Futbol ictimaiyyəti daim yığmalarımızın nəticələrindən narazılıq edir. Əslində haqlıdı da. Çünki nəticələr qənaətbəxş deyil. Əsas və aşağı yaş qrupu üzrə yığmalarımızdan hansınınsa sonuncu böyük uğurunu xatırlamaq çətin məsələdi.

Futbol ictimaiyyəti bunun səbəbini uşaq futbolunda və oyunçularımızın ölkə xaricində çıxış etməməsində görür. Şükürlər olsun ki, hazırda legioner həyatı yaşayan futbolçularımız var. Hətta aşağı yaş qrupları üzrə komandalarımızın heyətində də başqa ölkələrdə çıxış edən oyunçular var. Amma millilərə oyunçuların necə dəvət olunması böyük maraq doğrur. Hər dəfə baş məşqçilərin seçimləri böyük müzakirələrə səbəb olur. Bəzən də çalışdırıcılar ölkə xaricində çıxış edən gənc azərbaycanlılardan xəbərsiz olurlar.

Belə məqamlardan biri ilə bağlı redaksiyamıza şikayət daxil olub. Sən demə, Almaniya bundesliqasında çıxış edən azərbaycanlılar var imiş. Söhbət Məhəmməd Həsənli ilə Elgün Alışovdan gedir. Hər iki futbolçu “Rot-Vayss Oberhauzen”də çıxış edir. Komanda hazırda 16 yaşdək futbolçuların Almaniya bundesliqasında 5 oyuna 8 xal yığıb və 14 iştirakçı arasında 4-cü pillədə qərarlaşıb. Həm Elgün, həm də Həsən komandanın əsas heyət üzvlərdi. Çempionatdakı bütün matçlarda ilk “11-lik”də yer alıblar.

Gəlin etiraf edək ki, Almaniyanın U-16 liqası ilə bizim çempionatı müqayisə etmək absurddu. Təbii ki, onların turniri daha yaxşı səviyyədədi. Amma nə Elgün, nə də Həsən U-16 və ya

U-17 yığmamıza dəvət olunur. Bu futbolçular haqda həm federasiyaya, həm də Füzuli Məmmədovla İlham Yadullayevə məlumat verilib. Lakin hələ də oyunçularla təmasa keçilməyib. Oyunçuların hər ikisinnin valideyni azərbaycanlıdı, Almaniyada bizneslə məşğuldular.

Redaksiyamıza bu iki yeniyetmə ilə bağlı başqa maraqlı informasiya da daxil olub. Futbolçular Almaniya U-17-sinə dəvət oluna bilər. Lakin hər iki oyunçunun valideyni övladının Azərbaycan millisində oynamasını istəyir. Növbəti sayımızda AFFA-nın və adı çəkilən məşqçilərin də fikirlərini öyrənəcəyik.

İLKİN SULTANLI