Premyer-liqa yavaş-yavaş qış fasiləsinə yaxınlaşır. Artıq 15 tur arxada qalıb. Turlar bir-birini əvəz etdikcə maraqlı olayların və məqamların da sayı artır. Bu çempionatı maraqlı edən adamlardan biri və bəlkə də birincisi Murad Musayevdi.

"Football-plus.az" xəbər verir ki, "Sabah"ın baş məşqçisi tez-tez diqqət mərkəzinə düşür. Rusiyalı mütəxəssis ilk 15 turun altısında hakimlərin qəzəbinə tuş gəlib. Elə ötən mövsüm də Murad Oleqoviç tez-tez hakimlərlərlə qarşıdurma yaşamış, bir neçə dəfə qırmızı vərəqə görməklə vaxtından əvvəl paltardəyişmə otağına yollanmış, növbəti turlarda komandasının oyununu tribunadan izləmək məcburiyyətində qalmışdı. Gəlin, bu mövsüm onun qırmızı və sarı ilə “mükafatlandırıldığı” turlara, belə cəzanın səbəblərinə və hansı referinin "hökm verdiyinə” baxaq:

2-ci tur. "Sumqayıt" - "Sabah" 1:0
Baş hakim Rəşad Əhmədov idarə etdiyi matçda Murad Musayevə 90+4-cü dəqiqədə ardıcıl iki “sarı” göstərməklə qovdu. Hər iki vərəqənin motivi “hakimin qərarına etiraz” idi.

3-cü tur. "Sabah" - "Neftçi" 1:1
Əliyar Ağayevin söz sahibi olduğu görüşün 89-cu dəqiqəsində Murad Musayev oyunun bərpasını ləngitdiyinə görə birbaşa qırmızı ilə ehtiyyat oyunçular skamyasından uzaqlaşdırıldı.

5-ci tur. "Sabah" - "Turan Tovuz" 0:3
Ardıcıl iki turda qırmızı vərəqə ilə cəzalandırılan Murad Musayevin əsəbləri soyumadı. 4-cü turda postunu Artur Oleninə “tapşırdı”, amma 5-ci turda – tovuzlularla oyunda yenə yerində idi. Rauf Cabbarov onun şıltaqlıqlarına fasiləyə qədər dözdü, komandalar paltardəyişmə otağına yollananda sarı vərəqə ilə cəzalandırdı.

7-ci tur. "Sabah" - "Kəpəz" 2:2
İnqilan Məmmədovun idarə etdiyini oyunun 83-cü dəqiqəsində rusiyalı mütəxəssis hakimə etiraz etdiyinə görə sarı ilə “mükafatlandırıldı”.

10-cu tur. "Sabah" - "Sumqayıt" 3:1
Bu adam komandası udanda da eyni cürdü, uduzanda da. Nicat İsmayıllının idarə etdiyi matçın 78-ci dəqiqəsində referiyə müxaliflik etdiyinə görə “sarı”nı gördü.

15-ci tur. "Kəpəz" - "Sabah" 0:2
Rauf Cabbarovun idarə etdiyi qarşılaşmanın 37-ci dəqiqəsində “tələbələr”in baş məşqçisi ədalət təmsilçisinə etiraza görə hesabına daha bir “sarı” əlavə etdi.

Göründüyü kimi Murad Oleqoviçin ulduzu hakimlərlə heç cür barışmır. Demirəm ki, problem ancaq rusiyalı mütəxəssisin davranışı ilə bağlıdı. Söz yox ki, elita qarşılaşmalarından tutmuş 2-ci liqa matçlarına qədər hakim idarəçiliyi ilə bağlı böyük problemlər var. Həmçinin "Sabah"ın baş məşqçisinin Rusiyadakı karyerasında bu qədər cəzaya məruz qalmaması da azərbaycanlı referiləri qınamasına müəyyən qədər haqq qazandırır. Ancaq cari mövsümdə azərbaycanlı məşqçilərin əksəri də idarəçiliyə etiraz edib. Düzdü, bu məqam Murad hocanın dozanı aşan çılğınlığına haqq verimir. Yəni meydanda hakimlərə təzyiq, söyüş yağdırmaq əvəzinə qanuni prosedurlara baş vursa, daha yaxşı olar. Yoxsa qarşıda hələ 21 tur + kubok matçları var. Bu xarakterlə hər iki turdan bir cəzəlandırılacaq, “Sabah”a maddi və mənəvi ziyan vuracaq. İndiki məqamda yel dəyirmanına qarşı vuruşan Don Kixot obrazı sizə lazımdımı, Murad Oleqoviç?

ABDULLA İSMAYILOĞLU