Azər Həşimov çempionluq mübarizəsinin sonadək davam edəcəyini düşünür
1-ci liqada 10-cu tura yekun vuruldu. Çempionluğa real namizədlərdən sayılan “Qaradağ Lökbatan” “Mingəçevir”i qəbul etdi.
Meydan sahibləri ikinci yarıda 3 qol vuraraq böyükhesablı qələbə qazandı – 3:0. Matçdan sonra bakılıların çalışdırıcısı Azər Həşimovla söhbətləşdik. O, əvvəlcə oyunla bağlı fikirlərini bölüşdü: “Gərgin və maraqlı qarşılaşma izlədik. İlk yarıda bir neçə qol şansımız olsa da, bunlardan yararlana bilmədik. Lakin futbolçularım ikinci yarıda ələ düşən fürsətləri layiqincə dəyərləndirdi və böyükhesablı qələbə qazandıq”.
Mütəxəssis komandanın çempionluq şansını da dəyərləndirdi:
“Əlimizdən gələnin ən yaxşısını edəcəyik. Çalışacağıq ki, premyer-liqaya vəsiqə qazanaq. Hazırda 1-ci liqada gərgin mübarizə gedir. Demək olar ki, bütün komandalar iddialıdı. MOİK, “Şamaxı”, “İmişli” “Karvan” bu yolda əsas rəqiblərimizdi. Hər biri çempionluq üçün “döyüşür”. Qızıl medallar uğrunda mübarizə sonadək davam edəcək. Uzun marafondu. Bütün matçlara fərqli hazırlaşırıq. İstədiyimiz mövqedə olmaq üçün sonadək mübarizə aparacağıq”.
Həşimov gənclərdən döyüşkən kollektiv formalaşdırmasından da danışdı:
“Futbolçu olduğum dövrlərdə özüm də döyüşkən olmuşam. Oyunçu meydana girirsə, yaşdan asılı olmayaraq, sonadək mübarizə aparmalı, heç kimin ad-sanından çəkinməməlidi. İstər 17 yaşı olsun, istər 24. Əzmkarlığımı futbolçularıma aşılamağa çalışıram”.
İSMAYIL XEYRULLAYEV
Digər xəbərlər
