"Neftçi - "Qarabağ" qarşılaşması həmişə azarkeşlərin böyük marağına səbəb olub. Bu da komandalar arasında rəqabətin güclü olması ilə bağlıdı. İndi isə "Neftçi" "Qarabağ"a qarşı keçmiş oyunlardakı kimi rəqabət apara bilmir. Lakin yenə də fanatlar tərəfindən oyuna maraq böyük olur. Çünki "ağ-qaralar"ın güclü olan dövrlərdəki çıxışı insanların ağlında xoş xatirə kimi qalıb. Və bu matça da heç vaxt maraq itirmir. Məsələn, "Qarabağ" "Zirə", "Sabah"la oynadığı zaman azarkeş sayı çox olmur. Ancaq bu derbiyə bir çox adam, hətta sıravi fanatlar da vaxt tapıb gəlmək istəyir. Kaş ki ölkə çempionatında "Qarabağ"la mübarizə aparacaq səviyyədə klublar olaydı. Bura "Neftçi", "Sabah" və "Zirə"ni aid etmək olar. Belə olacağı təqdirdə "köhlən atlar" da qələbəni rahat qazanmayacaq. Oyuna hazırlığa gəlincə, "İmarət Tayfa" da matça həmişə xüsusi hazırlaşır. Amma sürprizlər olacağı halda bunu yalnız stadionda görə bilərsiz. Bəzən fan-klubun gənc üzvləri etdikləri sürprizləri bizə də demir. Biz hamımız bu gün "Qarabağ"dan qələbə gözləyirik".