Kilian Mbappe münasibətlərində gərginliyin hansı həddə qədər inkişaf etdiyindən xəbərdarsız.

“Football-plus.az” xəbər verir ki, qısaca xatırladaq ki, paytaxt klubunun müqavilə müddətini uzatmayacağı və gələn yay havayı gedəcəyi təqdirdə əsas ulduzunu mövsüm boyunca ehtiyatda oturtmağa hazır olduğu belə məlum idi. Amma avqustun 12-də keçirilən PSJ – “Loryan” oyununda Kilianı parislilərin yeni transferi Usman Dembele ilə birgə tribunada görənlər çaşıb qaldı. Görəsən, klubla futbolçu arasında nələr yaşandı ki, münasibətlər qəfil düzəldi? Marığa yatıb hadisələrin axarını izləyən “Real” bu məsələyə necə yanaşır?

Konstruktiv və pozitiv danışıqlardan sonra....

Əvvəlcə PSJ-nin avqustun 12-də yaydığı açıqlamaya nəzər salaq: “PSJ Kilian Mbappenin komandanın əsas heyətinə qayıtdığını elan edir. PSJ ilə Mbappe arasındakı konstruktiv və pozitiv danışıqlardan sonra “Loryan”la oyun ərəfəsində oyunçu əsas komandanın məşq edən heyətinə bərpa olunub”.

Bu açıqlamadan bir neçə gün əvvəl isə PSJ-nin Mbappe ilə müqavilə müddətini 2025-ci ilə qədər uzatmaq istədiyi, sadəcə, bu zaman 2024-ün yayında “Real”a keçidinə təminat verməli olacağı haqda xəbərlər yayılmışdı. Belə çıxır ki, bu məsələdə tərəflərin mövqeyi yaxınlaşıb.

Onu da xatırladaq ki, klubun son açıqlamasına qədər Mbappe bir dəfə də Luis Enrikenin rəhbərliyi altında məşqə çıxmamışdı. İndi onun PSJ ilə müqavilə müddətini daha bir il uzatmağa hazır olduğunu iddia edən mənbələr çoxdu. Yuxarıda da vurğuladığımız kimi, dünya futbolunun əsas ulduzlarından biri, sadəcə, gələn ilin yayında “Real”a buraxılacağı ilə bağlı təminat istəyir. “RMC Sport” da bu versiyanı təsdiqləyir və bildirir ki, əvvəllər belə variantı rədd edən Kilian mövqeyini dəyişib. Hazırda tərəflər arasında danışıqlar davam edir. PSJ düşərgəsində bu mövzuda nikbin düşünənlərin sayı çoxdu. Klub rəhbərliyi hələ də Mbappeni layihəsinin mərkəzi fiquru kimi görür.

Amma PSJ – Mbappe münasibətlərinin xarakteri ilə bağlı fərqli xəbərlər yayan qaynaqlar da var. Yəni Mbappenin heyətə dönüşü müqavilə müddətini uzadıb-uzatmamaqdan asılı olmayıb. “L’Equipe” yazır ki, forvardın klub rəhbərliyi ilə apardığı və münasibətlərin yaxşılaşmasına gətirib çıxaran son danışıqlarda yeni müqavilə imzalamaq mövzusu, ümumiyyətlə, qaldırılmayıb. İddia olunur ki, klub tarixinin ən yaxşı bombardiri necə olur-olsun, yaşıl meydana qayıtmaq niyyətindədi, ancaq bunun üçün 2024-cü ildə klubdan havayı ayrılmamaq vədini verməyib.

Baş məşqçi Luis Enrike yaxın vaxtlarda onun xidmətindən yararlanmağa başlayacaq, futbolçu özü isə prezident Nasser Əl-Xelayfi ilə müntəzəm təmasları davam etdirəcək. Onların son danışıqlarının ümumi xarakteri “müsbət” təyini ilə xarakterizə olunur. Mbappenin avqustun 19-da keçiriləcək “Tuluza” ilə oyunda iştirak ərizəsinə düşəcəyi gözlənilir.

Yeni müqavilə imzalasa, “Real” ondan imtina edəcək

Bu yerdə ortaya maraqlı bir sual çıxır. Görəsən, “Real” hadisələrin belə axarını necə qiymətləndirir? Belə görünür ki, fransalı ulduz PSJ ilə yeni müqavilə imzalayacağı təqdirdə Madrid klubu onu “rənglərinə bağlamaq” ideyasından imtina edəcək. Belədə “Real” onunla anlaşmaq cəhdlərindən əl çəkəcək, ümumiyyətlə, ötən il yaşananları da nəzərə alaraq, bu futbolçunun varlığını birdəfəlik unudacaq. Kilianın gələcəkdə də “Real”a transferi mümkün olmayacaq. Halbuki İspaniya klubunun Mbappenin parislilərin əsas heyətinə dönüşünü özü üzün fiasko saymadığını və onun 2024-də transfer məbləği ödəmədən heyətinə qatmaq niyyətindən əl çəkmədiyini iddia edənlər də var.

“Real”ın əfsanələrindən Quti də bu mövzuda fikir bildirməyi lazım bilib. Komandanın sabiq xavbeki “El Chiringuito”nun efirində belə deyib: “Mbappenin “Real”da oynamasını istəyirəm. Belə oyunçu qarşısında qapıları bağlamaq dəbdəbəsini özümüzə rəva görə bilmərik. Ancaq Mbappe PSJ ilə müqavilə müddətini uzatsa, deməli, pul naminə hərəkət edir. Belədə “Real” seçimini Erlinq Holann üzərində saxlamalıdı”.

Neymarla arasının dəydiyinə dair daha bir sübut

Mbappe ilə bağlı yaşananların fonunda onun Neymarla münasibətləri də önə çıxır. Braziliyalı ulduzun artıq PSJ-dən ayrılaraq “Əl-Hilal”a yollandığı bəllidi. İki ulduzun münasibətlərinin qaydasında olmadığına dair daha bir sübut. “FiqueiPutoMesmo” səhifəsində “L’Équipe” qəzetinin bu fikirlərin yer aldığı yazısı paylaşılıb: “Mbappe ötən yay PSJ-yə anladıb ki, o və Neymar heyətdə bir yerdə ola bilməzlər. Maraqlıdı ki, Neymarın praktiki cəhətdən “Əl-Hilal”a keçdiyi gün Mbappe çox razı halda komandanın məşqlərinə qoşulub”.

Braziliyalı ulduz bu paylaşımın altında “bəyənmə” işarəsini vurub. Bu, Neymarın Mbappenin ünvanına tənqidlərin yer aldığı paylaşımları bəyənməsi ilə bağlı ilk hal deyil. O, mayda Kilianın xarakterindən bəhs edən videoya münasibətdə də eyni cür davranmışdı.