"Bilindiyi kimi, təlim-məşq toplanışına 20 futbolçuyla başlamışdıq. Uzun müddət idi yarışa hazırlaşırdıq. Son anda böyük problemlər ortaya çıxdı. Pasport məsələləri alınmayan, hərbi xidmətə yollanan və zədələnən futbolçular oldu. 11 oyunçu bizimlə turnirə yollana bilmədi. Halbuki onlardan səkkizini ilk "11-lik" üçün nəzərdə tutmuşdum. Hər biri çox yaxşı hazırlıq keçmişdi. Sonradan başqalarını dəvət etməyə məcbur oldum. Oyunlarda müdafiə xəttimiz, demək olar ki, yox idi. Buna baxmayaraq, hücum futbolu oynadıq. Hər 3 matçda xeyli qol vəziyyəti yaratdıq. Təsəvvür edin ki, biz 7-8 yüzfaizlik şansdan yararlana bilmədiyimiz halda, rəqiblər ən kiçin ehtimalı belə dəyərləndirirdi. Bu da birbaşa oyunçuların ustalıq səviyyəsiylə bağlıdı. Əksəriyyəti Avropanın top-klublarında, futbolu inkişaf etmiş ölkələrin əsas liqalarında çıxış edir. Düzdü, yekun nəticə ürəkaçan olmadı. Hələ də özümə gələ bilmirəm. Çünki çox əziyyət çəkmişdik. Son anlarda aparıcı oyunçularımın heyətdən kənar qalması faciəyə gətirib çıxardı. Lakin komandamdan narazı olduğumu deməzdim. Kim istəsə, həmin matçları izləyə bilər. Rəqiblərdən üstün oyun sərgiləmişik. Maşallah, uşaqlar çox potensiallıdı. Hətta Niderlanda qarşı belə yaxşı çıxış etdik. Futbolçularımı günahlandıra bilmərəm. Onlar bacardığından daha artığını etdi. Günah varsa, mənimdi. Sadəcə, heyifsilənirəm. O qədər həvəslə, can-başla hazırlıq gördüyümüz oyunların nəticəsi belə olmamalıydı. Özü də futbolçu qıtlığının olduğu zamanda... Seçim şansımız çox məhduddu. Əsas heyətdən bir oyunçunun olmaması belə bizə çox baha başa gəlir".