Futzal yığmamız dünən DÇ-2024-ün elit mərhələsində növbəti oyununu keçirdi.

Rəqib qrupun həm lideri, həm də favoriti olan Qazaxıstan yığması idi. Baş məşqçi Vitali Borisov Niderlandla matçla müqayisədə bu dəfə Qabriel Bastosu dəvət etmişdi. Gərgin keçən matçda hesab 12-ci dəqiqədə açıldı. Rəqib qapıçıdan topu “oğurlayan” Qallo Hadiyə ötürmə verdi. Bir rəqibdən sıyrılan hücumçu topu tora qovuşdurmaqla komandamıza üstünlük qazandırdı. Komandalar irəliləyən dəqiqələrdə bir-birinə təzyiq göstərsə də, fasiləyə hesabla yollanmalı oldular. Ümumiyyətlə, millimiz 1-ci hissədə hesab baxımından öndə olsa da, baxımlı oyun sərgiləyə bilmədi. Rəqib bizimkiləri meydanın özünə aid hissəsinə sıxışdırmışdı. Yığma müdafiə olunmağa, Qazaxıstanın hesabı bərabərləşdirməsinin qarşısını almağa çalışırdı. Qapıçı Emin Kürdov dəfələrlə "çərçivə"yə istiqamətlənmiş zərbələri dəf etdi.

İkinci hissədə ilk təhlükəli vəziyyəti millimiz yaratsa da, rəqib qol vurdu. Bu dəfə Birjan Orozov "status-kvo"nu bərpa etdi. Qonaqlar növbəti epizodlarda daha 3 qola sevindi. Belə ki, Borisovun qapıçını meydandan alıb "5-ci oyunçu" strategiyasından faydalanmaq istəyindən rəqib maksimum istifadə etdi. Qazaxıstanlılar uzaqdan dəqiq zərbələrlə fərqi 3-ə çatdırdı. Yığmamızın heyətində Maneka son saniyələrdə fərqlənərək hesabı 2:4 etdi.

Beləliklə, turnir cədvəlində bir pillə geri düşdük. İndi yığmanın işi çox çətindi. Rəhbərliyin Borisovun qarşısına qoyduğu dünya çempionatında iştirak tapşırığı ciddi təhlükəylə üz-üzədi.

DÇ-2024, elit mərhələ oyunu
Azərbaycan – Qazaxıstan 2:4 (1:0)
Azərbaycan: 1. Emin Kürdov (q, k), 6. Eduardo Borges, 9. Rafael Vilela, 10. Felipinyo, 14. Amadeu; 12. Rövşən Hüseynli (q), 20. Qabriel Bastos, 5. Maneka, 7. Hadi Əhmədi, 8. Novruz Kazıxanov, 11. Xətai Bağırov, 13. Qallo, 16. Xəzər Ağalızadə, 4. Murad Quluzadə.
Baş məşqçi: Vitali Borisov.
Qazaxıstan: 2. İgita (q), 6. Edson, 12. Dauren Tursaqulov, 14. Duqlas, 17. Birjan Orozov; 16. Narun Serikov (q), 7. Azat Valiullin, 8. Leo, 9. Albert Akbalıkov, 10. Çingiz Yesenamanov, 11. Arnold Knaub, 13. Rayımbek Juma, 18. Akjol Daribay, 20. Rəsul Abdumanapuli.
Baş məşqçi: Rikardo Kaka.
Qollar: H.Əhmədi, 11:46 (1:0). B.Orozov, 22:25 (1:1). Duqlas, 26:02 (1:2). D.Tursaqulov 35:31 (1:3). Leo, 38:49 (1:4). Maneka, 39:55 (2:4)
Vərəqələr: Felipinyo, 26:34. D.Tursaqulov, 27:59. Q.Bastos, 35:31 - sarı.
Hakimlər: KİRİLL NAİŞOULER, Arttu Kyynaeraeinen, Paavo Komppa (hamısı Finlandiya).
Hakim-inspektor: Tarik Keço (Bosniya və Hersoqovina).
UEFA nümayəndəsi: Sean Dipple (İngiltərə).

6 oktyabr. Bakı İdman Sarayı.
1. Qazaxıstan 3 3 0 0 10-5 9
2. Rumıniya 3 2 0 1 8-6 6
3. Azərbaycan 3 1 0 2 9-8 3
4. Niderland 3 0 0 3 2-10 0

Dünən qrupun digər oyununda Rumıniya Hollandiyanı məğlub edib - 2:1.

KƏNAN BAHADIR