“Yığmamız son iki oyunda acınacaqlı məğlubiyyətə uğradı. Onu deyim ki, federasiya rəhbərliyi əvvəlcədən yığmanın yaxşı hazırlaşması üçün istənilən şəraiti yaratdı. Xüsusilə təlim-məşq toplanışının keyfiyyətli keçirilməsinə önəm verdiyimiz üçün hər şey yüksək səviyyədə təşkil olundu. Matçlara gəlincə, Bakıdakı matçda bəxt amili ön planda oldu. Xatırlayırsızsa, ikinci qolda top futzalçımıza dəyib qapıdan keçdi. Üçüncü qol isə hakimin səhvi üzündən baş verdi. O, ədalətli qərar vermədiyindən rəqib fərqi artırdı. Düzdü, bizimkilər etiraz etdi, amma gec idi. Digər tərəfdən rəqibi də kiçiltmək olmaz. Qazaxıstan yığması Avropa reytinqində 3-cü olan komandadı. Futzalçılar uzun müddətdi bir yerdədi. Deyərdim ki, onlar hətta baxışlarla anlaşa bilirlər. İlk görüşdə qələbə qazanacağımıza çox inanırdıq. Lakin qarşı tərəfin təcrübəsi və gücü öz sözünü dedi. Səfərdəki oyunda da şərait eyni idi. Bizim tərəfdən hər kəs matç üçün səfərbər edilmişdi. Birinci hissədə 2:0 öndəydik. Mübarizəyə çox yaxşı başlamışdıq. Təəssüf ki, çoxlu səhvə yol verdik. Böyük əziyyətlərlə qol vursaq da, rəqib asanlıqla bizi 3 dəfə məyus etdi. Yığmanın hazırlıq prosesində ciddi çatışmazlıqdan söhbət gedə bilməz. Oyun strategiyası haqda isə fikir bildirməyim düzgün olmaz. Çünki hər məşqçi heyətinin özünəməxsus dəst-xətti var. Rəqib təhlil edilir və buna uyğun taktika seçilir. Lazımi futzalçılar meydana buraxılır. Ümumiyyətlə, bütün çatışmazlıqlara baxmayaraq, nikbinəm. Qarşıdakı oyunlarda qələbə qazanandan sonra Qazaxıstanın da Rumıniyanı məğlub edəcəyinə ümid edirik. Ancaq bu yolla qrupu ikinci pillədə bitirib pley-off mərhələsinə vəsiqə qazana bilərik. Şans hələ də var”.

“Qazaxıstana məğlub olmaq üçün getməmişdik. Qrupdan çıxa bilmək üçün qələbənin vacib olduğunu bilirdik. Futzalçılar əlindən gələni etdi, maksimum gücümüzü ortaya qoyduq. Millimizə bildirilən iradlarla tanışam. Xüsusilə məhz “Futbol+”də “Record club”un baş məşqçisi Əli bəyin fikirlərini oxumuşam. Görəsən, hansı yerli futzalçılara şans verilməməsindən söhbət gedir? Nə etməliydim? Gəncləri tankın qarşısına çıxaracaqdım? Bilirsiz, onda nə olacaqdı? Böyük hesabla məğlub olduğumuza görə həm məni, həm də oyunçuları söyəcəkdilər. Hamı deyəcəkdi ki, milli heç nə bacarmır, səfərdə darmadağın edilir. Heç kimə sirr deyil ki, yerli futzalçılar belə ciddi oyunlarda başdan sona qədər çıxış etmək iqtidarında deyil. Murad Quluzadə (Baku Fire – red.) ilk dəfə milliyə çağırılırdı. Start heyətində çıxış etməsi nə dərəcədə düzgün idi? Xəzər, Novruz və Xətai isə yavaş-yavaş belə atmosferə öyrəşməlidi. Hər oyunda müəyyən qədər şans verə bilərik. Başqa kimlər var ki, bunu başqaları görür, mən görmürəm? Hələ 3 aydı yığmadayam. Ortaya yaxşı işlər qoymaq üçün zaman lazımdı. Məsələn, Qazaxıstandakı oyunda rəqib çox sürətli oynayırdı. İkinci hissədə tempi kəskin artırdılar. Biz buna həm müdafiə, həm də hücum xəttində tab gətirməli olduq. Müəyyən qədər bacardığımızı da deyə bilərəm. Ümumiyyətlə, futzalçı kimi də jurnalistlərlə dəfələrlə danışmışam. Hər məsələdən nəsə çıxarmağa çalışırlar. Burda gizli, açıqlanmayası heç nə yoxdu. Oyunu izləyənlər bilir ki, sona qədər mübarizə apardıq. Amma Azərbaycanda 10-15 yerli peşəkar futzalçı yoxdu ki, onlardan bəhrələnəsən. Yenə deyirəm ki, bu işlərin görülməsi üçün vaxt lazımdı. İnşallah, hər şey qaydasına düşəcək”.

“Təəssüf ki, səfərdəki matçda cəmi 30 saniyə meydanda oldum. Mənə niyə şans verilmədiyini bilmirəm. Düşünürəm ki, baş məşqçimiz bu haqda daha ətraflı danışar. Həm fiziki, həm də psixoloji cəhətdən özüümü oyuna hazır hiss edirdim. Məncə, ən güclü legioner belə orda özünü azərbaycanlı futzalçı kimi göstərə bilməz. Düzdü, legionerlər canla-başla sona qədər mübarizə apardılar. Buna baxmayaraq, milli kimlik, üçrəngli bayrağımızın şərəfini qorumaq kimi müqəddəs hissləri, sadəcə, soydaşlarımız bölüşə bilər. Qapıçımız Emin Kürdovdan başqa heç bir yerli futzalçı start heyətində yox idi. Hazırda hamımız üzgünük. Məğlubiyyətlərdən sonra özümüzə gələ bilməmişik. Hər iki maçtda hesabda önə keçəndən sonra uduzduq. Qazaxıstan millisi bizi bütün komponentlərdə üstələdi. Günahın kimdə olduğunu deyə bilmərəm. Çətin sualdı. Amma nəyin bahasına olur-olsun, qələbə qazanmalıydıq. Bu xal itkilərinin yığmamızı çətin duruma saldığı heç kimə sirr deyil. Sonda onu da deyim ki, meydana çıxıb son saniyəyə qədər mübarizə aparacağıma şübhə etsəydim, nə düşərgəyə qoşulardım, nə də Qazaxıstana gedərdim”.