G qrupu
Yanq Boyz – Leyptsiq 1:3 (1:1)
Yanq Boyz (Bern, İsveçrə): Raçoppi, Yanko (Blum, 69), Kamara, Amenda, U.Qarsiya (Persson, 77), Benito, Nyass (Nsame, 85), Lauper (Mal, 77), Uqriniç, İtten (Qanvula, 70), Elia.
Leyptsiq (Almaniya): Blasvix, Henrixs, Simakan, Lukeba, Raum, Simons (Verner, 88), Kampl, Şlaqer, Forsberq (Baumqartner, 80), Openda (Lents, 88), Poulsen (Şeşko, 64).
Qollar: Simakan, 3 (0:1). Elia, 33 (1:1). Şlaqer, 73 (1:2). Şeşko, 90+2 (1:3).
Vərəqələr: Benito, 45. Kampl, 56. Lauper, 61. Simons, 68. Blum, 77. Forsberq, 79. Simakan, 90 - sarı.
Hakim: Enea Yorqi (Albaniya).
19 sentyabr. Bern. 31500 tamaşaçı.
oyunun statistikası
7 (3) qapıya (“çərçivə”yə) zərbə 21 (8)
3 künc zərbəsi 7
3 ofsayd 3
12 qayda pozuntusu 11
3 (0) sarı (qırmızı) vərəqə 4 (0)
53 topa sahibolma (faizlə) 47

Çempionlar Liqasında qrup mərhələsinə Milanda və Berndə keçirilən ilk iki oyunla start verildi. İsveçrədə keçirilən matçın start fiti yenicə səslənmişdi ki, yerli azarkeşlər məyusluq yaşadılar. Oyuna fəal başlayan “Leyptsiq” artıq 3-cü dəqiqədə hesabı açdı. Bunda “Yanq Boyz”un qapıçısı Raçoppinin səhvə yol verməsinin də təsiri oldu. Amma Raumun ifasında yerinə yetirilən künc zərbəsindən sonra Simakanın topa dəqiq zərbə endirməsi qonaqların bu kombinasiyanı əvvəlcədən hazırladıqlarını aydın göstərirdi. Almaniya komandası hesabı açandan sonra da maraqlı oyun sərgiləməyə davam etdi, lakin fasiləyə qədər qapıya ikinci dəfə yol tapa bilmədi. Hissənin ortalarında təşəbbüs ev sahiblərinin əlinə keçdi. Oyunu bərabərləşdirən bernlilər yarım satlıq mübarizə arxada qalandan sonra cavab qolunu vurdular: əla kombinasiya Elianın dəqiq zərbəsi ilə sona çatdırıldı.

“Leyptsiq” 2-ci hissəyə də fəal başladı. Qonaqlar bir neçə dəfə hesabda yenidən önə keçə bilərdilər. Ancaq şanslar boşa verildi. Marko Rozenin komandası istəyinə yalnız matçın son 20 dəqiqəsində çatdı. İsveçrəlilərin orta xətdə yol verdikləri səhvdən sonra Şlaqer komandasının layiq olduğu qolu vurdu. Bundan sonra böyük qüvvə ilə irəli atılan meydan sahibləri əks-hücumda yaxalandılar. Şeşkonun qolu “Leyptsiq”in gözlənilən qələbəsinə şübhə yeri qoymadı.

Mançester Siti – Srvena Zvezda 3:1 (0:1)
Mançester Siti (İngiltərə): Ederson, Uoker, Diaş (Levis, 83), Ake, S.Qomes (Akanci, 58), Nunyeş, Rodri (Fillips, 83), Silva (Dokyu, 44), Alvares, Foden (Bobb, 83), Holann.
Srvena Zvezda (Belqrad, Serbiya): Qlazer, Mixayloviç, Ciqa, Draqoviç, Mitroviç, Rodiç, Stameniç, Hvan İn Bom (Kanqva, 83), İvaniç (Olayinka, 68), Bukari (Deqenek, 82), Ndiay (Krasso, 68).
Qollar: Bukari, 45 (0:1). Alvares, 47 (1:1). Alvares, 60 (2:1). Rodri, 73 (3:1).
Vərəqələr: Rodri, 24. Rodiç, 32. Diaş, 56. Stameniç, 82 - sarı.
Hakim: Joao Pinyeyro (Portuqaliya).
19 sentyabr. Mançester. 50204 tamaşaçı.
oyunun statistikası
37 (16) qapıya (“çərçivə”yə) zərbə 3 (2)
12 künc zərbəsi 0
1 ofsayd 1
5 qayda pozuntusu 9
2 (0) sarı (qırmızı) vərəqə 2 (0)
70 topa sahibolma (faizlə) 30

Turnirin son qalibi öz meydanında iki fərqli oyunla yadda qaldı. Şübhəsiz, “Mançester Siti” ilk dəqiqələrdən diqtə edən tərəf idi. Topa böyük ölçüdə nəzarət edən İngiltərə çempionu qapıya hədsiz çox zərbə vurdu. Amma “şəhərlilər”in əksər həmlələrində düşünülmüş kombinasiyalar tapmaq çətin idi. Xüsusilə qeyd edək ki, Qvardiolanın komandası ilk hissədə qapı istiqamətində 22 zərbə endirdi, bunlardan 7-si “çərçivə”yə yönəldi. Birinci rəqəm Çempionlar Liqasında rekord göstərici oldu. Xatırladaq ki, “Bavariya” 2013-cü ildə “Viktoriya” (Plzen) ilə matçın bir hissəsi ərzində qapıya 21 zərbə ilə rekord müəyyənləşdirmişdi. Amma MS-nin oyunçularının zəhməti ilk yarının sonunda boşa getdi: səqiqəli şəkildə müdafiə olunan və nadir hallarda hücuma keçən “Srvena Zvezda” fasiləyə saniyələr qalarkən hesabı açdı. Bukarinin qolunun yalnız VAR-ın müdaxiləsindən sonra qeydə alındığını da bildirək.
Qvardiolanın fasilədə futbolçularına lazımi göstərişlər verəcəyi gözlənilən idi. Və onun komandası 2-ci hissədə baş məşqçinin təlimatlarını necə lazımdısa yerinə yetirdi. Alvaresin dublu və Rodrinin baxımlı qolu son çempionun əzmkar qələbəsini təmin etdi.
4 oktyabr: Leyptsiq – Mançester Siti, Srvena Zvezda – Yanq Boyz.

Oyundan sonra
Rafael Viki, “Yanq Boyz”un baş məşqçisi: “Stadiondakı atmosfer yenə fantastik idi. Hesabda geri olarkən azarkeşlərimiz böyük dəstəyi ilə bizə oyuna qayıtmaq imkanı yaratdılar. Mənə elə gəlir ki, komandam yaxşı və cəsarətli oyun göstərdi. Futbolçularımızdan elə bunu tələb etmişdim”.

Marko Roze, “Leyptsiq”in baş məşqçisi: “Son bir neçə həftə ərzində üzləşdiyimiz çətinliklərin öhdəsindən gəlməyimiz məni çox sevindirir. Kapitanımız Orban və Olmo kimi aparıcı oyunçulardan yararlana bilmədik. Biz inamla müdafiə olunur və hücumda da yaxşı oynayırıq. Belə qələbələr zədəli oyunçularımızın sıraya dönəcəyi ana qədər dözməyə kömək edir”.

Xosep Qvardiola, “Mançester Siti”nin baş məşqçisi: “Son iki matçda nə qədər qol şansını boşa verdiyini dəqiq deyə bilmərəm. Yetərincə yaxşı oynadıq, amma ilk hissədə heç cür qol vura bilmədik. Oyuna yetərincə köklənmişdik, matçın gedişində hesabda geri düşsək də, motivasiyamızı əsla itirmədik və sonda qələbə qazandıq. Qapıya 22 dəqiq zərbə endirdik. Bu, hər şeyi düzgün etdiyimizi göstərir. Fikrimcə, Rodri hazırda Avropada ən yaxşı yarımmüdafiəçidi. Onun daha da inkişaf edəcəyinə ümidliyəm. Amma indi də ən yüksək səviyyəli dayaq yarımmüdafiəçisidi. Bəxtimiz onda gətirib ki, klubumuz bir neçə il əvvəl belə oyunçunu transfer edib. Rodri sıralarımıza qoşularkən indiki səviyyədə deyildi. İndi kapitanlarımızdan biri və yüksək səviyyəli oyunçudu. Hələ ki onun zədəsi ilə bağlı həkimlərlə söhbət etməmişəm. Amma görünür, Bernardo Silva qarşıdakı oyunları buraxmalı olacaq”.

Omri Qlazer, “Srvena Zvezda”nın qapıçısı: “Çox, çox çətin oyun idi. Çempionlar Liqasında debüt etdim və startdaca dünyanın ən yaxşı komandasına qarşı oynadım. Meydanda hər şeyə nəzarət edən “Siti” qapıya hardasa 30 zərbə endirdi. Mən onlardan təxminən 15-16-nı dəf etdim”.