“İlk ağlıma gələn bu idi ki, futbol oynaya biləcəyəmmi? Xəstəxana otağında ayıldım, hərəkət edə bilmirdim, gözüm qamaşırdı, əlim bağlı idi. Öyrənmək istədiyim ilk məsələ futbol oynaya bilib-bilməyəcəyim idi. Həkimə verdiyim ilk sual bu oldu. Bütün həyatım futbola köklənib. Futboldan başqa nəsə haqda düşünmək mənə çətin idi. Axı başqa heç nə ilə məşğul olmamışam. Bütün bu müddət ərzində yalnız futbolla bağlı düşünmüşəm”.

“Bütün bu dəstək sözlərini eşitmək çox xoşdu. Bütün komanda yoldaşlarımdan, klubda çalışanlardan, prezidentdən, Luiş Kampuşdan, hər kəsdən dəstək mesajı almışam. Onlar, xüsusən də məzuniyyət dövründə, yayda mənə mesaj göndərməyə, dəstəkləməyə vaxt sərf ediblər. Bunlar, həmçinin həmklublarımın jestləri, qol vurandan sonra futbolkamı göstərmələri məni çox duyğulandırdı. Paltardəyişmə otağında çəkilən videoları da görmüşəm. Bütün bunlar məni çox təsirləndirir, mənim üçün böyük şərəfdi, belə ailənin bir hissəsi olmağımla qürur duyuram. Hər kəsə şəxsən təşəkkür etmək istəyirəm ki, belə çətin vaxtımda məni dəstəkləmək üçün vaxt tapıblar”.
Riko sonda fanatların onu yaşıl meydanda nə vaxt gözləməli olduqları haqda da danışıb: “Sentyabrın 22-də növbəti tibbi testdən keçməliyəm. Ümid edirəm ki, həkim idmanla məşğul olmaq üçün mənə daha böyük azadlıq verəcək. Tezliklə dönüşümün reallaşması üçün bu vacibdi. Əsas hədəfim mövsümün sonuna qədər sıraya qayıtmaq, PSJ azarkeşlərini oyunumla sevindirməkdi”.