Srağagün minifutbol üzrə ölkə çempionatında yeni mövsümə start verilib. Əfran İsmayılovun veteran futbolçulardan qurduğu “İnter” ilk oyunda "Sumqayıt"ı 4:2 hesabıyla məğlub edib. Rauf Əliyev dubl edib, Əfran İsmayılovla Rahid Əmirquliyev hərəyə bir qol vurub.

Kapitan Əfran İsmayılov “Football-plus.az”a blits-müsahibə verdi.

- “Sumqayıt” üzərində qələbə ilə bağlı təəssüratınız necədi?
- İlk oyun həmişə ağır olur. Hər idman növündə - basketbolda da, voleybolda da, minifutbolda da belədi. Həm də biz minifutbolu çox oynamamışıq. Doğrudu, öz aramızda oynayırdıq, amma onu bu oyunla eyniləşdirmək düz deyil. Burda təkbətək mübarizələr, çoxlu driblinq, taktika. Amma fikirləşirəm ki, 4-5 tur ötəndən sonra öz oyun tempimizi tutacayıq, daha yaxşı futbol sərgiləyəcəyik.

- “İnter” çempionluq kubokunu qazana bilər?
- İndidən çempionluq haqda fikirləşmək üçün tezdi. Çünki marafon uzundu. Biz çalışırıq ki, birinci il olmasına baxmayaraq, hansısa yer tutaq. Bunun üçün əlimizdən gələni edirik. İstəyirik ki, Azərbaycanı Çempionlar Liqasında və ya UEFA kubokunda təmsil edə bilək.

- Rəqiblər haqda nə deyə bilərsiz?
- Rəqiblərimiz bizdən daha təcrübəlidi. Çünki bu çempionat yaranandan orda iştirak edirlər. Düzdü, biz böyük futbol oynamış oyunçularıq. İlk il üçün ən azı müəyyən bir yer tutmağı hədəfləmişik.

- Bu çempionatdakı rəqabəti necə dəyərləndirirsiz?
- Həqiqətən də, çox güclü rəqabət var. Bilirik ki, bizə qarşı tambaşqa cür hazırlaşırlar. Fikirləşirlər ki, qarşılarındakı milli komandanın oyunçularıdı. Buna görə də bizimlə oyunlara 5 dəfə artıq hazırlaşırlar. Biz də hər oyunumuzun gərgin keçəcəyini düşünürük. Bu səbəbdən də bütün oyunlara ciddi hazırlaşırıq.

- Sabiq futbolçu yoldaşlarınızdan bir çoxunu gördük. Cavid Hüseynov, Rauf Əliyev, Elvin Məmmədov, Rahid Əmirquliyev... Amma Mahir Şükürov qəzetimizə açıqlamasında təklif olunan məvaciblə “İnter”də oynamağa razı olmadığını bildirib...
- Klubun bəlli bir büdcəsi var. Mahir Şükürov təklif etdiyimiz məbləğlə razılaşmadığından, işbirliyimiz alınmadı. Şərtlərimizlə razılaşanlar yanımızdadı. Olmayanlarla da heç bir problemimiz yoxdu.

MİRKAMAL KAZIMZADƏ