"Yaxşı qurtardıq, amma bu dəfə də nəticə çıxarmasaq, qarşıdakı oyunlarda elə acı nəticə alacağıq ki, vurduğu zərbə ömürboyu yaddaşımızdan getməyəcək. Bədavini başa düşdük, Medina oyunu davam etdirə bilmədi. Toral dəyişikliyinə isə bu oyun, bu an üçün heç bir ehtiyac yox idi. 3 xal ovcumuzda ola-ola, topu rəqibə verib müdafiəyə çəkilməyin səhv addım olduğunu "Molde" 5 dəqiqəyə bizə sübut etdi. Dərhal Keyta dəyişikliyi, yenidən öz oyunumuza qayıdıb hücum planına keçməklə oyunu xilas edə bildik. Nə yaxşı ki, hakimin artırdığı 7 dəqiqə və Bəhlulun uşaq futbolundan hücumda oynamaq bacarığı var imiş..."

"Rəqib qalib gələ bilmir, özün uduzursan. Topu bilərəkdən rəqibə verib, müdafiəyə çəkilirsən. Müdafiən də bərbad. Bəhlulun qolu oyun haqda fikrimi dəyismir, möhkəmləndirir. Deməli, hücum etmək lazım idi".

"Pis oyun, yaxşı nəticə… Bu nə idi, a kişi!!! Öldük dirildik, öldük dirildik".

“Dostlar, qardaşlar, xanımlar və cənablar, "Qarabağ" qorxaq futbol oynamadı. "Qarabağ"a oymamaq imkan vermədilər sadəcə. Fiziki cəhətdən hazırlıqlı, yaş ortalamasına görə daha gənc olan "Molde" aqressiv futbolla bizimkilərə istədiyini etməyə imkan vermirdi. Əsas fiqurları "bağlayıb", pressinq edib, sürətli ötürmələrlə istədiklərini edirdilər. Romaonun yoxluğu, süni örtük və rəqibdən bu cür temp gözləməmək də səbəblər idi. Qolları niyə buraxdıq? Məcburi əvəzetmələrdən sonra oyun planı nisbətən pozulduğuna görə. Bəhlulun qolu təzyiqi müəyyən mənada artırmağımızın nəticəsi idisə, əsas səbəb "Molde"nin ikinci qolu vurandan sonra "oturması" idi. "Qarabağ" müdafiə futbolu oynamırdı, rəqib bizə hücuma çıxmağa imkan vermirdi. Təbriklər, "Qarabağ".

“Çox önəmli bir nəticə! Demək olar ki, “Qarabağ” Avropa Liqasının ploy-off mərhələsinə vəsiqəni 85-90 faiz təmin etdi. “Qarabağ”ı “Molde” səfərində “qapalı futbol” oynadığına görə qınayanlar zəhmət olmasa, “Fənər”lə “Beşiktaş”ın nəticələrinə baxsınlar. İkisi bu axşam toplam 25 qol buraxdı (ironiya ilə). Büdcələri də “Qarabağ”dan 10-15 dəfə çox. “Molde” Norvec çempionudu, öz aramızdı. Heyətində Yovetiç, Solbakken kimi adlar olan, ötən mövsüm Marselo, Xames Rodriges, Bakambu kimi dünya ulduzlarını cəlb edən “Olimpiakos” yaxşı tanıdığımız “Frayburq”dan 5 cavabsız qol yedi. Elə həmin “Beşiktaş” hər iki matçda Norvecin diqər təmsilçisi “Bude/Qlimt”ə Konfrans Liqasında məğlub oldu. Amma yox, sən demə, Azərbaycanı, bərbad durumda olan futbol sənayemizi təmsil edən bir klub qrup mərhələsində azı 13 xal yığmalıdı…”

"Bu oyunla, oyuna bu münasibətlə yaxşı qurtardılar".