Daha bir futbol həftəsini geridə qoyduq.

“Football-plus.az” sizə geridə qalan həftənin maraqlı sitatlarınl təqdim edir:

Xosep Qvardiola, “Mançester Siti”nin baş məşqçisi: “Kürəyimdə aparılan əməliyyatdan sonra indi vəziyyətim normaldı. Məni əməliyyat edən həkim işini çox yaxşı görüb. Vaxt keçdikcə səhhətim daha da yaxşı olacaq. Bir neçə oyunda komandamın yanında ola bilməməyim mənə qəribə göründü. Amma indi hər şey qaydasındadı”.

Luis Rubiales, İspaniya Futbol Federasiyasının (İFF) sabiq prezidenti: “Son həftələr baş verənlər hamı üçün pis haldı (İspaniyanın qadınlardan ibarət yığması ötən ay dünya çempionatının finalında İngiltərəyə qalib gələrək tarixində ilk dəfə çempion olub. Rubiales mükafatlandırma mərasimi zamanı milli komandanın oyunçusu Cennifer Ermosonun dodağından öpdüyü üçün ölkə ictimaiyyətinin böyük təzyiqinə tab gətirə bilməyərək istefaya yollanıb – R.Y.). Cenni məni qucaqlayaraq yuxarı qaldırdı və aramızda öpüş məqamı baş verdi. Cəmi on saniyə çəkən bu hadisə ətrafında qoparılan həngamə, sadəcə, ağılsızlıqdı. İndi məni maraqlandıran yeganə məsələ ləyaqətimi müdafiə etməkdi. Həmin epizod qeyri-ixtiyari və qarşılıqlı razılıq əsasında baş verdi. Məqamı emosiya və xoşbəxtlik anı adlandırmaq olar. Və mən bunun həqiqət olmasına əminəm. İnanılmaz dərəcədə harmoniya vardı, o anda hamı xoşbəxt idi. Fikrimcə, ispaniyalı kişi və qadın arasında belə təmas tamamilə normaldı. Bu, mədəniyyətlə bağlı olan məsələdi. Həmin anda İspaniyanın kişi futbolçusunu da öpə bilərdim? Şübhəsiz, 100 faiz! Mən oyunçu olanda komandamız aşağı liqaya düşməkdən qurtularkən və ya yüksək liqaya vəsiqə qazanarkən sevincdən bir-birimizin dodaqlarından öpürdük...”.

Qrem Suness, Şotlandiya yığmasının sabiq yarımmüdafiəçisi: “Bu, “qızıl nəsil”di. Artıq Lempard, Cerrard və Skoulzu unudun. İndiki nəslin gücü və bacarığı daha üstündü. İngiltərə yığması indi həqiqətən də çox yaxşı komandadı. Bu komandanın bir çox titullar qazanmalı olduğunu düşünürəm”.
Alessandro Del Pyero, “Yuventus”un sabiq hücumçusu: “30 il əvvəl – 1993-cü il sentyabrın 12-də “Yuventus”un formasında ilk dəfə rəsmi oyunda meydana çıxdım. Bu an “qoca sinyora” ilə inanılmaz səyahətin başlanğıcı oldu. Ağ-qara formada keçirdiyim bütün oyunlarda meydanda olduğum hər dəqiqə mənim üçün şərəf və böyük üstünlük idi. Mənə uzun illər ərzində dəstək verən və indi də bunu davam etdirən bütün azarkeşlərə təşəkkürümü bildirirəm. Yuventus”un futbolkası mənim üçün yalnız geyim deyil, ikinci dəri, ehtiras rəmzi və işə bağlılıqdı”.

Xerardo Martino, “İnter Mayami”nin baş məşqçisi: “Biz yaxşı bilirdik ki, hansısa məqamda onu əvəzləmək lazım gələcək. Onu da bilirik ki, Messi meydanda olanda komandamız daha yaxşı oynayır. Lionel bizim bayrağımızdı. O, komandanı arxasınca aparır. O, bizim əsas qəhrəmanımızdı, biz isə ikinci dərəcəli aktyorlarıq”.

Françesko Totti, “Roma”nın sabiq hücumçusu: “Mourinyo mənim yenidən “Roma”da olmağımı istəyir? Mən də belə düşünürəm. O, haqqımda belə fikir səsləndirib. Odu ki, gözləyək. “Roma”ya ehtiyacım var”.

Matteys de Liqt, “Bavariya”nın müdafiəçisi: “Nə üçün ilk dəqiqələrdən oynamıram? Heç cür anlaya bilmirəm. Siz jurnalistlər bunun səbəbini baş məqşçidən soruşmalısınız. Mən çalışdırıcının istəyini yerinə yetirirəm. Buna görə də son iki matçda 1 və 6 dəqiqə meydanda olmuşam. Görə biləcəyim yeganə iş meydanda top qovmaqdı. Qalan bütün məsələlər məşqçinin qərarlarından asılıdı”.

Xavyer Klemente, İspaniya yığmasının sabiq baş məşqçisi: “Rubialesin bir neçə gün həbsdə olmasını istərdim. Anxel Mariya Vilyara (İFF-nin 2017-ci ilin iyulunda korrupsiyaya görə vəzifəsindən azad edilən və həbs olunan sabiq prezidenti – R.Y.) qarşı nələr etdiyini anlaması üçün belə cəzaya layiqdi. O, bir neçə il əvvəl Vilyara etimadsızlıqla bağlı səsverməni təşkil etdi və İdman üzrə Ali Şuranın “xeyir-duası” ilə onu həbsxanaya göndərdi. Bu təşkilat Anxel Mariyanı deyil, məhz Luisi dəstəkləyirdi. Rubiales ambisiyalı, eqoist, kobud, hörmətəlayiq olmayan və xəsis adamdı. Onun ardınca Xavyer Tebas devrilməlidi. O, İspaniya futbolunu parçalamaqla məşğuldu”.

Zvonimir Boban, Xorvatiya yığmasının sabiq yarımmüdafiəçisi: “Tarixin ən yaxşı futbolçusu kimdi? Məncə 4 oyunçunu bir sıraya qoymaq olar. Pele, Maradona, “Fenomen” Ronaldo və Messi. Heç kim, heç kim topu Maradona kimi hiss etmirdi. Heç bir futbolçu bu baxımdan Dieqo ilə müqayisəyə gələ bilməz. Onun “Napoli”nin formasında yağışlı havada cərimə zərbəsi ilə “Yuventus”a vurduğu qolu görsəydiz... 13 metrdən (standart vəziyyət cərimə meydançasının daxilində təyin olunmuşdu – R.Y.) topu “canlı sədd”in üstündən qapıya göndərmişdi. Bunu yalnız o bacara bilərdi və Maradona belə epizodlara görə dahidi”.

Xavyer Tebas, İspaniya La Liqasının prezidenti: “Barselona” normal vəziyyətə nə vaxt qayıdacaq? Bu məsələ özlərindən asılıdı. Ola bilsin ki, top-oyunçularını satmaqla maliyyə planında irəliyə doğru böyük addım atsınlar. Yeri gəlmişkən, bizim liqamız maliyyə vəziyyətinə görə Avropada sonuncu yerdədi”.

Fabio Kannavaro, İtaliya yığmasının sabiq müdafiəçisi: “Son illər dünya çempionatlarında çox zəif nəticələr göstərmişik. 2006-cı ildə zəfərimizlə nəticələnən Berlindəki finaldan sonra iki dəfə qrupda qalmışıq, iki dəfə isə ümumiyyətlə, final mərhələsinə çıxa bilməmişik. Milli komandamızın problemlərinin həm rəhbərlik, həm də texniki planda olduğunu düşünürəm. İtaliya futbolunu gücləndirməliyik”.
Luis Rubiales, İFF-nin sabiq prezidenti: “Həmin anda İspaniyanın kişi futbolçusunu da öpə bilərdim? Şübhəsiz, 100 faiz!”.

RAMİL YUSİFOV