Azərbaycanın tarixi, dili, ədəbiyyatı o qədər dərin və zəngindi ki, bunlardan yararlanmamaq insanın öz acizliyidi.

Məsələn, dahi Nizami Gəncəvi deyir ki:
“Acizlik ürəyi ağrıdır, bilsən
Bir alçaqlıq olar hər zülmə dözsən”.
Sədi Şirazi də deyir ki:
“Ədəb sayılsa da, məclisdə susmaq
Məsləhət zamanı danışmaq gərək.
İki şey ağla nöqsan sayılır,
Yersiz susmaq ilə yersiz söz demək!”

Dilimizin, tariximizin, zənginliyini mənim əzbərlədiyim bir-iki misra ilə isbat etməyə gərək yoxdu. Amma bəzi şəxslərə öz dəyərlərimizi xatırlatmağa çalışıram. Söhbət konkret Tərlan Əhmədovdan gedir. Təcrübəli mütəxəssis ötən günlərdə “CBC Sport” kanalında yayınlanan “Bizim Futbol” verilişində “açdı sandığı, tökdü pambığı”.

Nələr dediyindən hamınızın xəbəri var. Amma Tərlan bəy “Neftçi”, “Kəpəz” haqda dediklərində haqlı idimi? Bunu bilmirik. “Futbol+” olaraq, Kamran Quliyevdən açıqlama almışıq. Flaqmanın sabiq rəhbəri istirahət etdiyini bildirirək bu mövzu ətrafında danışmaq istəmədi. İki gündü “Kəpəz” rəhbərliyindən kimisə tapa bilmirik. Nə İlqar Nadiri, nə də Mehman Allahverdiyev telefon zənglərimizi açır. Axırda məcbur olub bu məsələlərdə əlaqəsi olmayan dəyərli həmkarımız Azad Mustafayevin fikirlərini işıqlandırdıq.

Mən həm Kamran Quliyevi, həm İlqar Nadirini, həm də Mehman Allahverdiyevi başa düşürəm. Bəlkə də Tərlan Əhmədovu ciddiyə almaq istəmirlər. Amma unutmayaq ki, adıçəkilən şəxs ölkə futbolunda həm futbolçu, həm də baş məşqçi kimi xüsusi çəkiyə malikdi. Bəlkə də “danışmaq gümüşdüsə, susmaq qızıldı” prinsipindən istifadə edərək sükuta qərq olmusuz. Amma ictimaiyyət Tərlan bəyin fikirlərindən sonra sizi günahkar hiss edir. Məsələn, məşqçi iddia edir ki, “Neftçi”də işlədiyi zaman yeni rəhbərlik ona bildirib ki, flaqmana pul qazanmaq üçün gəlib. Bu artıq iddiadı. Məhkəmə predmeti olan sözlərdi. “Kamran Quliyev buna cavab vermirsə, deməli, günahkardı” fikri insanlar arasında dolaşır.

Tərlan Əhmədov deyir ki, Gəncədə onu öldürmək istəyənlər var idi. Bəs, rəhbərlik hara baxırdı? İlqar bəy, Mehman müəllim, sizin üçün çalışan bir şəxsin həyatını təhlükə altına atmaq nə qədər doğrudu?

Sualları ünvanlamaq istəyirik. Amma cavab tapa bilmirik.

Mən şəxsən Tərlan Əhmədovun məşqçi bacarıqlarına inanıram. Açığını deyim ki, verilişdə söylədiklərini ciddiyə almadım. Tutaq ki, Tərlan bəy haqlıdı və belə şeylər olub. Bəs nə üçün “Neftçi” rəhbərliyindəkilər pul qazanmaq üçün gəldiyi vaxtda açıqlamırdız? Niyə Kamran Quliyev tutduğu postdan gedəndən sonra bu barədə danışdız?

Gəncədə sizi ölümlə hədələyirdilərsə, mediaya bunu açıqlaya bilərdiz. Şəxsən mən və çalışdığım “Futbol+” sizə həmişə tribuna vermişik. Mediada çalışanların hamısı sizə dəstək olardı. Niyə ondan danışmırdız? Bəli, nələrsə deyirdiz. Ancaq çatışmazlıqlardan şikayətlənirdiz. Dediz ki, tərcüməçim yoxdu, futbolçum paltar yuyur. Arada özünüz haqda olan problemləri də dilə gətirsəz, pis olmazdı.

Dedikləriz həqiqətdisə, sizə həm təşəkkür düşür, həm də düşmür. Çünki belə şeylərdən xəbərdar olsaz da, işə görə susmusuz...

Yazımı Rövşən Abdullaoğlunun fikirləri ilə bitirmək istəyirəm. O zaman nə demək istədiyimi anlayarsız: “Çətinliyə dözmək üçün min metod axtarmaqdansa, nəyə görə dözəcəyinə bir səbəb tapmaq daha yaxşıdı”.

İLKİN SULTANLI