"Qarabağ" bu gün doğma meydanda qrup mərhələsinin sonuncu və həlledici oyununu keçirəcək. Rəqib İsveç "Həkken"idi. Ağdamlılar ciddi itki ilə üzləşib. Belə ki, müdafiənin əsas dayağı, sabit oyunla seçilən Kevin Medina üçün 2023-cü il bitib.

Bəs Qurban Qurbanov srağagün Finlandiyada əməliyyat olunan kolumbiyalının boşluğunu necə dolduracaq? Düzdü, bu mövsüm Bəhlul Mustafazadə özünü yaxşı tərəfdən göstərməyi bacarıb və Medina ilə yaxşı tandem təşkil edirdi. İndi yığma üzvünün üzərinə daha çox təzyiq düşəcək. Bəs Qurban Qurbanov müdadiənin mərkəzinə Bəhlulla kimin duet etməsinə şərait yaradacaq?

1. Bədavi Hüseynov
İlk növbədə ağla Bədavi gəlir. Amma "55 nömrə" hazırda əvvəlki formasından çox uzaqdı. Yaş və zədələr də sözünü deyir. Təbii ki, müdafiəçi yetərincə təcrübəlidi. Amma çempionat oyunlarında belə 90 dəqiqə oynamaq gücündə deyil. Qısası, Bədavinin müdafiənin mərkəzinda şans qazanması gözənilsə də, risklidi.

2. Maksim Medvedev
Kapitan karyerasının sonlarını yaşayır. O da bir müddət zədə üzündən sıradan çıxmışdı. Artıq yaşının çoxluğu da 90 dəqiqə meydanda olmasına imkan vermir. Fiziki cəhətdən çatdırmamaqla yanaşı, səhvləriylə də diqqəti çəkir. Kapitanın "Bayer-04" ilə Bakıdakı görüşdə penaltiyə səbəbkar olmasını unutmamışıq. Maksın doğma mövqeyi müdafiənin sağ cinahı olsa da, mərkəzdə də oynaya bilir. Həm Ağdam təmsilçisində, həm də yığmada onu son müdafiəçi kimi görmüşük. Amma dediyim kimi, səhv və fiziki cəhətdən çatdırmamaq riski böyükdü.

3. Rahil Məmmədov
Futbolçu ötən mövsüm zədələrə görə az şans qazansa da, bu mövsüm müntəzəm oynayır. Mərkəz müdaçisi olsa da, bəzən sağ cinahda da yer alır. Həm bunları, həm də ucaboy olduğunu nəzərə alsaq, Rahilin İsveç təmsilçisinə qarşı start heyətində yer alması daha məntiqli olardı. Söz yox, o da aqressiv oynayan müdafiəçidi və ciddi qayda pozuntularına görə sarı, qırmızı vərəqə ala bilər. Amma ən azı Maksimlə Bədavidən bir qədər yaxşı formadadı və 90 dəqiqə döyüşməyə qadirdi. Hesab edirəm ki, Rahil - Bəhlul tandemi "Həkken"lə oyunda ümidləri doğruldacaq.

4. Bu üç müdafiəçiə ehtiyac duyulmasa, Julio Romaonu məcburiyyətdən mərkəz müdafiçisi kimi oynatmaq olar. Zatən “sambaçı” dayaq yarımmüdafiçisi kimi orta sahədə “qara iş”i üzərinə götürməklə yanaşı, müdafiənin də köməyinə tez-tez gəlir, hətta müdafəçi kimi çıxış etdiyini də görmüşük.
Təbii ki, biz ancaq mülahizələrimizi bölüşə bilərik. Doğrusunu isə Qurban bəy bilir. Bizə bu oyunda qələbə lazımdı. Baş məşqçi onu qazanmağın yolunu daha yaxşı bilir.

ABDULLA İSMAYILOĞLU