“Görək bu futbolçuların həqiqətən ayaqları top tutur, ya yox...”
Ötən sayımızda iki azərbaycanlı futbolçunun Almaniya bundesliqasında çıxış etdiyini diqqətinizə çatdırmışdıq.
Bunlar Həsən Məmmədli ilə Elgün Alışov idi. Onlar “Rot-Vayss Oberhauzen”də çıxış edir. Hər iki futbolçunun komandasının əsas heyət üzvü olsa da, milliyə dəvət olunmadığını bildirmişdik.
Oyunçularımız sentyabrın 23-də çempionat daha bir oyuna çıxıb. “Rot-Vayss Oberhauzen” “Rot-Vayss Essen”lə qarşılaşıb. Görüş meydan sahiblərinin qələbəsi ilə başa çatıb – 1:0. Oyunda yeganə qolu azərbaycanlı futbolçu Həsən Məmmədli vurub. Hər iki oyunçumuz bu qarşılaşmada da start heyətində meydana çıxıb.
İlk yazıdan sonra 17 yaşadək futbolçulardan ibarət milli komandamızın baş məşqçisi Füzuli Məmmədov redaksiyamızla əlaqə saxlayaraq məsələ ilə bağlı danışmaq istədiyini bildirdi. Təcrübəli mütəxəssis mövzunu diqqətdə saxladığımız üçün təşəkkürünü dilə gətirərək bunları söylədi:
“Hər iki futbolçu ilə bağlı məlumatım var. Menecerlərdən biri onlar barədə mənə informasiya vermişdilər. Lakin onların hansı klubda və ya liqada oynadığından xəbərim yox idi. Onları təklif edənlərə söylədim ki, mənə bir oyunun videolarını göndərin. Görək bu futbolçuların həqiqətən ayaqları top tutur, ya yox”.
Füzuli Məmmədova məlumatları çempionatın rəsmi saytından götürdüyümüzü, Almaniyanın U-16 liqasında çıxış edən futbolçuların normal səviyyədə olacağını bildirdik. Hətta adı çəkilən ölkənin millisinə namizəd olduqlarını da qeyd etdik. Çalışdırıcı cavabında bunları söylədi:
“Almaniya millisinə namizəd olanlar Azərbaycanı seçmirlər. Dəfələrlə belə şeylər olub. Türklər öz millilərini seçirlər. Amma bizimkilər dəvət gələn kimi ora gedirlər. Bəzən elə olub ki, Rusiyadan futbolçu təklif ediblər. Yığmaya dəvət etmişik, amma millinin toplanışını pozub. Çünki oyun keyfiyyəti çox aşağı olub. Bu səbəbdən də həmin oyunçuların videosunu izləməliyəm. Bundesliqada oynayırlarsa, super. Bizə də belə futbolçular lazımdı. Çalışacağıq ki, onlarla əlaqə yaradaq, ətraflı məlumat toplayaq. Azərbaycan millisində oynamaq potensialına malik, xaricdə yaşayan oyunçularımız olanda, təbii ki, sevinirik”.
İLKİN SULTANLI
Digər xəbərlər
