Kilian Mbappenin PSJ ilə münasibətlərindəki qəfil dönüşdən, ulduzun hətta “Tuluza” ilə çempionat oyununda meydana çıxmasından xəbərdarsız.

Bu mövzuda bəzi yeni xəbərlər də var. PSJ “Real”ın hələ də Mbappenin transferi ilə bağlı heç bir təklif etməməsinə təəccüblənib. “As” qəzetinin Paris müxbiri Andres Onrubiya yazır ki, PSJ Mbappeni müqavilə müddətini uzatmağa inandırmaq üçün çalışır. Ötən həftə Fransaya səfər edən Qətər təmsilçiləri oyunçunun yaxın ətrafı ilə görüşüb. Bazar günü keçirilən görüşdə tərəflərin mövqeyi yaxınlaşıb. Qətərdən gələnlər bu görüşdən məmnun ayrılıblar. Bu həftə daha bir şəxsi görüşün təşkili gözlənir, orda artıq PSJ-nin prezidenti Nasser Əl-Xelayfi də iştirak edə bilər.

Bazar günü baş tutan görüşün nəticəsi kimi PSJ-də Mbappe ilə müqavilə müddətini uzatmaq mövzusunda nikbinlik hökm sürür. Parislilər əmindi ki, Kilian mövsümü bu komandada keçirəcək. Ancaq Mbappenin ətrafının Qətər təmsilçiləri ilə görüşməsi faktı hələ onun müqavilə müddətini uzadacağı anlamına gəlmir. Tərəflər, sadəcə, mövcud gərginliyi bitirmək istəyiblər.

PSJ və Qətər “transfer pəncərəsi” bağlanan qədər “Real”dan təklif gözləyəcək. Qətərdən gələnlər Mbappenin ətrafına bildiriblər ki, futbolçunun xidmətində bunca maraqlı olan Madrid klubunun hələ də transfer təklifi irəli sürməməsinin səbəbini anlamırlar, baxmayaraq ki, ortada Mbappenin müqavilə müddətini uzadacağı riski var. PSJ-nin mövqeyi məlumdu: Mbappeyə görə 250 milyon avro təklif olunan kimi onu satacaqlar. Yox, bundan aşağı məbləğ təklif olunsa, ona heç baxmayacaqlar da.

PSJ gələn yay futbolçunu havayı buraxmaq riski ilə üzləşmək istəmir. Ancaq o da qeyd olunur ki, Əl-Xelayfinin ilkin hədəfi forvardın bu mövsümü komandada keçirməsidi. Mbappe də transfer söhbətini sürətləndirmək istəmir, müqavilə müddətinin sonuna qədər çalışmaq və gələn yay PSJ-dən havayı ayrılmaq istəyir. Qətərlilər son görüşdə bəyan ediblər ki, Mbappe gerçəkdən getmək istəyirsə, bunu ictimaiyyətə açıq şəkildə çatdırmalıdı. Hələ ki biz bunu görmürük.

Bu mövzuda başqa versiyaları da nəzərinizə çatdıraq. PSJ Mbappeni kompensasiyasız buraxmayacaq. “The Times” iddia edir ki, tərəflər hücumçunun başqa kluba transferi təqdirində parislilərə pul çatacağını razılaşdırıb. Futbolçunun klub prezidenti Nasser Əl-Xelayfi ilə bir neçə söhbətinin yekunu kimi ortada şifahi razılıq var. Bu söhbətlər son nəticədə Mbappenin PSJ ilə uzunmüddətli müqavilə imzalamasına gətirib çıxara bilər. Klubla futbolçu ya mövcud müqavilənin müddətini bir il də uzadacaq, ya da uzunmüddətli müqaviləyə “satışla bağlı təminat” bəndini salacaq. Nə bu, nə də digər variant alınmasa, onda Mbeppe 2022-ci ildə müqavilə imzaladığına və loyallığa görə ona çatası 100 milyon avrodan imtina edəcək.

Futbolçu Əl-Xelayfiyə onu da deyib ki, yeni baş məşqçi Luis Enrikenin rəhbərliyi altında işləməyə tam hazırdı və PSJ ilə birgə Çempionlar Liqasını qazanmağa köklənib.

Jerom Roten də bu mövzu ilə bağlı maraqlı nəzəriyyə irəli sürüb. PSJ-nin sabiq oyunçusu belə hesab edir ki, bu tarixçədə həlledici rolu Luis Enrike oynayıb. Baş məşqçi klubla futbolçunun təmsiliçiləri arasındakı görüşlərə qatılıb. Roten əmindi ki, məhz Enrike Əl-Xelayfi ilə Mbappe arasında dialoqu qaydaya salıb:

“Baş məşqçi xüsusi mövqe tutub. O, sələflərinin yol verdiyi səhvlərə görə cavab vermək istəmir. Enrike komandaya yaxşı oyunçunun lazım olduğuna inanır, bu üzdən danışıqların gedişində deyib ki, “anlaşmağa çalışın, Mbappenin yeri PSJ-di”.

Yeri gəlmişkən...

Mbappe bu mövsüm PSJ-nin vitse-kapitanlarından biri olacaq. Futbolçuların qatıldığı gizli səsvermənin nəticəsi kimi Markinyos kapitan statusunu qoruyub. Danilo Pereyra 1-ci, Presnel Kimpembe 2-ci, Mbappe isə 3-cü vitse-kapitan seçilib.