“Beşiktaş” bu gün Konfrans Liqasının qrup mərhələsinin 5-ci turu çərçivəsində evdə “Brügge” ilə qarşılaşacaq.

“Football-plus.az” xəbər verir ki, Rza Çalımbayın təyinatından sonra keçirdiyi hər iki superliqa matçında qalib gələn İstanbul nəhəngi artıq qrupda ilk iki pillədən birini tutmaq şansını itirib. Yəni qrup mərhələsinin ardından “ağ-qaralar”ın builki avrokubok macərası başa çatacaq. Ümumilikdə Çalımbay “Beşiktaş”ın başında 5-ci avrokubok matçına çıxacaq. Onun ilk dönəmində, yəni 2005-ci ildə “Qartal” UEFA kubokunun təsnifatında və 1-ci mərhələsində uyğun olaraq “Vaduts” (səfərdə 1:0, evdə 5:1) və “Malmö”nü (səfərdə 0:1, evdə 4:1) mübarizədən kənarlaşdırmışdı. Sonradan Çalımbay qovulduğu üçün qrup mərhələsinin oyunlarında komandanın başında yer almamışdı. Təcrübəli mütəxəssis dünən keçirilən oyunöncəsi mətbuat konfransında açıqlamalar verib. Zədəlilərin çoxluğundan gileylənən Çalımbay rotasiyaya əl atacağına işarə vurub: “Kaş qrupda hədəfimiz belə tez bitməzdi. Pley-off şansımız qalsaydı, hər şey başqa cür olardı. Amma həm “Brügge”yə, həm də son turda “Luqano”ya qarşı oyunlarda camiə üçün, fanatlarımız üçün və nəhayət, əmsallar cədvəlində ölkəmizə xallar qazandırmaq üçün oynayacağıq. “Brügge” qrupun ən güclü komandasıdı. Amma yüksəlişimizi davam etdirmək istəyirik. 9-10 zədəli futbolçumuz var. Bu matçın ardından superliqada “Ankaragücü” və “Fənərbaxça”ya qarşı iki vacib oyunumuz var. Həmin oyunları da düşünmək məcburiyyətindəyəm. Ona görə də sabahkı (bugünkü – red.) oyuna fərqli heyətlə çıxmağımız mümkündü. Zədələr həqiqətən də bizi məhv edir. Əlimdə mərkəz və sol müdafiəçi qalmayıb. Başqa zədələr olmasın deyə, bəzi oyunçuları oynatmayacam. Amma hansı heyətlə oynamağımızdan asılı olmayaraq, matçı ən yaxşı şəkild başa vurmağa çalışacağıq. Əslində ümumi götürəndə heyətimiz normaldı. Komandada ab-hava da çox yaxşıdı. İşimizi çətinləşdirən yeganə məqam zədələrdi. Bu qədər çox zədəli oyunçu olmasının səbəbini araşdırmağa çalışdıq. 7-8 futbolçu eyni zədədən əziyyət çəkir. Bunlar bizdən öncə olan zədələrdi. Cenk Tosun da az öncə söylədi ki, həftədə 3 oyuna çıxmaq zədələrə səbəb olur. Əvvəlki klublarımın heç birində bu qədər çox zədəli futbolçunun olmasına rast gəlməmişdim. Heç kimi günahlandırmaq istəmirəm, amma bəzi oyunçular hədsiz yüklənməyə görə zədələniblər. “Altyapı”dan əsas komandaya iki oyunçu çağırmışam. Müdafiənin mərkəzində oynayan iki sağlam oyunçum qalıb. Nəcip Uysalla Kollini nəzərdə tuturam. Tərslikdən Nəcip də cəzalıdı. Umut Meraşı sol cinahda oynatmaq istəyirdim. Amma onun da adı avrokubokların iştirak ərizəsinə salınmayıb. Bəzi mövqelərdə oynatmağa oyunçu tapmıram. Zaynutdinov oynasa, yalnız qoruyucu maska ilə oynayacaq. Amarti onsuz da zədəli idi. Durumu yavaş-yavaş yaxşılaşırdı. Ona şans verməyi planlaşdırırdım. Amma bura gələrkən öyrəndim ki, yenə əzələsində ağrılar var. 2004-cü il təvəllüdlü Aytuğ Kömeçə şans verə bilərəm. Düzdü, birdən-birə belə matçda oynaması gənc oyunçuya çətinlik yarada bilər. İnşallah, əlinə düşən bu şansdan yaxşı yararlanacaq”.