Çempionlar Liqasında böyük maraq və səbirsizliklə gözlənilən “Qalatasaray” – “Bavariya” qarşılaşması ümidləri artıqlaması ilə doğrultdu.

“Football-plus.az” xəbər verir ki, həm “Qalatasaray”lı futbolçuların, həm də tribunaları dolduran fanatların mükəmməl performansına baxmayaraq, Münhen nəhəngi səviyyəsini və təcrübəsini göstərərək qalib gəlməyi bacardı. Düzdü, bəziləri nəticənin ədalətsiz olduğunu iddia edə bilər. Amma fakt budu ki, “Bavariya” rəqibdən daha zəif təsir bağışlamasına rəğmən, 3 xalı qazandı.

“Cim-Bom” fanatları növbəti dəfə bütün dünyada adından söz etdirməyi bacardı. 90 dəqiqə ərzində susmaq bilməyən və rəqib oyunçulara əsl cəhənnəmi yaşadan fanatlar ən xoş sözlərə layiqdi. Əslində Türkiyə mətbuatında bu matçda desibel rekordunun qırılacağı ilə bağlı məlumatlar var idi. “Fanatik” nəşri bununla bağlı bir hazırlığın olduğunu iddia etmişdi. Amma rekordun yenilənib-yenilənməməsi barədə hələlik bir məlumat yoxdu. Xatırladaq ki, bu göstəricidə rekord elə “Qalatasaray”ın özünə məxsusdu. Özü də söhbət “Ginnesin Rekordlar Kitabı”na düşən göstəricidən gedir. 2011-nin martında “Fənərbaxça”ya qarşı evdəki derbidə “Cim-Bom” fanatları 131,76 desibellik gurultu qoparmışdılar. Bu rekord hələ də də yenilənməyib. Düzdü, bu mövzu indiyə qədər müzakirəyə açıqdı. Çünki bir çoxları rekordun “Beşiktaş”a aid olduğunu iddia edir. Məsələn, 2007-nin oktyabrında “Liverpul”a qarşı ev oyununda “İnönü” stadionunda 132 desibellik səs rekordu qeydə alınmışdı. Bu fakta UEFA-nın rəsmi saytında da rast gəlmək olar. Eləcə də bir çox mənbədə “Beşiktaş” fanatlarının 2016-cı ildə “Bursaspor”la oyunda 135 desibel, 2013-cü ildə “Gənclərbirliyi”nə qarşı “İnönü”dəki son matçda isə 142 desibellik rekord müəyyənləşdirdiyi qeyd olunub. Sadəcə, buna əvvəlcədən hazırlıq görülmədiyi üçün bu göstəricilərin heç biri “Ginnesin Rekordlar Kitabı”nda qeyd olunmayıb. 2011-ci ildə isə “Qalatasaray” buna əvvəlcədən hazırlıq görmüş və rekordlar kitabının üzvlərini İstanbula dəvət etmişdi.
“Sarı-qırmızılar”ın fanatlarının srağagünkü performansını “Bavariya”lı futbolçular hələ uzun müddət xatırlayacaq. 1 qol, 1 məhsuldar ötürmə ilə komandasının qələbəsində mühüm rol oynayan İngiltərə yığmasının kapitanı Harri Keyn matçın ardından bunları dedi: “Çox mühüm bir qələbə qazandıq. Bu stadionda oynamaq asan deyil. Fanatlar onları durmadan irəli səsləyirdi. Bu məqam xüsusilə ilk yarıda işimizi çətinləşdirdi. İkinci hissədə sakitləşdik və daha yaxşı oynamağa başladıq. Şanslarımızı dəyərləndirdik. Karyeramda ilk dəfə bu stadionda oynadım. İnanın ki, səs-küydən qulağım tutulmuşdu. Eşitmə qabiliyyətim indi-indi bərpa olunur. Bu inanılmaz atmosferə görə “Qalatasaray” fanatlarına, eləcə də bizi dəstəkləməyə gələn fanatlarımıza təşəkkür edirəm. Futbolun mahiyyəti məhz budu. Yəni çətin atmosferdə qalib gəməyi bacarmalısan. Şükürlər olsun ki, bu gün bu sınaqdan üzüağ çıxdıq”.

“Bavariya”nın və Almaniya futbolunun gənc ulduzu Camal Musiala da oyundan sonra stadiondakı ab-havanı qeyd etməyi unutmadı: “Belə çətin səfərdə 3 xal qazanmaq çox gözəl hissdi. “Qalatasaray” ilk bölümdə yaxşı fürsətlər yaxaladı və daha güclü oynayırdı. Amma biz təlaşlanmadıq və şanslarımızı dəyərləndirdik. Qapıçımız da önəmli qurtarışlar etdi. Ümumi götürəndə yaxşı oynamasaq da, əsas nəticədi. Bu stadionda, bu fanatların önündə oynamaqdan böyük zövq aldım. Burda yaşadıqlarımı uzun illər unutmayacam”.

Almaniya mətbuatı da, təbii ki, bu oyuna və stadiondakı atmosferə biganə qalmadı. Ölkənin əsas nəşri olan “Bild” stadionda 132 desibellik səs olduğunu iddia etsə də, bu faktı hardan götürdüyü məlum deyil: “Bavariya” İstanbulda çətin anlar yaşadı. Bir ara gurultu 132 desibelə qədər çıxdı. Keyn “meqa fit” konsertini bitirən isim oldu”. “Kikker” nəşri “Qalatasaray”ın bir neçə qol vurmağa yaxın olduğu uğursuz ilk yarıya rəğmən, “Bavariya” İstanbulda qalib gələrək ÇL-in qrupundakı rekordlarını davam etdirdi” ifadəsinə yer verdisə, “Skay Sport”un qısa şərhi belə oldu: “Bavariya” İstanbul cəhənnəmində buz kimi idi. Keyn baş cəllad rolunda çıxış edərək ən xoş sözlərə layiq olduğunu yenə sübut etdi”. ZDF kanalı isə münhenlilərin xarakterini ön plana çıxardı: “Bavariya” İstanbul “qazanında” qalib gəlməyi bacardı. 50 min fanatın bitmək bilməyən fit sədalarına və “Qalatasaray”ın aramsız hücumlarına rəğmən, qələbə qonaqların oldu. “Bavariya” bu xarakter sınağından uğurla keçdi”.