük təklif olsa, biz buna baxarıq. Başqa variantlara da əl atarıq. Hər bir halda, bu futbolçular bunu haqq ediblərsə, istəyərik ki, sona qədər bizimlə olsunlar. Minimum turnirin sonuna qədər. Lakin bu da bizim əlavə enerji itirməyimiz olacaq. Təklif olarsa, təbii ki. Deyə də bilmirik ki, olsun, ya olmasın. Təkliflər olarsa, dərindən düşünəcəyik.

- Marko Veşoviç qırmızı vərəqə almamışdan qabaq sanki onu əvəzləməyi düşünürdüz?
- Qırmızı almamışdan əvvəl, hə. Sarı alanda, dəyişməyi fikirləşdim. Çünki narahat oldum ki, ikinci sarı alar. Amma hakim imkan vermədi, qırmızı vərəqə göstərdi.

- Kadi Borgesin yenidən "Qarabağ"a qayıdışı baş tuta bilər?
- Bizim onunla heç bir danışığımız olmayıb. Buradan gedən futbolçuların hamısına demişik ki, "Qarabağ"ın qapısı üzünüzə həmişə açıqdı. Deyim ki, inşallah geri qayıdar, düz çıxmaz. O daha da böyümək üçün qarşısına məqsəd qoyub. "Qarabağ"da hər şey onun üçün yaxşı idi. Belə variant olsa, biz yox demərik. Amma hazırda müqaviləsi var, özü də böyük. Gələcək göstərər.

- Veşoviç qırmızı vərəqə aldıqdan sonra komanda müdafiədə oturdu. Bu, "Həkken"in təzyiqindən irəli gəlirdi?
- Müdafiədə olsaq da, yaxşı əks-hücumlarımız oldu. Rəqib bizi məcbur etdi. Belə oyunlarda, belə halların olması məni sevindirir. Son vaxtlarda futbolçularda elə fikirlər oyanıb ki, daha çox hücumda oynamalıyıq. Amma tələblərimiz odu ki, hücumda ola-ola müdafiə olunaq. Bu səviyyədə oyunalrda, azlıqda qalanda, futbolçu düzgün müdafiə olunursa, bu, böyük futbolun vacib hissələrindəndi. Qarşımızda elə rəqib yoxdur ki, 90 dəqiqə hücumda olaq. Nəticə üçün çox önəmli amillərdəndi.

- Musa Qurbanlı da yəqin ki, çox sevinir. Sizcə, o, təəssüf hissi keçirir ki, "Qarabağ"da qalardı, bu sevinci birlikdə bölüşərdi sizinlə?
- Musa bir az fərqli xarakterli futbolçudu, insandı. O, legioner həyatını daha çox sevir. Məqsədi var ki, daim xaricdə olsun. Fərqi yoxdu, hansı liqadı, ən azından orta liqa. Onu bu gün bu qane edir. İnanmıram ki, heyfslənsin. Əksinə, çox sevinir, mənim və "Qarabağ"ın uğuruna. Belə fikir onda olsa, irəli gedə bilməz. Sanki onun üçün hər şey bitəcək. Məqsədlərinin qarşısını kəsmiş olar.

- Qurban Qurbanov olmasaydı, Azərbaycan futbolu nə edərdi?
- Siz məni ağır yükün altına saldız. Çox sağolun belə dəyərə görə. Özüm haqda cavab verə bilməyəcəm. Mən futbolda və ya başqa sahədə olum, bu əgər ölkənin övladıyıqsa, işimizdə məsuliyyətli olmalıyıq. Başqa sahədə də olsaydım, yenə məsuliyyətli işləyəcəkdim.

- "Həkken"in heyətində elə futbolçu oldu ki, sizə maraqlı gəlsin?
- Bir neçə oyunçu oldu, amma adlarını deməyəcəm. Hətta ilk oyundan sonra oldu.

- Oyundan sonra Juninyo qələbə sevincini sizinlə bölüşdü. Bu sevgini necə qazanırsız?
- Biz bir ailəyik. Hər birini çox istəyirəm. İnsan get-gedə birini, keçmişini, hansı yollardan keçdiyini, necə böyüdüyünü bildikcə, istər-istəməz onlara daha həssas və sərt oluram. Çünki Juninyo tam fərqli xarakterlidi. Bərk idmançı xarakteri var. Bu, hələ onun tam potensialı deyil. Bəzi söhbətimiz olub onunla. Fərqli mentalitetdəydi, fərqli futbol oynayırdı. Çempion adı hər idmançı üçün çox vacibdi. O adı qazanmırsa, böyümür. Belə turnirlərdə, bu cür oyunlar oynayıb, mərhələ adlamırsa, futbolçu özünü böyük oyunçu saymır. Juninyo Portuqaliyada oynayıb, böyük klublarla qarşılaşıb. Amma buradakı məsuliyyət onda heç vaxt olmayıb. Ondan bunu həmişə tələb edirdim. Get-gedə məni daha yaxşı anlamağa başlayıb, futbola sevgisi artıb. Maraqlı söhbətlərimiz olur. Danışırıq, bəzən zarafat edirik. O da görür ki, biz çox məsuliyyətli klubuq. Bəlkə düşünmədiyi futbol haqda burada fikirləri oyanıb. Yəqin mənə qarşı ona görə fərqlidi. Mən özüm də bərk futbolçuları xoşlayıram. Ondan hələ çox şey tələb edəcəyik.

- Sizin özünüzü nə motivasiya edir?
- Bəzən hər bir sahədə düstur axtarırsan ki, onu nə cür yaxşılaşdıra bilərsən. Ən düzü sadəsini axtarıb tapmaqdır. Dəfələrlə demişəm ki, mənim özümün tələbim odur ki, nə olursa-olsun işimdə məsuliyyətli olmalıyam. Biz bu vətənin övladlarıyıqsa, işimizdə məsuliyyətli olacağıqsa, nəticə gələcək. Bunu düşünərək işə gedirəm, oyunlara çıxıram, futbolçularımdan tələb edirəm, oyunlara hazırlayıram. Bu yolu tutmuşam və onu düşünərək addım atıram.

- Xarici kluba gedə bilərsiz? Oyunçuları istəyirlərsə, sizi də istəyənlərin olması mümkündü...
- Bilmirəm. Nə vaxtsa, onsuz da olmayacağıq. Bilmirik sabah başımıza nə iş gələcək. Amma harasa getmək barədə bu gün düşünmürəm. "Qarabağ"a çox bağlı insanam. Nə qədər ki, bu klub var, nə qədər ki, Qarabağ adı var, çox istəyərəm burda qalım, nəticə əldə edim. Dəyişikliklər ən böyük klublarda belə, olub. Bəzən rəhbərlik klubu buraxır gedir, bəzən maddi olaraq səviyyə aşağı düşür. Hələ ki, "Qarabağ"dan getməyi düşünmürəm. Nəsə böyük bir şey olmasa, hələ ki, burdayam.

- Ardıcıl üçüncü dəfə pley-off mərhələsində oynayacaqsız. Bu dəfə yanaşma cəhətdən nə önəmli olacaq?
- Məncə, təcrübə böyük rol oynayacaq. Bu gün futbolçularımın təcrübəsi az deyil. "Bayer"lə oyun bizə futbolda çox şey verdi. O səviyyədə olan komandaların gücünü hiss etdik. Hansı rəqib olursa-olsun, ola bilər ki, rəqibi daha çox analiz edək. Yanvarda çempionatımız başlayacaq. Ola bilər ki, hazırlığımızda da bəzi dəyişikliklər edək ki, o vaxta pik nöqtəyə çıxaq. Rəqibdən çox şey asılıdı. Elə olur ki, nə qədər hazır olsaq da, rəqib bizi üstələyir. Az təcrübə toplamamışıq. Bu il bəzi oyunlarımız oldu ki, daha böyük matçlarda oynamaq üçün fürsət əldə etdik.

- Anton Krivotsyukla maraqlanmısız?
- Xeyr, danışığımız olmayıb.