Türkiyənin Balıkəsir şəhərində ilk dəfə təşkil olunan çimərlik voleybolu üzrə Avropa Kubokunun finalında ev sahibi “TVF Sport Lisesi SK Ankara”ya qalib gələn “Murov Az Terminal” srağagün vətənə döndü.

Bu uğurla bağlı turnirdə çıxış edən kişi voleybolçulardan ibarət yığmanın üzvü Vüqar Bayramov “Futbol+”in bəzi suallarını cavabladı.

- Vətənə çempion kimi qayıtdız və tarixə düşdüz. Bu necə hissdi?
- İnanılmaz dərəcədə xoşbəxtəm. Həqiqətən də Azərbaycan tarixinə düşmək, bayrağımızı dalğalandırmaq, himnimizi səsləndrimək fantastik idi. Çox qürur hissi keçirirəm. Turnirə gəlincə, çox yaxşı təşkil olunmuşdu. Güclü ölkələrin kollektivləri yarışda iştirak etdilər. Təbii ki, onların arasında birinci olmaq xoşbəxtlikdi.

- Kuboku qazanacağınıza inanırdız?
- Əlbəttə, inam var idi. Özümüzə güvəndiyimiz üçün də kuboku əldə etdik. Həm də intizamlı olmaq köməyimizə çatdı. Uşaqlar yarışda çox istəkli çıxış elədilər. Lakin bilirdik ki, turnir çətin olacaq. Fransa, İtaliya, Türkiyə təmsilçilərinə qarşı oyunlarımız ağır oldu. Amma menecerdən tutmuş voleybolçulara qədər komanada olan hər kəsin bu uğurda əməyi var. Klassik voleybolda çıxış edən həm kişi, həm də qadın komandalarımız avrokuboklarda bu ay mübarizəyə başlayacaqlar. Onlara da uğurlar arzulayıram. İnşallah, yenidən ölkəmizə kuboklar gələr.

- Yəqin ki, bu nəticədən sonra AVF sizi mükafatlandıracaq…
- Əlbəttə, həmişə qazandığımız nəticələrin qarşılığında federasiya bizə dəstək verib. Hazırda rəhbərlik bizim üçün çalışır. Amma bu mənim şəxsi fikrimdi ki, əsas əldə etdiyimiz uğurdu.

- Klassik voleybolla çimərlik voleybolu arasında nə kimi fərqlər var?
- Çimərlik voleybolu daha çətindi. Çünki qumda oynamaq narahatlıq yaradır. Həm də zal voleybolunda meydanda çıxış edən oyunçuların sayı çox olur, lakin çimərlikdə belə deyil. Və buna görə də işimiz daha ağır olur. Bir də ki çimərlik voleybolunda gün ərzində 3-4 oyun keçirirsən. Bax, bu da fiziki cəhətdən bizdə yorğunluq yaradır.

- Çimərlik voleybolundakı karyerana davam edəcəksən?
- Bildiyiniz kimi, mən hər yay çimərlik üzrə ölkə çempionatlarında, müxtəlif yarışlarda çıxış edirəm. İndi bu haqda qərar vermək olmur. Bunu zaman göstərəcək. Təbii ki, zal voleybolu mənə daha doğmadı. İndi çimərlik voleybolunda qazandığımız uğurla göstərdik ki, həm zal, həm də çimərlik voleybolunda nəticə əldə etmək olar. Sadəcə, daha yaxşı hazırlaşmalıyıq.

CAVİD ƏLİYEV