İlk iki oyunda iki qələbə.

Tarixi startdı. Azərbaycan klubu ilk dəfə avrokuboklarda belə nəticə əldə edə bilir. Təbii ki, bunu ardıcıl 10 il qrup mərhələsinə vəsiqə qazanan “Qarabağ” edə bilərdi, etdi də. “Köhlən atlar”ın bu qrupda ardıcıl iki görüşdə qələbə qazanması bizə nədən xəbər verir? Bu, yazıda “Qarabağ”ın uğurunun üç səbəbini diqqətinizə çatdıracağıq.

“Rakuv”a məğlubiyyət
Ağdam təmsilçisi hər mövsüm olduğu kimi bu il də Çempionlar Liqasının qrup mərhələsinə vəsiqə qazanmaq istəyirdi. Lakin “köhlən atlar” turnirin 2-ci təsnifat mərhələsində “Rakuv” səddinə ilişərək mübarizəni dayandırdı. Əslində polşalılar “Qarabağ”dan güclü deyildi. Adı çəkilən komandanın Avropa Liqasının qrup mərhələsindəki nəticələri də belə deməyə əsas verir. “Rakuv” D qrupunda 2 oyundan sonra qələbəyə həsrətdi. Polşalılar 0 xalla sonuncu pillədə qərarlaşıb.

Səfərdəki məğlubiyyətdən, Bakıdakı heç-heçədən sonra futbol ictimaiyyəti “Qarabağ”ı sərt şəkildə tənqid etdi. Qurban Qurbanov və klub rəhbərliyi bundan dərs çıxardı. Məhz bu tənqidlərdən sonra Mateus Silva və Andrey Lunyov kimi futbolçular transfer olundu. Onsuz da potensialı olan komanda daha da gücləndi.

Daha geniş heyətə malik olmaq
Əslində bu məqam sizə qəribə gələ bilər. Çünki həmin dəqiqə komandanın sırf hücumçusunun olmaması ağlınıza gəlir. Əslində “Qarabağ”ın indiki heyəti əvvəlki illərlə müqayisədə daha genişdi. Hər mövqedə iki-üç futbolçu var. Vəziyyət o qədər yaxşıdı ki, özünü yaxşı tərəfdən göstərə bilməyən Adama Diakabi iştirak ərizəsinə salınmayıb. Abbas Hüseynov ötən ildən, Marko Veşoviç isə mövsümün əvvəlindən zədəli olsa da, bu məqam “köhlən atlar”ın həm premyer-liqadakı, həm də avrokuboklardakı oyununa təsir etmir. Qurban Qurbanov əlindəki futbolçuların potensialından razıdı ki, əvvəlcə Qara Qarayevin, ardından Şahruddin Məhəmmədliyevin komandadan ayrılmasına icazə verdi. Zarafat deyil, “Qarabağ”ın üç qolkiperi var: Andrey Lunyov, Luka Quqeşaşvili və Amin Ramazanov. Qurban Qurbanov iki oyunçudan sol cinah müdafiəçisi kimi yararlanır. Söhbət Elvin Cəfərquliyevlə Toral Bayramovdan gedir. Müdafiənin mərkəzində Kevin Medina, Bədavi Hüseynov, Bəhlul Mustafazadə, Rahil Məmmədov və Maksim Medvedev kimi oyunçular yer ala bilir. Sağ cinahda isə Mateus Silva, Marko Veşoviç və Abbas Hüseynov var. Düzdü, bunlardan ikisi zədədən əziyyət çəkir. Amma Qurbanov tezliklə hər birindən istifadə edə biləcək. Dayaq yarımmüdafiəsində Julio Romao, Riçard Almeyda, Nihad Quliyev, mərkəzdə isə Marko Yankoviçlə Patrik Andrade oynayır. Abdulla Zubir və Hamidu Keyta sol cinah vingeri kimi çıxış edə bilir. Sağda isə Leandro Andrade ilə Nəriman Axunzadə oynayır. Hücumun mərkəzində Olavio Juninyo ilə Redon Cica çıxış edir. Yeganə problemli bölgə pleymeyker mövqeyidi. Burda Yassin Benzyadan başqa heç kim yoxdu. Lakin Qurbanov bəzən Patrik Andradeni, bəzən də elə Juninyonu burda oynadır. Təcrübəli mütəxəssisin əlində futbolçu çox olduğu üçün axsayan bölgələrdə rotasiya edə bilir. Məhz buna görə də hazırkı heyətin ən yaxşı olduğunu söyləyə bilirik.

Təqvimin “Qarabağ”a uyğun olması
Bununla bağlı qrup mərhələsinin oyunları başlamamış geniş yazmışdıq. Əvvəlki illərdə ilk görüşlərdə güclü rəqiblərlə qarşılaşırdıq. “Köhlən atlar” 2, 3 və 4-cü matçlarda çox güc sərf edirdi. Çempionatın da qışa doğru qızışması komandanın enerjisini alırdı. İndi isə təqvim “Qarabağ”ın xeyrinədi. Qurban Qurbanov anlayır ki, “Bayer-04” ilə oyunlarda maksimum 1 xal qazanmaq olacaq. Məhz buna görə də komandasını həmin rəqiblə görüşlərə tam kökləməyəcək. Təcrübəli mütəxəssis 5-ci turda “Molde” ilə səfər, 6-cı turda “Həkken”lə ev oyunlarında qələbələr qazanaraq mərhələ adlamağı düşünəcək.

Yekun: hazırda “Qarabağ”da hər şey qaydasındadı. Komandanın motivasiyası yüksəkdi, Qurbanovun sərəncamında yaxşı futbolçular var, təqvim də ağdamlıların ürəyi istədiyi kimidi. Bircə qalır plan üzrə hərəkət edərək pley-offa çıxmaq, tarix yazmaq!

İLKİN SULTANLI