“Artıq əskiklərimizin sayı 10 futbolçunu keçib” – U-19 Lüksemburq səfəri ərəfəsində
Noyabrın 15-21-i aralığında Lüksemburqda keçiriləcək Avropa çempionatının seçmə mərhələsinə qatılacaq U-19 ciddi problemlə qarşılaşıb.
Belə ki, yığmanın üç üzvü - Raul Hacıyev, Əsəd Əsədli və Nihat Mehrəliyev heyətdən kənarda qalıb. Buna səbəb AFFA-nın sənəd məsələsini həll edə bilməməsidi. Onsuz da bu yaş kateqoriyasından olan yığmamızın durumu yaxşı deyildi. Çünki 5 oyunçu hərbi xidmətə yollanıb, həmçinin də zədəlilər var. Üstəlik bu hadisə vəziyyəti daha da çətinləşdirdi. Görəsən, yığmanın baş məşqçisi Aqil Nəbiyev problemin həllini tapa biləcəkmi? Bu sualı gənc mütəxəssisin özünə ünvanladıq:
"Bəli, hazırkı durum ürəkaçan deyil. Artıq əskiklərimizin sayı 10 futbolçunu keçib. Sənəd məsələsinə görə bizlə turnirə getməyəcək futbolçuların yerinə yenilərini çağırmışıq. Çətin durumdu, ancaq uşaqlara güvənirəm. Seçmə mərhələdəki oyunlarımız barədə də indidən nəsə demək tezdi".
Qeyd edək ki, qitə birinciliyinə sənəd məsələsinə görə getməyən müdafiəçi Raul Hacıyev hazırda Gürcüstan "Rustavi"sinin şərəfini qoruyur. Yarımmüdafiəçi Əsəd Əsədli Rusiya "Krasnodar"ından gəlib və hazırda "Turan Tovuz"un düşərgəsində yer alıb. Digər orta xətt futbolçusu Nihat Mehrəliyev isə Ukraynada anadan olub və "Qarabağ"a cəlb olunub.
CAVİD ƏLİYEV
Digər xəbərlər
