Mövsümün əvvəlində kimsə desəydi ki, 12 turdan sonra “Zirə” turnir cədvəlinə başçılıq edəcək, buna heç kim inanmazdı.

Rəşad Sadıqovun komandasını ən yaxşı halda 4-cü pillədə təxmin etmək olardı. Lakin sensasiya baş verdi və indi premyer-liqanın lideridi.

Bir çoxları bu durumdan narazıdı. Bəziləri iddia edir ki, “qartallar” hədsiz baxımsız oyun sərgiləyir. Hətta hakimlərin qəsəbə təmsilçisinə kömək etdiyini iddia edənlər də var. Heç cür anlaya bilmirəm ki, nə baş verir? “Zirə”nin lider olmasının nəyi pisdi? Və burda nə qəribəlik var? Bəli, haqlı yanaşmadı ki, “qartallar” baxımlı oyun göstərmir. Buna görə klub rəhbərliyini qınamaq lazımdı ki, niyə potensialı zəif olan futbolçular transfer edilib. Və yaxud da Rəşad Sadıqovu tənqid etmək lazımdı ki, hücumdakı problemləri həll edə bilmir. Bunlar normal və haqlı iradlardı. Amma “Zirə”nin lider olması qəsəbə təmsilçisinin problemi deyil. Adamlar çatışmazlıqlara rəğmən, turnir cədvəlinə başçılıq edir. Onsuz da hamı bilir ki, “Zirə” bu heyətlə çempionluğa layiq deyil. Çox güman, bunu Rəşad Sadıqov da anlayır. Çünki hər dəfə komandadakı problemləri ictimaiyyətə açıqlayır. Yəni “qartallar” özü də anlayır ki, çempionluq onlarlıq deyil. Amma premyer-liqada yaranan qeyri-adi durumdan çox əla şəkildə yararlanırlar. Bu, indi “Zirə”nin problemidi? Biz “Qarabağ”ın yaxasından yapışmalıyıq ki, niyə 12 tur ərzində 3 dəfə məğlub olub, 2 dəfə heç-heçə edib. “Neftçi” rəhbərliyini, baş məşqçisini asıb-kəsməliyik. Çünki yayda, demək olar ki, Adrian Mutu üçün yeni komanda quruldu, ürəyi istəyən futbolçular transfer olundu. Amma “ağ-qaralar” 12 həftə ərzində 5 qələbə qazanıb, 3 heç-heçə edib, 4 dəfə uduzub. Konfrans Liqasının 2-ci mərhələsində “Partizan”ı bir oyunda məğlub etdiyi üçün adına dastanlar yazılan Murad Musayevi dar ağacından asmalıyıq. Soruşmalıyıq ki, nə üçün “Sabah” bu gündədi. Niyə Coy-Lens Mikelsi və Aleksey Kaşuku əvəz edəcək futbolçu tapa bilməyib. Masazır təmsilçisinin rəhbərliyini qınamalıyıq ki, nə üçün adı çəkilən oyunçuları Masazırda saxlaya bilmədi.

“Qəbələ” haqda, ümumiyyətlə, danışmaq lazım deyil. Ölkə kubokunun son qalibi indi turnir cədvəlinin zirzəmisindədi. Can üstədilər ki, premyer-liqada qala bilsinlər. Mütəxəssis komandanı bu durumdan çıxara bilmir. Fariz Nəcəfovdan haqq-hesab tələb etməliyik ki, titul qazanan kollektivi niyə qoruya bilmədi.

Şahin Diniyevin rəhbərlik etdiyi “Səbail”i tənqid etməliyik. Çünki rəhbərlik təcrübəli mütəxəssis üçün əla komanda formalaşdırıb. Amma “Zirə”nin bacardığını edə bilməyərək lider ola bilmir. Açığı, yuxarıda sadaladığım komandalardan hazırda ən yaxşı durumda olan elə “Səbail”di. Birdən-birə “hop” eləmək istəmirlər. Amma “Zirə” digər rəqiblərin pis vəziyyətindən yararlana bilirsə, “dənizçilər” açıq dənizdə lövbər salmalıydılar.
Hə, indi deyin görək, “Zirə”ni tənqid etməyə, asıb-kəsməyə haqqımız çatır? Bu qədər başqa problemlər varkən mövzu təkcə niyə “qartallar” olur? Onsuz da özləri də bilirlər ki, çempionat ola bilməyəcəklər. Ən yaxşı halda 3-cü kimi Konfrans Liqasına vəsiqə qazanacaqlar. Məhz bu yolda əmin addımlarla irəlilədiyinə görə “Zirə”ni tənqid edirik?

İLKİN SULTANLI