Ronaldo azı 2025 deyir
Kriştiano Ronaldo yaşıl meydandakı gələcəyi ilə bağlı açıqlama verib. “Əl-Nəssr”in hücumçusu karyerasını azı 2024/25 mövsümünün sonuna qədər davam etdirməyi planlaşdırır.
"Football-plus.az" xəbər verir ki gələn il fevralın 5-də 39 yaşını tamamlayacaq portuqaliyalı hücumçu “O Jogo” nəşrinə açıqlamasında bunları deyib:
“Azarkeşlər məni sevindirirlər və mən də onlara layiqli cavab verirəm. Bu və növbəti mövsümdə oynamağa davam edəcəyəm. Sonra bədənimə baxıb, gələcəyimlə bağlı düşünəcəyəm. Məni zirvələrə çatdıran zəhmətdi. Komandam olmasaydı, bunların heç biri baş verməzdi. Səudiyyə Ərəbistanında olduğum üçün xoşbəxtəm. Çox sevinirəm ki, 38 yaşımda hələ də komandama kömək edirəm”.
Ronaldo Səudiyyə Ərəbistanı çempionatının son turunda “Damak”ın qapısına bir dəfə yol tapmaqla “Əl-Nəssr”in 2:1 hesablı qələbəsini təmin edib. Onun komandası hazırda 10 oyuna 22 xalla 3-cü yeri tutur. Kriştiano isə 11 qolla bombardirlərin siyahısına başçılıq edir.
Yeri gəlmişkən, ulduz futbolçunun oğlu da “Əl-Nəssr”də çıxış edəcək. 13 yaşlı Junior klubun U-13 və U-15 komandalarına daxil edilib. O da atası kimi “7” nömrəli formanı geyəcək.
Digər xəbərlər
