“Kəpəz” Tovuzda ilk oyununu keçirirdi. Gəncə klubunun rəhbərliyi azarkeşlərin marağını və təşkilatçılıq xərclərini nəzərə alaraq qış fasiləsinə kimi oyunlarını burda keçirməyə qərar verib. Lakin stadiona gələnlərin sayı elə Qəbələdəki kimi idi.

Qarşılaşmadan öncə bir çoxları “Zirə”ni favorit görürdü. Lakin gəncəlilər oyuna daha istəkli başladı. Azər Məmmədovun rəhbərlik etdiyi kollektiv topa nəzarət edərək mərkəzdən hücumlar qurmağa çalışırdı. Lakin cəhdlər boşa çıxırdı. Rəşad Sadıqovun mətbuat konfransında söylədiyi kimi “qartallar” ilk hissədə çox zəif çıxış etdi. “Kəpəz”in futbolçuları hücumlar zamanı daha istəkli olsaydılar, rəqibi azı iki dəfə cəzalandıra bilərdilər. Lakin belə olmadı.

Fasilədə azarkeşlər lider komandanın belə zəif təsir bağışlamasını müzakirə edirdi. Hətta onlar “Kəpəz”in çempionatda ikinci qələbəsini qazanacağını düşünürdü. Lakin fasilədən sonra komandalar bərabər səviyyəli oyun nümayiş etdirirdi. Hər iki komanda ehtiyatlı oyuna üstünlük verirdi. Düzdü, tərəflər hücumr qurmağa cəhd göstərirdi. Lakin son nöqtəni qoyan tapılmırdı. Hər iki komandanın baş məşqçisinin dediyi kimi heç-heçə ədalətli nəticə idi. Lakin lider “Zirə”nin autsayderlə oyunda belə zəif təsir bağışlaması olduqca düşündürücü məqamdı. Beləliklə, sıxıcı keçən görüşdə qalib müəyyənləşmədi. Açıq-aşkar deyə bilərik ki, bu, 10 tur ərzində keçirilən 39 görüş arasında ən maraqsızı idi.

Gözdən qaçmadı
* “Kəpəz”in avtobusunun sürücüsü stadiona buraxılmadığından bilet almağa məcbur oldu.
* Matç başlamamış tovuzlu ağsaqqallar gəncəli gənc azarkeşlərə yaxınlaşaraq “xoş gəlmisiz, amma oyun ərzində şöyüş-filan söyməyin”, - deyə tənbehlədi. Hakim səhvə yol verəndə fanatlar onu təhqir etdilər. Lakin tovuzlu ağsaqqallardan biri “ay bala, sizinlə söz danışdıq axı”, - deyə əsəbləşdi.
*Oyun ərzində 3-4 dəfə “Kəpəz” azarkeşləri “Zirə”nin baş məşqçisinə sataşdılar: “Ay Rəşad, bu hakimlərə nə qədər pul vermisən?”

İLKİN SULTANLI