Voytsex Şçensnı “Yuventus”a 2017-ci ildə gəlsə də, komandanın əsas qapıçısı statusunu yalnız əfsanəvi həmkarı Canluici Buffon 2018-ci ildə PSJ-yə üz tutandan sonra qazanmışdı.

“Football-plus.az” xəbər verir ki, karyerasını bir neçə gün əvvəl başa vuran dünya çempionu tezliklə komandaya qayıtsa da, polşalı əlcək sahibi “çərçivə”dəki yerini itirməmişdi. Voytsex o vaxtdan turinlilərin hər mənada “1” nömrəli qapıçısı sayılır. 33 yaşlı futbolçu ölkəsinin “TVP Sport” telekanalına müsahibəsində əsasən bugünü və yaxın gələcəklə bağlı sualları cavablayıb.

- Komandanız bu mövsüm avrokuboklarda iştirak etməyəcək...
- Buna baxmayaraq, həftənin ikinci və üçüncü günlərini yenə Çempionlar Liqası həyəcanı ilə keçirəcəyəm. Amma bu həyəcanı yalnız televizor qarşısında yaşayacağam. Bizi avrokuboklardan kənarlaşdırdılar və mən bu qərara qarşı heç nə edə bilmərəm. Sadəcə, verilən hökmü qəbul etməyə çalışıram. Nə etmək olar, deməli, bu mövsüm məşqlərə və istirahətə daha çox vaxt ayıra biləcəyik. Avropada oynamamaq bizim üçün heç də dünyanın sonu demək deyil.

- Belə vəziyyətdə “Yuventus”un skudetto uğrunda yarışmaq perspektivini necə görürsüz?
- Dediyim kimi, bu mövsüm həftə ərzində öz üzərimizdə çalışmaq üçün yetərincə vaxtımız olacaq. İki gündən bir oynayırsansa, həftəlik proqramın təxminən belə görünür: matça çıxırsan və oyundan sonra bərpa üçün məşq keçirsən, sonra növbəti matça hazırlaşırsan və yenidən meydana çıxırsan. Belə qrafikdə mövsüm ərzində nəsə düşünmək üçün vaxtın olmur. Amma bundan sonra bizim üçün vəziyyət çox fərqli olacaq. Bu vəziyyətə alışmaq və çıxış edəcəyimiz turnirlərdə uğur qazanmaq üçün var gücümüzlə işləməliyik.

- Komandadan mümkün gedişinizlə bağlı şayiələr dolaşır...
- İndi sizin qarşınızda hansı formada əyləşdiyimi xatırlayın. Bəli, mən “Yuventus”un futbolkasını geymişəm. Burda kluba lazım olduğum qədər qalacağam. Bu fikri bir də təkrarlamağa hazıram.

- Bəs gələcəyiniz haqda nə deyə bilərsiz?
- Kim olduğumu yaxşı bilirəm və klub məni satmaq qərarını verməyincə “Yuventus”un oyunçusu kimi qalacağam. Bu kluba bir çox yöndən bağlıyam və rəhbərliyin qərarlarına hörmət edirəm. Bosslar mənim indi də “Yuventus”un qapısını qorumağımı istəyirlər. Bununla da haqqımda yazılan bütün şayiələrə son qoyulur.

- Turini ikinci eviniz sayırsız?
- Mənim iş yerim bu şəhərdədi. Peşəkar futbolçuyam və işlədiyim yerdə yaşayıram. Vətənim Polşaya və doğulduğum Varşavaya çox bağlıyam. Ümumiyyətlə, mənim yalnız bir evim var.

- Səudiyyə Ərəbistanından ala biləcəyiniz zəngə necə cavab verərdiz?
- Danışığa ilk növbədə arxasında bir neçə sıfır olan məbləğdən başlayaram (gülür). Kifayət qədər pulum var. Maraqlı çağırışlara üstünlük verirəm. “Yuventus”un qapısını qorumağı isə özüm üçün ən ciddi çağırış sayıram.

- Asiyanın bu ölkəsinə kütləvi axını necə dəyərləndirirsiz? Bu tendensiya uzun müddət davam edə bilər?
- Hələ Səudiyyə Ərəbistanına kütləvi transfer axınını təhlil etməmişəm. Futbol xəbərlərini nadir hallarda oxuyuram. Amma Asiya ölkəsinə bir çox tanınmış futbolçunun yollandığını bilirəm və bu, məni təəccübləndirmir. Söhbət ağlagəlməz məbləğlərdən gedir. Kimlərsə cəlbedici təklifi qəbul edə bilər və mənə elə gəlir ki, bu məntiqidi. Fikrimcə, pul dalınca qaçmaq yerinə başqa prioritetlər olmalıdı.

- “Yuventus”la daha bir neçə skudetto qazanmaq istəyiniz olmamış olmaz...
- Əlbəttə, bu istək həmişə var. Amma düzünü desəm, klubumuz qələbələrə o qədər alışıb ki, çempionluğun ertəsi gün meydana çıxıb yenidən qalib gəlmək istəyirsən. Sözsüz, son illər uğurlu çıxış edə bilmədiyimiz üçün məyusuq. Buna görə də indi geridönüş edərək daha yüksək hədəflər uğrunda mübarizə aparmaq üçün motivasiyamız aşıb-daşır.

- Karyeranızın sona yaxınlaşdığını düşünürsüz?
- Hələ ki yox. Əslində isə yaşıl meydanda bundan sonra çox da vaxtımın qalmadığını düşünürəm. Meydanda və bu klubda olduğum hər andan zövq almağa çalışıram. Vacib fiqur olduğumu hiss edirəm. Buna görə “Yuventus”un yenidən zirvəyə yüksəlməsi üçün əlimdən gələni edirəm.

- Bəs milli komandada nə vaxta qədər çıxış edəcəksiz?
- Bizim sənətdə vacib qələbələr və xoş olmayan məğlubiyyətlərdən sonra sürətli bərpaya alışmaq lazımdı. Dünya çempionatında Fransaya məğlubiyyət mənim üçün kədərli məqam idi. Matçın arxada qaldığına yalnız bir neçə gündən sonra əmin olmuşdum. 2024-cü ildə keçiriləcək Avropa çempionatı mənim üçün yığmada sonuncu böyük turnir olacaq.

- Futboldankənar həyatınız haqda nə deyə bilərsiz?
- İlk növbədə ailəmə daha çox vaxt ayırmalı olduğumu düşünürəm. Futbolda keçirdiyim son 17 ildə itirdiklərimi geri qaytarmalıyam. Müxtəlif işlərdən və təhsillə bağlı planlardan başqa ailəmə mənim peşəmə görə ala bilmədiklərini vermək istəyirəm.

- Oğlunuz sizin yolla irəliləyəcək?
- Hə, onda futbola böyük maraq görürəm. Təəssüf ki, onun “Real”ın azarkeşi olduğunu etiraf etməliyəm. Bu, mənim üçün bir qədər arzuolunmaz faktdı. Futbol oynamağı çox xoşlayır, bütün oyunçuları yaxşı tanıyır, onların vizit vərəqlərini toplayır. Bilirsiz, öz əyləncəmi mənə ən yaxın olan adamla bölüşmək, ona bəzi məqamları izah etmək, müxtəlif futbolçular haqda danışmaq və onunla futbol oynamaq mənim üçün çox xoşdu. “Yuventus”da məşqlər ağır keçir, amma oğlumla birlikdə məşq etmək mənə daha ağır görünür.