Azğınlaşma, cılızlaşma, savadsızlıq və təcrübəsizlik....
Ölkə futbolunda cari mövsüm maraqlı davam edir.
Çempionatların sayının artırılması fonunda başverənlər də diqqətdən yayınmır. Kubok matçlarına start verildiyini də bilirsiz. İştirakçı klublardan bəzilərinin peşəkar olmaması üzündən problemləri böyütmək istəmirik. Hər halda, inkişaf üçün addım atılırsa, bir müddət sonra müsbət yöndə dəyişikliklərin olacağı vəd edilirsə, səbirli olmağa dəyər. Lakin elə hallar da var ki, bunları ört-basdır etməyi peşə etikamıza yaraşdırmırıq. Daha dəqiq desək, bir dəfə baş verən hadisəni anlayışla qarşılamaq olarsa, ardıcıllıq qeydə alınanda mənzərə dəyişir. Bu dəfə oyun epizodlarını düzgün dəyərləndirməməklə yanaşı, həm özünə, həm də rəqib komandanın futbolçusuna zərər verən oyunçulardan bəhs edəcəyik. Onlardan birincisi “Turan Tovuz”un üzvü Faiq Hacıyevdi. Müdafiəçi Misli premyer-liqasının 12-ci turunun “Səbail”lə matçında Bayıl təmsilçisinin kapitanı Ağabala Ramazanovun ciddi zədələnməsinə səbəb oldu. Futbolçunun hazırda Bilgəhdə yerləşən sanatoriyada müalicə olunduğunu yazmışdıq. İkincisi isə “Lerik”in oyunçusu Rahid Ağazadədi. O, ölkə kubokunun 2-ci təsnifat mərhələsinin matçında “Sumqayıt”ın legioneri Kristian Velinovskinin ayağını sındırdı. Zədələnən futbolçu artıq əməliyyat olunub və 4 həftə sonra əl ağacı olmadan yeriyə biləcək. Məşqlərə başlaması üçün isə 3-4 ay vaxt lazımdı. Epizodun videoyazısını izləyənlər yəqin Rahidin rəqibə necə xuliqancasına hücum çəkdiyini görüb.
Düzdü, “Səbail” və “Sumqayıt” günahkar futbolçulardan şikayətçi deyil. Lakin bu onların qəbahətli olmadığı anlamına gəlmir. “Futbol+” olaraq, həmin şəxslərlə əlaqə saxlayıb, hadisənin necə baş verdiyini, o anda özlərini necə hiss etdiklərini öyrənmək istədik. Təəssüf ki, nə Faiq, nə də Rahid fikirlərini bölüşmək istədi. Halbuki onlar azarkeşlərin könlünü almalı, özlərini ifadə etməliydilər. Ümid edirik ki, nə vaxtsa bu da olacaq. Başqa suallar da var: belə bədbəxt hallardan necə qaçmalı, ümumiyyətlə, bu yöndə hansı işlər görülməlidi ki, futbolçular daha məsuliyyətli olsunlar?
Suallarımızı təcrübəli mütəxəssis Yunis Hüseynova ünvanladıq. O, əsas məsələnin təcrübəsizliklə bağlı olduğunu dedi:
“Hər iki epizod yadımdadı. Xüsusilə Ağabalanın başına gələn gözlərimin önündən getmir. Mənə elə gəlir ki, futbolçuların çoxunun gənc və təcrübəsiz olması belə hadisələrin önünü açır. “Səbail” – “Turan Tovuz” matçında Ağabala topa çox yaxın idi. Faiq peşəkar futbolçu kimi bilməliydi ki, həmin epizodda oyuna müdaxilə etməməlidi. Onun təcrübəsizliyi üzündən “Səbail”in kapitanı bir neçə ay meydanlardan uzaq qalacaq. “Lerik” – “Sumqayıt” oyunu da gərgin keçdi. Əslində Rahid istəkli futbolçudu. Düşünürəm ki, daha yaxşı klublarda oynaya bilmək üçün özünü irəli atır, canfəşanlıq edir. Bu, əlbəttə, yaxşı haldı. Lakin, istənilən istək təcrübə və savadla dəstəklənməlidi. Yoxsa belə hadisələrin yaşanması qaçılmaz olacaq. Ümumiyyətlə, bizim futbolumuzda cılızlaşma gedir. Bəziləri oyunun incəliklərini düzgün dəyərləndirmir. Əmin olun ki, sözün əsl mənasında peşəkar oyunçular belə epizodlarda fərqli davranır”.
Yunis bəy futbolçuların bu haqda danışmaq istəməməsinə də toxundu:
“Əlbəttə, açıqlama verməlidilər. Hansısa təcrübəli oyunçunun karyerasını təhlükəyə atmısansa, nəsə deməlisən. Çünki zədələnənlər peşəkardılar. Bu yerlərə min bir əziyyət çəkərək gəliblər. Azarkeş amilini də nəzərə alıb danışmaq, özünü ifadə etmək lazımdı. Jurnalistlə danışmaqdan imtina etmək etik deyil. Hər halda, tərəfdarlara məsələnin iç üzünü, həqiqəti və ya həmin epizodda nələr hiss etdiyini deməli, ən azı bu səhvə yol verə biləcək futbolçular üçün təcrübə mənbəyi olmalısan. Məncə, qaçası, gizlədiləsi heç nə yoxdu”.
Mütəxəssis səbəbkarların cəzalandırılmasının vacibliyini də vurğuladı:
“Bu işlərlə AFFA İntizam Komitəsi məşğul olur. Sözün düzü, nə qərar verəcəklərini bilmirəm. Lakin belə hadisələrə bais olanlara ən ağır cəza verilməlidi. Meydandasansa, qələbəni istədiyin qədər rəqibi oyunçunun sağlamlığını da düşünməlisən. Hər halda, savadsız müdaxilələr, ani qərarlar daha pis hadisələrlə nəticələnə bilər”.
KƏNAN BAHADIR
Digər xəbərlər
