Son iki həftədə 1-ci liqa təmsilçisi "İrəvan"ın başı üzərindən qara buludlar çəkilmir. Az qala hər gün klubun düşərgəsindən hansısa qalmaqal və narazılıq xəbəri gəlir.

Qərbi Azərbaycanı təmsil etməyə iddialı komanda 5-ci turda futbolçuların boykotu üzündən İmişliyə yollanmamaqla gözdən düşdü. Son bir həftədə isə “İrəvan”ın “Şamaxı” ilə ev oyununa çıxıb-çıxmayacağı yönündə də söz-söhbət gəzirdi. Əslində bu müddətdə “Futbol+”də gedən yazılarda “pələnglər”in, necə olur-olsun, “şirlər”lə oyuna çıxacağını xəbər vermişdik. Axı 2-ci texniki qələbə “İrəvan”ın avtomatik turnirdən çəkilməsi demək idi. Hər şeyi yerində görmək ümidi ilə srağagün "ASK Arena"ya yollandım.

13.00-da start götürəcək oyunun başlamasına dəqiqələr qalsa da, söhbətlər, şayiələr bitmirdi. Amma "İrəvan" meydana çıxdı. Buna meydana çıxmaq demək mümkünsə. Nazim Süleymanovun komandası oyuna 10 nəfərlə başladı. Hərçənd oyundan əvvəl PFL-in saytına qoyulan protokolda əsas heyətdə 11, ehtiyatda 1 futbolçu göstərilmişdi. Faktiki qazona 10 oyunçu ayaq basdı, ehtiyat oyunçu kimi göstərilən Elşən Abdullayev isə zədəliydi və idman paltarında deyildi.

İrəvanlılar necə miskin durumdadısa, qapıçı Rafiq Həsənova 5 nömrəli formanı geyindirmək meydan sahə oyunçusu kimi çıxarmışdılar. Maaşlarını ala bilmədiyinə görə etiraza qalxan, komandanı boykot edən futbolçular heç stadiona da gəlməmişdilər. Böyük ümidlərlə transfer olunan Mirabdulla və Mirsahib Abbasov qardaşları, Vüqar Bəybalayev, Famil Camalov, Fərid Kərimzadə, Ruslan Hacıyev, Arsen Ağcabəyov, Asim Əlizadə və başqa premyer-liqa təcrübəsi olanlar ümid qanadları sındırıldığından artıq "İrəvan"da oynamaq istəmirlər. Bir ilə yaxını futbolsuz qalan Elvin Yunuszasə kapitan sarğısıyla meydana çıxmışdı. Bu, "Neftçi" yetirməsinin başıbəlalı klubda ilk oyunu idi. O, yalnız təcrübəsinə və Fəhmin Muradbəyliyə güvənə bilərdi. Elə son mövsümü "Araz-Naxçıvan"da keçirən Fəhmin də bu görüşdə debüt edirdi. Sanki ikisi batmaqda olan gəmini xilas etmək üçün son çarə idi. Kasad heyətə nəzər yetirəndə ilk 4 turda komandanın şərəfini qoruyanlardan beşini (Andrey Sinenka, Ege Atlam Adnan,  Bəşir Ayralov, Kamal Mirzəyev, Ramin Məhərrəmov) meydanda gördük. 

Stadionda bir ovuç azarkeş var idi ki, onların çoxu "Sabah-2"nin oyunçuları və veteranlar idi (İqor Ponomaryov, Vəli Qasımov, "Şamaxı"nın İdarə Heyətinin sədri Elçin Usub, həmçinin futbolçulardan Nicat Mehbalıyev, Rəşad Əzizli). Region Liqasının son finalçısı "Çinar-Zəngilan"nın baş məşqçisi Anar Dünyamalıyev də oyunu izləyənlər arasındaydı. 

Hakimin start fitindən sonra bölgə təmsilçisi yırtıcı kimi meydan sahiblərinin üzərinə atıldı. "Şirlər" irəvanlıların qapısı ağzında "Barbarossa əməliyyatı” keçirməkdəydi. İlk yarıda "İrəvan"ı əməlli-başlı kötəklədilər. Fasilədən sonra da aşağı-yuxarı oxşar ssenari görsək də, meydan sahibləri təsəlli qolu ilə darmadağından qaçdı. Təbii ki, "Şamaxı"nın gözləniləndən zəif çıxış etməsinə və imkanlardan yararlanmamasına görə yekun hesab 1:3 oldu. Amma "İrəvan” rəzaləti, fiaskosu hələ qabaqdaydı. Belə ki, oyundan sonra nə klub rəsmiləri, nə də baş məşqçi futbol məkanına təşrif buyuran yeganə jurnalistin - mənim suallarıma cavab vermədi. Onları 40 dəqiqədən çox paltardəyişmə otağındada gözləməli oldum.

Belə ki, klub prezidenti Zahid Niyazəliyevlə baş məşqçi Nazim Suleymanov meydana ayaq basan futbolçuları razı salmaq üçün dil tökürdü. "Kartınızı atın, 5-10 manat göndərərik" vədi verən kim, "axı söz vermişdiz ki, bu gün hesablarımıza bütün maaşı köçürəcəksiz" deyən kim, "siz Allah, bir az da səbr edin hər şey qaydasına düşəcək", - deyə təsəlli verən kim... Kəsəsi, paltardəyişmə otağı vədlər-tələblər mübadiləsi otağına çevrilmişdi. Bu "məclis"dən sonra yenidən Sülemanovdan oyun və böhran ilə bağlı açıqlama almağa bir neçə dəfə cəhd göstərdim. O isə "mənim sənə burda açıqlama verməyim düz deyil, nə suallarınız var, mətbuat katibinə ünvanlayın, o mənə göndərəcək, cavablayacam", - deyə həqiqətləri deməkdən boyun qaçırdı.

Nazim bəyə futbolçu kimi hörmətimiz var. Amma başqa vaxt "ay qoymayın, futbolumuz əldən gedir", "ölkə futbolunu məhv etdilər" kimi gəlişigözəl sözlər deyən veteran futbolçu indi baş götürüb hara qaçır?! Belə hal gizli alver edib sahə rəisi görünəndə dovşan kimi qaçan alverçinin vəziyyəti xatırladır. Nazim bəy, axı siz alverçi, əl altından mal satan deyilsiz... Harda qaldı ədalət çarçılığınız, futbolumuzu qorumaq eşqiniz niyə tükəndi? 

Hələ "mən 40 ildi jurnalistəm" deyən və mətbuat katibi potunda otu(zdurula)ran Mübariz Süleymanlının durub "jurnalistin  suallarına vacib deyil ki, oyundan sonra cavab verilsin, istəyirsiz, suallarınızı yazın, sonra cavablayrarıq" ehkamı necə "parlaq" karyeraya sahib olduğunu göstərir.
Orta əsrlərdə krallar ya döyüşün gedişində, ya da məğlubiyyətlər zamanı özünü qul qiyafəsinə salıb aradan çıxar, ya da qadın paltarı geyib qaçardılar. "İrəvan"ın prezidentiyəm” deyib sinəsinə döyən Zahid Niyazəliyev də matç bitən kimi aradan çıxmışdı. "İrəvan"ın başqanını nə asan, nə də kəsən var idi. Ancaq o, suallardan qaçdı. Bir insan suallardan qaçırsa, deməli, gizlətdiyi çox şeyi var. Deməli, böyük iddialardan dəm vuran "İrəvan" ailəsində böyük qanunsuzluqlar, özbaşınalıq, dələduzluq var. Yoxsa təcrübəli futbolçular niyə komandanı  boykot etsin?! Beləliklə, “üstü bəzək, altı təzək” olan layihə iflasa uğramaqdadı.

ABDULLA İSMAYILOĞLU