"Tək Zubir deyil, ölkəmizdə 5 ildən çoxdu yaşayan və oynayan başqa futbolçular da var. 5 ildi bizdə oynayır deyə, hansısa əcnəbiyə Azərbaycan pasportu verilməsinin tərəfdarı deyiləm. Bu işdə strategiya müəyyənləşməlidi. Qrupda sonuncu olmamaq və Estoniyanı üstəmək üçün Zubiri və başqa oyunçunu “milliləşdirəcəyiksə”, buna ehtiyac yoxdu. Zatən bunu “milliləşdirməsiz” də bacarırıq. Yox, İsveç, Avstriya, Belçila kimi rəqiblərlə daha yaxşı mübarizə aparıb, xal və xallar qoparmaq, qrupda yuxarı yerlər uğrunda döyüşəcəyiksə, Zubir azərbaycanlılaşdırlması pis olmaz. Həmçinin hazırda qrup mərhələsinin yarısı arxada qalıb. Çox güman, bu turnir başa çatan kimi De Byazi gedəcək. İndidən Zubiri və bir başqa oyunçunu “milliləşdirdik”, sabah yeni baş məşqçi gəldi və dedi ki, "Qarabağ"ın oyunçusu mənim strategiyama, oyun üslubuma uyğun deyil. Ona görə istənilən oyunçunu “milliləşdirdikdə” bir çox nüansı nəzərə almaq lazımdı. Mənə qalsa, “milliləşdirmədən” əl çəkmək yaxşı olardı. Amma digər reallığa da baxanda görürsən ki, hazıda yığmamızın heyətindəki oyunçuların çoxu yerli klublarda yetişməyənlərdi. Əksəriyyəti Rusiya, Ukrayna futbol məktəbinin nümayəndərləridi".

"Şəxsi mövqeyimi öncəliklə vurğulayım. Nəinki futbol üzrə milli komandamızda, bütün idman sahələrində” milliləşdirmənin” əlehinəyəm. İdmanda nəticə qazanmaq üçün kiməsə Azərbaycan pasportu verilməsinin tərəfdarı deyiləm. Hətta Messi, Ronaldonun yığmamızda oynamaq şansı olsaydı, onların da gətirilməsinə müxalif olardım. Həmçinin ölkənin əsas komandasında əcnəbi məşqçilərin gətirilməsinin də tərəfdarı deyiləm. Söhbət millidən gedirsə, burda hər bir kəs milli olmalıdı. Bəlkə də fikrim radikal səslənəcək, amma nəinki məşqçi ilə futbolçular, hətta masajçılar, fizioterapevtlər, aşpazlar və digər personal üzvləri də yerlilər olmalıdı. Amma subyektiv mövqeyimi kənara qoysaq və dünyada “milliləşdirmənin” populyar olduğunu nəzərə alsaq, yerli futbolçularımızdan üstün legionerləri yığmaya gətirmək olar. Söhbət Zubirdən gedirsə, onun bu gün "Qarabağ"a necə fayda verdiyi göz önündədi. Buna görə də mərakeşlinin milliyə cəlb olunması pis olmazdı. Bir məsələni də xüsusi vurğulayım ki, Azərbaycan pasportu bizə faydalı olmaqla yanaşı, az-çox dövlət dilini bilən, ölkəmizə bələd olan, xalqımızın mili-mənəvi dəyərlərindən agah olan və ehtiram göstərən, himnimizdən, heç olmasa, bir kəlmə səsləndirə bilən şəxslərə verilsə, daha yaxşı olar".