Ölkə çempionatının 1-ci liqasında 7-ci tura yekun vuruldu.

"Football-plus.az" xəbər verir ki, turun ilk matçında "Şamaxı" "Difai Ağsu"nu qəbul etdi. Qonaqların işinin çox çətin olacağını vurğulamışdıq. Nəticə bizi yanıltmadı. Vüqar Əsgərlinin komandası ilk yarıda vurduğu 2 cavabsız qolla görüşün taleyini həll etdi. İkinci yarı gərgin mübarizə şəraitində keçsə də, hesab dəyişmədi. Beləliklə, oyun "şirlər" üçün düşərli oldu. "Şamaxı" 3 xala yiyələnməklə çempionluq uğrunda mübarizədə iddiasını qorudu. Ağsuluların isə qələbə həsrəti bu dəfə də sona çatmadı. "Difai Ağsu" 1 xalla autsayder mövqeyində qərarlaşıb. Hələ ki ciddi islahatlar dalğası, Paşa Əliyevin Elgiz Kərəmli ilə əvəzlənməsi də işə yaramır.

"Mingəçevir" də cari mövsümün uğursuzlarındandı. "Nur şəhəri"nin təmsilçisi son iki matçda qol vurmayıb. Bununla yanaşı, evdə belə “İrəvan”a "dişin göstərə" bilmədi. Nəticədə qonaqlar səfər matçından 2 qol və 3 xal ilə döndü. Görünür, Nazim Süleymanov çətin günlərdən keçən komandanı tezliklə toparlayıb yenidən yuxarı pillələr uğrunda mübarizəyə atılmaq istəyir. Buna nə dərəcədə nail olacağını qarşıdakı turlarda görəcəyik. Onun budəfəki rəqibi, yəni Samir Məmmədov isə işə daha ciddi yanaşmalı, xüsusilə hücum epizodlarındakı kəsərsizliyi aradan qaldırmalıdı. Belə davam etsə, ortabab komandalar sırasında olmaq belə xəyala çevriləcək.

Üçüncü oyunda "İmişli" "Zaqatala"nı "doğma divarlar" arasında darmadağın etdi - 4:0. Xəzər Mahmudovun dubl etdiyi matçda üstünlük başdan sona qədər ev sahiblərində oldu. Düzdü, Əsgər Abdullayevin yetirmələrini evdə məğlub etmək çətindi. Lakin, bu Rüstəm Məmmədovun komandasına haqq qazandırmır. Turnir cədvəlinin sonuncu pillələrindən yaxa qurtarmaq üçün daha ciddi işlər görülməlidi. Geniş heyətə malik olmayan "Zaqatala"ya yeni nəfəs lazımdı.

Dördüncü qarşılaşmada "Araz Saatlı" "Karvan"la üz-üzə gəldi. Ev sahiblərinin yaxşı durumda olmadığını bilirik. Onlar müəyyən maliyyə sıxıntısı və futbolçu çatışmazlığı fonunda yola davam edir. Bu üzdən komandanın 1-ci liqanın qapazaltılarından olduğunu desək, yanılmarıq. Hər halda, "Araz Saatlı" 7 tur ərzində ciddi uğurla yadda qalmayıb. Odu ki, bu dəfə də 1:5 hesablı darmadağın növbəti biabırçı nəticə kimi tarixə düşdü. Yeni baş məşqçi Rüfət Quliyev tezliklə çıxış yolu tapmalıdı. Yevlaxlılar isə rahat görünür. 6-cı sırada qərarlaşan komanda xal baxımından liderlər qrupundan çox uzaq düşməyib.

Turun həlledici oyunu ən sonda keçirildi. Maraqla gözlənilən matç liderin dəyişməsinə səbəb ola bilərdi. Bunun üçün “Qaradağ Lökbatan” MOİK-i məğlub etməliydi. Amma tərəflər sonda 1:1 hesablı "sülh"ə razılaşdı. Beləliklə, MOİK xal itirsə də, zirvəni əldən vermədi.

KƏNAN BAHADIR