"Kəpəz"in baş məşqçisi Azər Məmmədovun istefa verdiyini bilirsiz. Onunla əlaqə saxlayıb azarkeşləri maraqlandıran suallara cavab aradıq.

Mütəxəssisin "football-plus.az"a müsahibəsini təqdim edirik...

- İlk dəfə premyer-liqada baş məşqçi kimi çalışdız. Təəssüf ki, komanda 12 turdan sonra turnir cədvəlinin sonuncusudu. Niyə alınmadı?
- Alınmadığını deməzdim. "Kəpəz" azarkeşlərinin tələbləri böyükdü. Hamıya bəllidi ki, mövcud şəraitlə ancaq premyer-liqada qalmaq üçün mübarizə aparmaq olar. Bunun üçün də gec deyildi. Daha çox möhlət verilsə, bacara bilərdik. Plan 2-ci dövrədə heç olmasa 9-cu pilləyə yüksəlmək, qalan oyunlarda xal ehtiyatını artırmaq idi. Lakin, ağır təzyiq oldu. Buna tab gətirmək çətindi.

- Daha öncə açıqlamalarınızda qış fasiləsinə qədər bacarmayacağınızı anlasaz, gedəcəyini demişdiz. Qərarı tezləşdirmənizə səbəb nə oldu?
- Bəli, əslində fikrim elə idi. Çünki hədəfə nail olacağımıza inanırdım. Amma Qərb derbisində "Turan Tovuz"a 0:4 hesabıyla nəğlub olduğumuz gün getmək haqqında düşünməyə başladım. "Qarabağ"a ağır məğlubiyyət isə (1:7 - red.) qərarımı tezləşdirdi. İdarə Heyətinin sədri İlqar Nadiriyə dedim ki, vaxtı çatıb... Mənimlə razılaşmadı. Getməyimi istəmirdi. Uzun müzakirələrdən sonra onu inandıra bildim ki, istefa verməyim daha doğru addımdı.

- "Kəpəz"də baş məşqçi kimi özünüzü doğrultmağa nə mane oldu?
- Daha əvvəl premyer-liqada köməkçi məşqçi kimi təcrübəm olub. Baş məşqçinin işi daha çətin imiş. Həm fiziki, həm də psixoloji baxımdan çox güclü olmalısan. Uğursuz nəticələrdən və ağır təzyiqlərdən sonra həmin kriteriyaları qarşılamaq olduqca çətin olur. Məncə, "Kəpəz"in premyer-liqanı tərk etmək ehtimalı olmasa, daha çox vaxtım olacaqdı və yaxşı işlər görə biləcəkdim.

- İşsizlik dövrünə qədəm qoyduz. Bundan sonra özünüzü harda görürsünüz?
- Çox yorğunam. Hələ ki, istirahət edəcəm. Sözün düzü, 9 yaşından futbolun içindəyəm və başqa bir şey bacarmıram. Zamanı gələndə təklifləri dəyərləndirəcəm. Mənim üçün önəmli məsələ hansı şərtlər daxilində işləməkdi. Açığı, aşağı liqalarda çalışmaq fikrində deyiləm.

- Fikirlərinizi necə tamamlamaq istəyirsiz?
- Öncəliklə "Kəpəz"ə və yeni gələcək baş məşqçiyə uğurlar arzu edirəm. İnşallah, komanda tezliklə çətin durumdan xilas olar. Çünki daha yaxşı yerlərə layiqdilər. Sizə gəlincə, "Futbol+" uzun zamandı ki, oxuduğum qəzet və saytdı. Mənə mütəmadi tribuna verdiyiniz və fikirlərimi işıqlandırdığınız üçün təşəkkür edirəm.

KƏNAN BAHADIR