Azərbaycan futbolunun unikallığı ilə seçildiyini bilirdik. Amma bu qədər gözləmirdik. Bilirsiz ki, ölkəmizdə Region Liqası da keçirilir. Burda kifayət qədər maraqlı və gərgin mübarizəyə şahidlik edirik.

Turnirin 2023/24 mövsümü daha da baxımlı olacaq. 40 komandanın mübarizə aparacağı çempionat noyabrın 25-də start götürəcək. Əvvəllər Region Liqasının qalibləri ümid edirdilər ki, AFFA İcraiyyə Komitəsinin qərarı ilə 1-ci diviziona vəsiqə qazanacaq. İndi isə sistem fərqlidi. Çempion komanda birbaşa 2-ci liqada iştirak hüququ əldə edəcək. Finalçı isə daha üst liqada 13-cü yeri tutanla pley-off oynayacaq. Bu səbəbdən də peşəkar futbola can atan şəxslər həvəskar liqada özlərinə yoxlayaraq şans əldə etmək istəyirlər.

Komandaların sayının çoxluğu bir sıra problemlərə səbəb olur. Uzun müddət idi çempionat start götürmürdü. Səbəb isə maraqlıdı. AFFA Region Liqasının bütün iştirakçılarını forma ilə təmin edir. Geyim dəstlərinin gəlib çıxmasında problem yaşanıb. Buna görə də çempionat gec start götürdü.

Daha bir problem isə oyunların yeri ilə bağlıdı. Region Liqasının rəsmi “feysbuk” səhifəsi Paytaxt və Şimal zonasının ilk turunun oyunlarının təqvimini açıqlayıb. Noyabrın 25-də 2 oyun keçiriləcək. Burdakı matçlarda hansısa problem yoxdu. Hər iki görüş fərqli məkanlarda baş tutacaq. Lakin ayın 26-dakı qarşılaşmalarla bağlı problem var. “Xanlıq” – “City Baku”, “İrəvan İK” – “Record Club”, “Ramana” – Mübariz” görüşləri “ASK Arena”nın 4-cü meydanında keçiriləcək. Düzdü, turnir həvəskar statusludu. Lakin bu qədər də olmaz. Bir gün ərzində eyni məkanda üç oyunun keçirilməsini ya futzalda, ya da minifutbolda görə bilərik.

Mənə maraqlıdı ki, AFFA bu qədər komandanın eyni stadionu seçməsinə niyə üçün icazə verib? Ümumiyyətlə, çempionatın Paytaxt və Şimal zonasında ümumilikdə 17 klubun iştirakına nə gərək var idi? Bu turnir Region Liqası adlanır. Daha çox bölgə klublarının inkişafına çalışılsa, yaxşı olmazdımı? Başa düşürəm ki, sayı çox göstərərək sözdə ölkə futbolunun inkişaf etdiyini göstərməyə çalışırsız. Yaxşı edirsiz, amma düz eləmirsiz. Onsuz da pis gündə olan “ASK Arena”nın 4-cü meydançası tezliklə dağılacaq. Qaş düzəltmək istədiyiniz yerdə göz çıxaracaqsız. Normal yarışlarda gün ərzində bir stadionda ən pis halda 2 oyun keçirirlər. O da məcburiyyətdən. AFFA rəhbərliyi və Region Liqasının təşkilatçıları özündən “Amerika kəşf edərək” bu sayı 3-ə çatdırıblar. Sanki “ASK Arena” “bezrazmerdi”.

İLKİN SULTANLI