Ötən il fevralın 24-dən bəri Ukrayna ərazisini işğal etmək hədəfi ilə amansız müharibə aparan Rusiyanın dünyanın futbol ailəsindən, beynəlxalq turnirlərdən kənarda qalması təbiidi. Amma UEFA ötən həftənin çərşənbə axşamı iki yeni qərar açıqlamaqla qitə futbol ictimaiyyətində haqlı suallar doğurdu.

Bu qərarlardan birincisi gözlənilən idi. Rusiyanın klubları və yuxarı yaş qrupu yığmaları müharibə bitənə qədər beynəlxalq arenaya dönməyəcək. İkinci qərara iə “inqilabi” təyinini yapışdırmaq olar: Rusiyanın U-17 yığması himnsiz, bayraqsız, evdə oynamaq imkanı qazanmadan bütün Avropa turnirlərinə buraxılır. UEFA prezidenti Aleksander Çeferin bu qərarı belə izah etdi:

UEFA-nın uşaqlarla bağlı qərarı Rusiyada böyük ruh yüksəkliyi ilə qarşılansa da, qitənin əksər ölkələrində narahatlıq doğurub. Konkret 7 ölkənin bu qərarın əleyhinə çıxdığını, rusiyalı yeniyetmələrlə qarşılaşmaq istəmədiyini qəzetimizin ötən saylarında xəbər vermişdik. Hadisələrin bundan sonrakı axarı da maraq doğurur. UEFA çox çətin seçim qarşısındadı. Bir tərəfdən, söhbət bəşəriyyətin gələcəyi olan uşaqların fundamental hüquqlarından gedir. Amma digər tərəfdən, rusiyalı uşaqları beynəlxalq turnirlərə buraxmaq həm də dolayısıyla işğal faktına haqq qazandırmaq deməkdi. Üstəlik yeni qərara etiraz edən və sıraları get-gedə genişlənən ölkələri susdurmaq da çətin olacaq. Heç şübhəsiz, UEFA rəhbərliyi bu qərarı uzun-uzadı məsləhətləşmədən sonra verib. Burda çox incə bir nüans var. Qitə futbol qurumu, sadəcə, rusiyalı yeniyetmələri etirazçıların yer aldığı qruplara buraxmaya bilər.

Maraqlıdı ki, rusiyalı həmkarlarımız U-17-lər arasında AÇ-2024-ün seçmə turnirində yer almaq üçün münasib qrup axtararkən ilk növbədə Azərbaycanın da yer aldığı qrupa boylanıb. Söhbət oyunları Serbiyada keçiriləcək 4-cü seçmə qrupdan gedir. Həmin qrupun komandaları arasında meydan sahibləri və yığmamızla yanaşı, Sloveniya və Lüksemburq da var. Faktiki UEFA seçmə mərhələnin püşkü atılandan və qrupların tərkibi müəyyənləşəndən sonra belə anlaşılmaz qərar verməklə rusları hədsiz dərəcədə ruhlandırıb. Onlar yığmamızın qrupuna düşmək istəklərinin səbəbini gizlətmirlər. Açıq-aşkar yazırlar ki, Azərbaycan bu qərara etiraz etməyəcək, Sloveniyanı UEFA-nın bu ölkədən olan prezidenti Çeferin razı sala bilər. Bircə qalır Lüksemburqu razı salmaq. Rusların diqqətini cəlb edən daha bir qrup var. 7-ci qrupda da Türkiyə, Şotlandiya, Belarus və Qazaxıstan U-17-si yer alıb. Burda da yeganə əngəl Şotlandiya ola bilər. Çox güman, yaxın günlərdə Rusiyanın yeniyetmələrdən ibarət yığmasının hansı qrupda yarışacağına aydınlıq gələcək. Kaş ki bizim qrupda olmayaydılar!

Maraq üçün U-17-lər arasında seçmə turnirin bütün qruplarının tərkibini xatırladırıq.

1-ci qrup (oyunlar oktyabrın 11–17-si aralığında keçiriləcək): Danimarka, Avstriya, Gürcüstan, Litva.
2-ci qrup (27 sentyabr – 3 oktyabr): İsveç, Polşa, Latviya, Moldova.
3-cü qrup (15–21 oktyabr): Almaniya, Ukrayna, Finlandiya, Lixtenşteyn.
4-cü qrup (21–27 oktyabr): Serbiya, Sloveniya, Lüksemburq, Azərbaycan.
5-ci qrup (15–21 noyabr): Portuqaliya, ÇexiyaŞ Monteneqro, Albaniya.
6-cı qrup (15–21 noyabr): Fransa, Norveç, Rumıniya, Estoniya.
7-ci qrup (21–27 oktyabr): Türkiyə, Şotlandiya, Belarus, Qazaxıstan.
8-ci qrup (25–31 oktyabr): İspaniya, Slovakiya, Şimali Makedoniya, Malta.
9-cu qrup (3–9 noyabr): İngiltərə, Xorvatiya, Kosovo, Farer adaları.
10-cu qrup (11–17 oktyabr): İrlandiya, İsveçrə, İslandiya, Ermınistan.
11-ci qrup (25–31 oktyabr): İtaliya, Yunanıstan, Şimali İrlandiya, San Marino.
12-ci qrup (11–17 oktyabr): Belçika, İsrail, Uels, Cəbəllütariq.
13-cü qrup (25–31 oktyabr): Macarıstan, Bosniya, Bolqarıstan, Andorra.

Gələn ilin yazında keçiriləcək 2-ci seçmə mərhələyə 13 qrup qalibi, 2-ci yeri tutacaq 13 komanda, eləcə də 3-cü yeri tutanlar arasından 5 ən yaxşısı adlayacaq.