AÇ-2024-ün seçmə mərhələsi çərçivəsində Ermənistanı evdə məğlub edə bilməyən Türkiyə srağagün yoldaşlıq matçında Yaponiya ilə üz-üzə gəldi.
"Football-plus.az" xəbər verir ki, oyun Belçikanın Genk şəhərində yerləşən və eyniadlı klubun stadionu olan “Segeka Arena”da keçirildi. Son mundialın 1/8 finalçısı olan Yaponiya bəlkə də tarixinin ən güclü dönəmlərindən birini yaşayır. Bir neçə gün öncə səfərdə Almaniyanı darmadağın edən yaponlar Türkiyə ilə qarşılaşmada da favorit statusunu artıqlamasıyla doğrultdu. Gözlənildiyi kimi, Ştefan Kunts bu dəfə meydana fərqli heyət buraxmışdı. Hətta ilk dəfə yığmaya dəvət alan Yusuf Sarı start heyətində meydana çıxmışdı. İlk yarı “ay-ulduzlular” üçün faciəvi alındı. Türklər yaponların sürətli hücumları qarşısında çox aciz görünürdülər. “Gündoğar ölkə”nin komandası 15-ci dəqiqədə Atsuki İtonun baxımlı qolu ilə hesabı açdı. 36-cı dəqiqədə artıq hesab darmadağın həddinə çatmışdı! Keyto Nakamura 8 dəqiqə ərzində hesabına iki qol yazdı. O, əvvəlcə qapıçı Uğurcanın topu inamsız şəkildə qaytarmasından yararlandısa, çox keçmədən Maikumanın ötürməsini qola çevirdi. Bu dəqiqələrdə başverənlər tribunaya toplaşan qürbətçi fanatları da qəzəbləndirdi. Onlar Kuntsu, eləcə də Türkiyə Futbol Federasiyasının rəhbərliyini istefaya səslədi. Türkiyə fasilə ərəfəsində qollardan birinin əvəzini çıxdı. Standart zərbə zamanı hücuma qoşulan mərkəz müdafiəçisi Ozan Kabak yığmada 23-cü oyunda 2-ci qolunu vurdu. Kunts başverənlərə fasilədə birdən-birə 5 əvəzetməyə əl atmaqla reaksiya verdi. Ədalət naminə bu dəyişikliklərdən sonra Türkiyənin daha yaxşı oynamağa başladığını vurğulayaq. Hərçənd yaponlar da artıq rahatlaşmışdılar. Rəqibi qapısına doğru sıxışdıran türklər hətta fərqi minimuma endirməyə də müvəffəq oldular. Ermənistanla matçda Türkiyəni biabırçılıqdan xilas edən gənc forvard Bertuğ Yıldırım bu dəfə də fərqlənməklə yığmada 2-ci oyunda 2-ci qolunu vurdu. Amma bundan artığına Türkiyənin gücü çatmadı. Bu azmış kimi, 76-cı dəqiqədə fərq yenidən artdı. İsmayıl Yüksəkin kobudluğundan sonra təyin olunan penaltini Cunya İto dəqiq yerinə yetirdi. Türkiyə Kuntsun başçılığı altında keçirdiyi 20-ci oyunda 5-ci dəfə uduzdu (12 qələbə, 3 heç-heçə). Beləliklə, Yaponiya 4 gün ərzində iki almaniyalı mütəxəssisin çalışdırdığı komandalar üzərində parlaq qələbələr qazandı. Hans-Diter Flik Almaniyanın həmin məğlubiyyətindən sonra istefaya göndərildi. Kuntsu isə hələ ki heç kim istefaya göndərməyə tələsmir. Halbuki belə oyunla Türkiyəni gələn ay Xorvatiya ilə prinsipial səfər matçında yaxşı heç nə gözləmir...

Yaponiya – Türkiyə 4:2
A.İto, 15. Nakamura, 28; 36. C.İto, 76-p. – Ozan Kabak, 44. Bertuğ Yıldırım, 61.
Türkiyə: Uğurcan Çakır (Altay Bayındır, 46), Onur Bulut, Ozan Kabak, Çağlar Söyüncü (Merih Dəmiral, 46), Mərt Müldür, Orkun Kökçü (İsmayıl Yüksək, 46), Salih Özcan (Hakan Çalhanoğlu, 46), Salih Uçan (Cengiz Ündər, 46), Yusuf Sarı, İrfan Can Kahveci (Barış Alpər Yılmaz, 83), Bertuğ Yıldırım.

Oyundan sonra
Hadzime Moriyasu, Yaponiya yığmasının baş məşqçisi: “Bizim üçün qalib gəlmək önəmli idi. Nəticədən də, oyunumuzda da razıyam. Almaniya ilə oyunla müqayisədə heyətdə 10 dəyişlik etmişdim. Yəni yeni oyunçularla oynadıq. Amma verdiyim tapşırıqları əla yerinə yetirdilər. Xüsusilə hücum xəttində yaxşı performans sərgilədik. Türkiyənin müdafiədə yol verdiyi bəzi səhvlərdən daha yaxşı yararlansaydıq, fərq daha böyük ola bilərdi. Hücum planında məşqlərdə bir çox məqamların üzərində çalışırıq. Bir məşqçi üçün məşqdəki şeylərin oyunda həyata keçdiyini görmək sevindiricidi. Mundialdan bəri aramıza yeni oyunçular qatılıb. Onlar da komandaya uyğunlaşıblar. Kunts Yaponiyanın fiziki cəhətdən Türkiyəni üstələdiyini söyləyib? Fiziki cəhətdən komandalar arasında böyük fərq görmədim. Əksinə, ikinci hissədə bəzi anlarda hətta Türkiyə bizdən daha yaxşı oynadı. Komandamız yavaş-yavaş yeni səviyyəyə qalxır. DÇ-nin 1/8 finalında penalti seriyasında uduzduğumuz Xorvatiyaya qarşı bu gün oynasaydıq, nəticə bəlkə də fərqli oalrdı. Xorvatlar hər rəqibə qarşı fərqli oyun planı ilə meydana çıxırlar. Fikrimcə, AÇ-nin seçmə mərhələsində Xorvatiya ilə Türkiyə arasında sona qədər maraqlı mübarizə gedəcək”.

Ştefan Kunts, Almaniya yığmasının baş məşqçisi: “İlk yarıda çox zəif oynadıq. Yaponların müdafiədən hücuma sürətlə çıxdığını bilirdik. Oyunçulara bununla bağlı göstərişlər vermişdim. Amma bu cür şəkildə 3 qol buraxdıq! Fiziki cəhətdən bəzi oyunçularım yaponlarla mübarizə apara bilmədi. Elə taktiki cəhətdən də ümidlərimi doğrultmayanlar oldu. İkinci hissədə daha yaxşı oynadıq. Hesasbı 3:2 etdikdən sonra da qol fürsətlərimiz var idi. Bizim üçün çox faydalı qarşılaşma oldu. Nəticəyə görə üzülsəm də, Xorvatiya ilə oyundan öncə səhvlərimizi gördüyümüz üçün sevincliyəm. Üstəlik Bertuğ Yıldırım kimi yeni oyunçu qazandıq. Yığmaya dəvət alan hər futbolçu özünü və oyununu inkişaf etdirməlidi. Türk dilində yaxşı danışa bilməsəm də, fanatların tribunada nə qışqırdığını anlayırdım. Ötən yay Millətlər Liqasında qazandığımız ardıcıl 4 qələbədən bəri heç kim məşqçini qorumur. Türkiyədə həmişə günahkar məşqçi olur. Amma problem məşqçidə deyil. Türkiyə mənimlə 20 oyun keçirib və yalnız 5-də uduzub. Məğlub olduğumuz komandalar reytinqdə bizdən öndədi. Məşqçi yox, başqa problemlərə diqqət yetirilməlidi. Təəssüf ki, bu gün üçün Yaponiya ilə eyni səviyyədə deyilik. Bizdən çox üstün oynadılar. Futbolçular yığmada oynayarkən meydanda bütün bacarıqlarını göstərib potensiallarının 100 faizini ortaya qoymalıdılar. Bir məşçqçi kimi bunu oyunçularımda görmədikdə üzülürəm”.