“Qalatasaray” – “Kopenhagen” matçının ardından Türkiyə - Danimarka dueli ertəsi gün “Fənərbaxça” – “Nordşelland” oyunu ilə davam etdi.

“Football-plus.az” xəbər verir ki, “Kopenhagen”in baş məşqçisinin “Qalatasaray”la matçın ardından “Türkiyə klubları daha çox pul xərcləsə də, bizim nəticələrimiz daha yaxşıdı” açıqlamasının fonunda “Fənərbaxça”nın “Nordşelland” üzərində inamlı qələbə qazanması tam yerinə düşdü. “Fənər” zatən bu dəqiqə Avropada ən yaxşı formada olan klublardan biridi və bu mövsüm hələ də heç bir oyunda büdrəməyib. Özü də nəzərə alaq ki, İsmayıl Kartal rotasiyaya əl ataraq Şimanski, Tadiç və Ceko kimi ulduzları ehtiyatda saxlamışdı! 62 yaşlı mütəxəssisin şans verdiyi oyunçular ümdiləri artıqlamasıyla doğrultdu. Adəti üzrə güclü azarkeş dəstəyi ilə oynayan “Fənər” matçın gedişində hətta hesabı darmadağı həddinə də çatdırdı. Qonaqların gücü yalnız qollardan birinin əvəzini çıxmağa yetdi. Beləliklə, parlaq performansını davam etdirən İstanbul nəhəngi qrupa 3 xalla başladı.

“Beşiktaş” isə Belçikada, necə deyərlər, o dünyanı görüb qayıtdı. Şenol Günəşin komandası xal qazandığına görə ilk növbədə qapıçı Mərt Günoka minnətdar olmalıdı. Hazırda Türkiyə yığmasında da əsas qapıçı statusunda olan Mərt bu oyunda xarüqələr yaratdı. 34 yaşlı əlcək sahibi oyunu 8 seyvlə tamamlayaraq bu baxımdan KL-in 1-ci turunda bütün qapıçıları üstələdi. Hücumları səngimək bilməyən “Brügge”, nəhayət, 77-ci dəqiqədə tilsimi qıraraq kapitan Vanakenin sayəsində hesabı açdı. Düşünmək olardı ki, qonaqların artıq bərabərlik qolunu vurmağa gücü çatmayacaq. Çünki həmin ana qədər “ağ-qaralar” yalnız Abubakarın timsalında bir dəfə ciddi qol vəziyyəti yaratmışdılar. Amma əsas vaxtın bitməsinə 2 dəqiqə qalmış “Brügge”nin yarımmüdafiəçisi Kasper Nilsenin yanlış ötürməsindən sonra Abubakar Cenk Tosunu qapıçı ilə duelə yolladı. Zədədən qayıdandan sonra əvvəlki formasını bərpa etməkdə çətinlik çəkən təcrübəli forvard bu epizodda soyuqqanlı oynayaraq komandasını məğlubiyyətdən xilas etdi. Beləcə “Beşiktaş” rəqibdən aşkar zəif oynadığı qarşılaşmada hesabına 1 xal yazmağı bacardı.

qrup mərhələsi, 1-ci tur
D qrupu
Brügge (Belçika) – Beşiktaş 1:1
Vanaken, 77 – Cenk Tosun, 88.
Beşiktaş: Mərt Günok, Rozye (Cenk Tosun, 84), Bayi (Nəcip Uysal, 84), Amarti, Masuaku, Haciahmetoviç (Oksleyd-Çemberleyn, 84), Dəmir Ege Tıknaz, Fernandeş, Raşitsa (Onur Bulut, 66), Muleka (Zaynutdinov, 66), Abubakar.
H qrupu
Fənərbaxça – Nordşelland (Danimarka) 3:1
Krespo, 24. Batşuayi, 30. Sərdar Əziz, 47 – Villadsen, 55.
Fənərbaxça: Livakoviç, Osayi-Samuel, Sərdar Əziz, Ciku, Oostervolde, Krespo, Fred (Şimanski, 78), Mərt Hakan Yandaş (İsmayıl Yüksək, 69), Kinq (Tadiç, 87), Kent (İrfan Can Kahveci, 69), Batşuayi (Umut Nayır, 69).

Faktlar
* “Fənərbaxça” avrokuboklarda 261-ci oyununda 102-ci qələbəsini qazandı (55 heç-heçə, 104 məğlubiyyət, top fərqi – 350:370).
* “Fənərbaxça” avrokuboklarda keçirdiyi son 19 oyunun yalnız birində məğlub olub (15 qələbə, 3 heç-heçə). Yeganə məğlubiyyət ötən mövsüm AL-in 1/8 finalında “Sevilya” ilə səfər oyununda qeydə alınıb (0:2).
* “Fənərbaxça” bu mövsüm 11-ci rəsmi oyunda 11-ci qələbəsini qazanmaqla tarixinin ən uğurlu startı ilə bağlı rekordunu bir qədər də yaxşılaşdırdı (top fərqi – 32:6)!
* “Fənərbaxça” avrokuboklarda ardıcıl 8-ci qələbəsini qazanmaqla bu göstəricidə Türkiyə klubları arasında özünə məxsus olan rekordu bir qədər də yaxşılaşdırdı!
* “Fənərbaxça”nın avrokuboklarda evdəki məğlubiyyətsiz seriyası 10 oyuna çatdı (9 qələbə, 1 heç-heçə). Bununla da “Fənər” avrokuboklarda üç fərqli dönəmdə evdə ən azı 10 oyunluq məğlubiyyətsiz seriya yaxalayan ilk Türkiyə təmsilçisi oldu! Komanda daha öncə 2015 oktyabr – 2017 avqust aralığında 11, 2006 iyul – 2008 sentyabr aralığında isə 15 oyunluq seriya yaxalamışdı.
* “Fənərbaxça” İsmayıl Kartalın başçılığı altında keçirdiyi ardıcıl 23-cü rəsmi oyunda məğlub olmadı (20 qələbə, 3 heç-heçə)! Bu seriya 2021/22-nin 2-ci dövrəsindən davam edir. Komanda bu məşqçi ilə son məğlubiyyətini ötən il fevralın 25-də KL-in pley-offunun cavab oyunu çərçivəsində səfərdə “Slaviya” ilə qarşılaşmada yaşayıb (2:3).
* Fred son 11 ildə avrokubokların qrup mərhələsində 2 məhsuldar ötürmə verən ilk “Fənərbaxça”lı futbolçu oldu. Sonuncu dəfə bunu 2012-nin oktyabrında Münhenqladbax “Borussiya”sı ilə oyunda Canər Ərkin bacarmışdı.
* “Beşiktaş” avrokuboklarda 237-ci oyununda 48-ci dəfə bərabərə qaldı (90 qələbə, 99 məğlubiyyət, top fərqi – 314:352).
* “Beşiktaş”ın avrokuboklarda rekord – 6 oyunluq qələbə seriyası qırıldı. Bununla belə, komanda avrokuboklarda məğlubiyyətsiz seriyanı 7 oyuna çatdırdı və bu göstəricidəki rekordun təkrarlanmasına cəmi 1 oyun qalıb. “Qartal” 2010/11-də Bernd Şusterin dönəmində Avropa səhnəsində ardıcıl 8 oyunda uduzmamışdı.
* Cenk Tosun “Beşiktaş”ın heyətində avrokuboklarda 12-ci qolunu vurmaqla həm Abubakarı geridə qoydu, həm də Bobo ilə Kuareşmaya çatdı. İndi bu siyahıda Tosun yalnız 14 qol vuran Oktay Dərəlioğludan geri qalır.

Oyundan sonra
İsmayıl Kartal, “Fənərbaxça”nın baş məşqçisi: “Çətin rəqibə qarşı oynadıq. Təsnifat mərhələlərində önəmli qələbələr qazanmışdılar. Elə Danimarka çempionatının son turunda da “Kopenhagen”lə bərabərə qalmışdılar. “Nordşelland” oyun sistemi olan, gənc və iştahlı komandadı. Amma biz də yaxşı formadayıq. Rotasiya etmək məcburiyyətində qalmışdıq. Oyun üçün seçdiyimiz plan özünü doğrultdu. Daha çox qol vura bilərdik. Belə rəqibə qarşı sərgilədiyimiz futbol məni sevindirdi. Fanatlarımız də əla dəstək verdilər. Onlara təşəkkür edirəm. Batşuayi əvəzlənərkən etirazını bildirdi? Bunu sizdən eşidirəm. Mən heç nə görmədim. Nəyə etiraz etdi? Bu gün yaxşı oynadı və üstəlik qol da vurdu. Digər futbolçular da yaxşı performans sərgilədi”.

Yohannes Torup, “Nordşelland”ın baş məşqçisi: “İlk 35 dəqiqədə yaxşı oynamadıq. “Fənərbaxça” güclü komandadı və üzərimizdə ciddi təzyiq qurdu. Oyuna yaxşı hazırlaşsaq da, “Nordşelland”ın əsl gücünü göstərə bilmədik. Bundan daha yaxşı oynamağa qadirik. Gözlədiyimiz kimi, stadionda əla atmosfer var idi. Bizim üçün mühüm bir təcrübə oldu”.

Ronni Deyla, “Brügge”nin baş məşqçisi: “Belə oyunun qarşılığında qalib gələ bilməmək bizi çox üzdü. Komandam əlindən gələni etdi. İdeala yaxın futbol sərgilədik. Hətta 1:1-dən sonra da qələbə qolunu vurmaq üçün irəli atıldıq. Təəssüf ki, futbolda layiq olan tərəf heç də həmişə qalib gəlmir. Bu qarşılaşmada bunun bariz nümunəsini gördük. Nəticədən yox, amma oyunumuzdan razı qaldım. Son nöqtəni qoymağın üzərində bir qədər də işləməliyik. Qapımıza vurulan qol Nilsenin yanlış ötürməsindən sonra baş verdi. Amma onu heç kim günahlandırmır. Nilsen onsuz da çox üzgündü. Biz o ana qədər artıq 2-3 qol vurub matçın taleyini həll etməliydik. Təbii ki, rəqibin qapıçısının oyununu da qeyd etmək lazımdı”.

Şenol Günəş, “Beşiktaş”ın baş məşqçisi: “Rəqibin gücünü və necə oynadığını bilirdik. “Brügge” hücum zənginliyi olan komandadı. Bizə çətin anlar yaşatdılar. Bəzi məqamlarda təşvişə düşsək də, bəzi anlarda onlara cavab verə bilirdik. Ən azı 1 xal qazanmaq istədiyimiz üçün müdafiəyəmeyilli oynamaq məcburiyyətindəydik. Hərçənd bu, bizim oyun fəlsəfəmizə ziddi. Gərgin və çətin bir qarşılaşmadan 1 xalla ayrılmağı bacardıq. Mərt həlledici məqamlarda bizi xilas etdi. Cenk Tosunun isə psixoloji cəhətdən bu qola çox ehtiyacı var idi. Bütün oyunçularım əlindən gələni etdi. Amma performansımızı yaxşılaşdırmağa çalışmalıyıq”.