“Bu, əsil səviyyəmizi və nəyə qadir olduğumuzu görmək üçün əla fürsət idi. Çünki çox yaxşı rəqibə qarşı oynadıq. “Los Anceles” son çempiondu. Gələcəyə ümidlə baxmaq üçün çox mühüm qələbə qazandıq. Komanda günü-gündən inkişaf edir. Artıq bir titul qazanmışıq. Düzdü, “Liqalar Kuboku”nda bəzi anlarda bəxt də bizim tərəfimizdə oldu. İndi diqqətimizi pley-offa yönəldəcəyik. Ora vəsiqə qazanmaq üçün əlimizdən gələni edəcəyik”. Hazırda “Los Anceles”in şərəfini qoruyan İtaliya futbolu və “Yuventus”un əfsanəsi Corcio Kyellini də oyundan sonra “İnter Mayami”nin oyununa duyduğu heyranlığı gizlədə bilmədi: “İnter Mayami” indiyə qədər ABŞ-da qarşılaşdığım rəqiblər arasında açıq-ara fərqlə ən güclü kollektivdi. Söhbət təkcə “Barselona”nın sabiq “üçlü”sünün (Messi, Buskets, Alba) heyətdə olmasından getmir. “İnter Mayami” həqiqətən də çox gözəl komanda formalaşdırıb. Düzdü, onların pley-offa düşməsi asan görsənmir. Amma düşünürəm ki, bu hədəfə çatacaqlar. Öz konfransımızda birinci olmağımızı istəməzdim. Çünki belədə pley-offun birinci mərhələsində çox güman, “İnter Mayami” ilə qarşılaşmalı olacağıq”.