Yığmamızın AÇ-2024-ün seçmə mərhələsində mübarizəsi davam edir.

6 oyundan sonra 4 xalla F qrupunun turnir cədvəlində 4-cü yerdəyik. Komanda əvvəlki matçlarla müqayisədə yaxşı oynayır, amma ortada ürəkaçan nəticə də yoxdu. Düzdü, cüzi inkişafı italiyalı mütəxəssislə əlaqələndirənlər var. Lakin mən o sırada deyiləm. Düşünürəm ki, bunda premyer-liqada rəqabətin və legionerlərimizin sayının artmasının payı daha böyükdü. Bəs De Byazi necə təsir bağışlayıb və ortaya nə qoyub?

“Xəstəlik”
Xeyr, italiyalı mütəxəssis hansısa xəstəlikdən əziyyət çəkmir. Amma tənqidi qəbul etməməsi, özündənrazılığı, hər fürsətdə əcnəbi həmkarlarımıza Azərbaycan futbolunu və mentallığını pisləməsi qocanın müalicəsiz “xəstəliyindən” - eqoistliyindən xəbər verir. Sanki elçilərinə “vallah, günahım yoxdu. Azərbaycan futbolu pis vəziyyətdədi, daha yüksək maaş verin, gəlim” deyir. De Byazini ölkəmizə bağlayan yeganə səbəbin pul olduğunu hamımız bilirik. Adam Estoniya kimi zəif rəqibə qalib gəldiyi üçün 20 min manat mükafat alıb. Əmin olun ki, yer üzündə bu jesti edəcək ikinci ölkə yoxdu.

“Şah əsər”
UEFA dünən AÇ-2024-ün seçmə mərhələsində 8-ci turun oyunlarından sonra statistik göstəriciləri açıqladı. Məlum oldu ki, millimiz indiyədək ən çox qurtarış edən komandalar siyahısındadı. Qapıçılar 6 görüşdə 27 seyvlə bu göstəricidə 8-ci oldu. Qarşılaşmalar ərzində rəqibdən top "oğurlamaqda” (207 dəfə) isə sonuncu pillələrdəyik. Daha dəqiq desək, 52 ölkə arasında 47-ci yerdyik. Qapıya zərbələrdə (45) də eyni mövqedə qərarlaşmışıq. Kollektiv ötürmə dəqiqliyinə (79,7 faiz) görə isə yalnız 31-ci ola bildik. Utana-utana vurulan qol sayını da xatırladaq. 6 görüşdə rəqib qapılarına 4 dəfə yol tapmışıq və 44-cü yerdəyik.

Böhtan, tənqid, hətta təhqir
De Byazi azərbaycanlı jurnalistlərdən qaçır. Ona sual vermək şərəfinə yalnız mətbuat konfranslarında nail oluruq ki, “yolaverdi” cavablarla kifayətlənirik. Tərcüməçi düzgün tərcümə etmir, yoxsa De Byazi bizi azdırmağa çalışır - bunu bilmirik. Baş məşqçi çox danışır, amma heç nə demir. Yeri gələndə suala görə əsəbləşir, hətta bəyənməyəndə təhqir də edir. Xatırlayırsızsa, matçdan öncə “Tofiq Bəhramov” adına stadionun qazonunun bərbad durumda olduğunu demişdi. AFFA hələ də onun niyə belə dediyini araşdırır, amma tapa bilmir.

Boş tribunalar, puç ümidlər
Azərbaycan – Avstriya matçında qonaq komandanı dəstəkləyən xeyli azarkeş “Bəhramov”a gəlmişdi. Onlar son saniyəyə qədər susmadı. Sadəcə, qol epizodlarında hərəkətə keçən yerli azarkeşləri üstələmək də avstriyalılar üçün çətin olmadı. Belə mənzərəyə futzal millimizin Bakıda Qazaxıstanla görüşündə də şahidlik etmişəm. Baş məqşçiləri əcnəbi olan millilərimiz meydanlarda “12-ci oyunçu”suz qalıb. Günahkarı isə bir Allah tanıyır, bir də AFFA!

KƏNAN BAHADIR