A seriyasının 2023/24 mövsümünün 2-ci turu daha çox avrokuboklarda oynamağa iddialı olan əksər komandaların xal itirməsi ilə yadda qaldı. İlk iki oyun günündə bir sıra sürprizlərə təsadüf edildi.

"Football-plus.az" xəbər verir ki, amma bu fikir ötən mövsüm finişə 5 tur qalmış 33 illik çempionluq həsrətinə son qoyan “Napoli”yə şamil olunmur. Ona görə ki, cənublular yeni mövsümə statusuna uyğun başlayıblar. Baş məşqçi vəzifəsində rəsmi debütü uğurlu alınan Rudi Qarsiyanın komandası 1-ci turda “Frozinone”ni səfərdə 3:1 hesabıyla məğlub etmişdi. İlk ev oyununda “Sassuolo”nu qonaq edən çempion yenə iki top fərqi ilə qalib gəldi. Əvvəcə Politanonun qazandığı penaltini dəqiq yerinə yetirən Osimhen hesabı açdı. 52-ci dəqiqədə qonaqların yarımmüdafiəçisi Lopes həddən artıq kobud oyuna görə qarşısında birbaşa qırmızı vərəqə gördü. Bir saatlıq mübarizə arxada qalandan sonra hesab 2:0 ola bilərdi. Lakin Raspadori penaltini qola çevirə bilmədi. Bir neçə dəqiqədən sonra müdafiəçi Di Lorentso qapıçı ilə təkbətək qaldığı epizodda ikinci qolu vurdu. Beləliklə, “Napoli” mövsümə ardıcıl iki qələbə ilə başladı.

“Milan” da belə göstəriciyə malikdi. Lombardiyalılar evdə “Torino”nu 4:1 hesabıyla məğlub etdilər. Qaliblərin qollarından ikisini penalti ilə Jiru vurdu. Digər qolların müəllifləri isə Pulişiçlə Ernandes oldu. Milanlılara bu yay qoşulan Pulişiçin A seriyasındakı ikinci oyunda da qapıya yol tapması diqqətdən yayına bilməz. Maraqlıdı ki, amerikalı vinger ötən mövsüm “Çelsi”nin formasında premyer-liqada meydana çıxdığı 24 oyunda yalnız bir dəfə qol sevinci yaşamışdı. Kristianın qolu londonluların sabiq oyunçusu Loftus-Çikin ötürməsi ilə vurduğunu da bildirək.

Tur paytaxt klubları üçün uğursuz alındı. Mövsümə evdə “Salernitana”dan yalnız bir xal (2:2) almaqla başlayan “Roma” Veronadan evə əliboş qayıtdı. Joze Mourinyonun komandası ilk hissədə xaotik oyunla yadda qaldı. Bunun məntiqi nəticəsi isə fasiləyə iki top buraxmaqla yollanmaq oldu. İlk oyunu müxtəlif səbəblərdən buraxan Lorentso Pelleqrini ilə Dibalanın sıraya dönməsi də “canavarlar”a xeyirli olmadı. Qonaqların gücü yalnız 2-ci hissədə təsəlli qolunu vurmağa çatdı.

“Latsio” da azarkeşlərini məyus etdi. Paytaxt təmsilçisi evdə “Cenoa”dan xal ala bilmədi. Argentinada doğulan italyanəsilli hücumçu Retegi A seriyasında qol hesabını açdı. B seriyasından bu yay qayıdan genuyalılar arxa xətdə çox yaxşı təsir bağışladılar. Mauritsio Sarrinin komandasının ardıcıl ikinci məğlubiyyətdən qaça bilməməsi turun ən böyük sürprizi oldu. “Qartallar”ın bu mövsümə belə start verəcəyi heç gözlənilmirdi...

Bu mövsüm avrokuboklarda oynamayan “Yuventus”un əsas diqqətini A seriyasına yönəltdiyi aydın məsələdi. Oyun qrafiki yüngül olacaq ölkə nəhəngi ilk turda “Udineze”ni səfərdə üç cavabsız qolla məğlub etmişdi. “Bolonya” ilə ev oyununun da turinlilər üçün çətin keçəcəyini gözləmək olardı. Lakin Massimiliano Alleqrinin komandası ilk hissədə rəqibin ciddi müqaviməti ilə üzləşdi. Qonaqlar hissənin ortalarında hesabı da açdılar. Bundan sonra turinlilərin riskli oyun oynaması qaçılmaz oldu. Hücuma daha çox meyl edən “Yuventus”un gücü yalnız məğlubiyyətdən qaçmağa çatdı: Vlahoviç 80-ci dəqiqədə komandasına bir xal qazandırdı.

Tur “Atalanta” üçün də uğursuz alındı. Berqamolular Frozinonedə 1:2 hesablı məğlubiyyətlə barışmalı oldular. B seriyasının son mövsümünün qalibi olan Eusebio Di Françeskonun komandası qələbəni böyük ölçüdə ilk hissədəki möhtəşəm oyunu ilə təmin etdi.

Yeni mövsümə səfərdə “Cenoa” üzərində inamlı qələbə (4:1) ilə başlayan “Fiorentina” evdə bir xalla kifayətləndi. Ardıcıl ikinci il İtaliyanı Konfrans Liqasında təmsil edəcək “bənövşəyilər” “Leççe”yə qarşı matçın ilk hissəsini iki topluq üstünlüklə başa vurdular. Lakin fasilədən sonra üstünlüyü əldən verdilər - 2:2.

2-ci tur
Frozinone – Atalanta 2:1
Harrui, 5. Monterizi, 24 – Sapata, 56. (13426)
Atalanta: Musso, Kolaşinats, Skalvini, Cimşiti (Muriel, 75), Rucceri (Bakker, 80), Ederson, De Roon, Zappakosta (Zortea, 46), Koopmeyners, Lukmen (De Ketelare, 46), Sapata (Skamakka, 68).
Verona – Roma 2:1
Duda, 4. Nqonq, 45+3 – Auar, 56. (23147)
Roma: Patrisio, Lyorente (Spinatsola, 46), Smollinq, Mançini, Zalevski (Karsdorp, 51), Kristante, Paredes (Auar, 46), Kristensen (Əl-Şaaravi, 56), Pelleqrini, Dibala (Solbakken, 68), Belotti.
Milan – Torino 4:1
Pulişiç, 33. Jiru, 43-p.; 65-p. Ernandes, 45+2 – Sxyurs, 36. (72013)
Milan: Menyan, Ernandes (Florentsi, 87), Tomori, Tiav (Kyaer, 76), Kalabriya, Reynders, Kruniç, Loftus-Çik (Musa, 66), Leao (Okafor, 66), Pulişiç, Jiru (Çukvueze, 66).
Yuventus – Bolonya 1:1
Vlahoviç, 80 - Ferqyuson, 24. (36107)
Yuventus: Perin, Danilo, Bremer, Aleks Sandro, Kambyaso (Aylinq, 66), Lokatelli, Rabyo (Makkenni, 82), Facoli (Poqba, 66), Vea (Yıldız, 82), Kyeza (Milik, 74), Vlahoviç.
Fiorentina – Leççe 2:2
Qonsales, 3. Dunkan, 25 – Rafya, 49. Krstoviç, 76. (34604)
Fiorentina: Kristensen, Parizi, Lukas Martines, Milenkoviç, Dodo, Dunkan (Kuame, 83), Artur (Mandraqora, 72), Sottil (Nzola, 65), Bonaventura (İnfantino, 83), Qonsales, Beltran (Brekalo, 65).
Napoli – Sassuolo 2:0
Osimhen, 16-p. Di Lorentso, 64. (46925)
Napoli: Meret, Olivera, Juan Jezus (Estiqor, 90), Rrahmani, Di Lorentso, Zyelinski (Kayuste, 83), Lobotka (Simeone, 85), Zambo Angissa, Raspadori (Elmas, 83), Politano (Kvaratsxeliya, 61), Osimhen.
Latsio – Cenoa 0:1
Retegi, 16. (40000)
Latsio: Provedel, Latsari, Romanyoli, Kazale, Maruşiç (Luka Pelleqrini, 66), Luis Alberto, Kataldi (Kastelyanos, 79), Kamada (Vesino, 66), Zakkanyi, Felipe Anderson (İsaksen, 67), İmmobile.
Montsa – Empoli 2:0
Kolpani, 45; 53. (8155)
Salernitana – Udineze 1:1
Dia, 72 – Samarciç, 57. (20000)
Kalyari – İnter 0:2
Dumfris, 21. Martines, 30. (16412)
1. Milan 2 2 0 0 6-1 6
2. Napoli 2 2 0 0 5-1 6
3. İnter 2 2 0 0 4-0 6
4. Verona 2 2 0 0 3-1 6
5. Fiorentina 2 1 1 0 6-3 4
6. Yuventus 2 1 1 0 4-1 4
7. Leççe 2 1 1 0 4-3 4
8. Atalanta 2 1 0 1 3-2 3
9. Montsa 2 1 0 1 2-2 3
10. Frozinone 2 1 0 1 3-4 3
11. Cenoa 2 1 0 1 2-4 3
12. Salernitana 2 0 2 0 3-3 2
13. Roma 2 0 1 1 3-4 1
14. Bolonya 2 0 1 1 1-3 1
15. Kalyari 2 0 1 1 0-2 1
16. Udineze 2 0 1 1 1-4 1
17. Torino 2 0 1 1 1-4 1
18. Latsio 2 0 0 2 1-3 0
19. Empoli 2 0 0 2 0-3 0
20. Sassuolo 2 0 0 2 0-4 0
Bombardirlər: Osimhen (Napoli), Jiru (Milan), Martines (İnter) - 3.
Növbəti turun oyunları sentyabrın 1-3-ü aralığında keçiriləcək: Sassuolo - Verona, Roma - Milan, Udineze – Frozinone, Bolonya - Kalyari, Napoli –Latsio, Atalanta – Montsa, Torino - Cenoa, İnter – Fiorentina, Empoli – Yuventus, Leççe – Salernitana.

Turun rəqəmi
5 – nəhayət, Xviça Kvaratsxeliya ölkə çempionatında uzun sürən qeyri-məhsuldar çıxışına son qoydu. Gürcü futbolçu “Sassuolo” ilə oyunda komandasının ikinci qolunun ötürməsini verdi. 22 yaşlı hücumçu A seriyasında sonuncu dəfə 5 ay əvvəl qol epizodunda yaxından iştirak etmişdi. Martın 19-da “Torino” ilə matçda “Napoli”nin 4:0 hesablı qələbəsində bir qol və məhsuldar ötürmə ilə rol oynamışdı. Xviçanın İtaliya çempionatındakı debüt mövsümündə meydana çıxdığı 34 oyunda 12 qolun və 10 məhsuldar ötürmənin müəllifi olduğunu da xatırladaq.

Turun ulduzu
Ondrey Duda (Verona) - slovakiyalı futbolçu “Roma” ilə matçda komandasının maksimum xal qazanmasında böyük rol oynadı. Duda nəticəyə 1 qol və məhsuldar ötürmə ilə təsir etdi. Maraq üçün 28 yaşlı yarımmüdafiəçinin ötən mövsüm “Verona”nın formasında A seriyasında meydana çıxdığı 15 oyunda qol vur abilmədiyini xatırladaq.

Turun sitatı
Marko Landuççi, “Yuventus”un məşqçisi: “Baş məşqçimiz Alleqrini soyuqdəymə tutub. Mətbuat konfransına özünü yaxşı hiss etmədiyi üçün gələ bilmədi. Amma qorxulu bir şey yoxdu. Təəssüf ki, Vlahoviçin vurduğu ilk qol sayılmadı. Qalib gələ bilməsək də, ikinci hissədə çox yaxşı oynadıq. Sadəcə, mövsümün ilk ev oyununda azarkeşlərimizdə həddən artıq xoş təəssüratlar oyatmaq istəyirdik. Rəqib komandanın çalışdırıcısı Tyaqo Motta qapımıza penalti təyin olunmamasından şikayətləndi. Qərarları hansı tərəfə sərf edir-etsin, biz hakimlərin mövqeyini şərh etmirik, onların qərarlarını həmişə qəbul edirik”.